മറക്കാൻ മറന്നത്

നാടുവിടലും നാലുകൂട്ടം സാമ്പാറു കഷണവും

2012-01-24T20:03:00.005+04:00

നാലാം ക്ലാസ്സ് വരെ വീടിനു തൊട്ടടുത്തുള്ള ഗവണ്മെന്റ് എൽ.പി സ്കൂളിലായിരുന്നു ഞാൻ പഠിച്ചിരുന്നത്. അവിടുത്തെ പഠനം വിജയകരമായി പൂർത്തിയാക്കി അഞ്ചാം‌ക്ലാസ്സെന്ന ഉപരിപഠനത്തിനായി 6 കിലോമീറ്റർ അപ്പുറത്തുള്ള മറ്റൊരു സ്കൂളിലായിരുന്നു എന്നെ ചേർത്തത്. അല്പം ദൂരെ ആണെങ്കിലും അതേ സ്കൂളിൽ തന്നെ എട്ടാം ക്ലാസ്സിൽ പഠിക്കുന്ന ചേട്ടന്റെ തണലിൽ ഞാൻ സുരക്ഷിതയായിരിക്കുമെന്ന് വീട്ടുകാർക്ക് തോന്നി കാണണം. സ്കൂളിലേയ്ക്ക് എന്നും ചേട്ടന്റെ ഒപ്പം പ്രൈവറ്റ് ബസ്സിൽ ആണു പോക്കുവരവ്. അന്ന് ആവശ്യത്തിന് ബസ്സുകളില്ലാത്ത ആ റൂട്ടിൽ ഓടുന്ന ഏതു ബസ്സിലും സാമാന്യം തിരക്കുണ്ടാകുമായിരുന്നു.

വീട്ടുകാർ കൂടെ ഉള്ളപ്പോഴും ഇനി അതല്ല തനിച്ചാണെങ്കിലും തിരക്കുള്ള ബസ്സിൽ കയറിയാൽ ഉടനെ വലിയ വായിൽ നിലവിളിക്കുക എന്നൊരു അരുമയായ ശീലം ഞാൻ അന്ന് വളർത്തി കൊണ്ടുവന്നിരുന്നു. ഇഷ്ടമില്ലാതെ വല്ലയിടത്തും കൊണ്ടുപൊകുന്നതാണെങ്കിൽ തിരക്കില്ലെങ്കിലും കരയും. എന്നുമുള്ള സ്കൂളിലേയ്ക്കുള്ള യാത്രയിലും അത് അണുവിട തെറ്റാതെ ആവർത്തിച്ചു. എന്റെ ഈ സൽ‌സ്വഭാവം അറിയുന്നതുകൊണ്ട് തന്നെ കൂടെനിൽക്കാതിരിക്കാനായി മനപ്പൂർവ്വം ബസ്സിന്റെ പിന്നിൽ കയറുന്ന ചേട്ടന് വരെ ബസ്സിന്റെ മുന്നിൽ നിൽക്കുന്ന എന്റെ കരച്ചിൽ വളരെ വ്യക്തമായി കേൾക്കാമായിരുന്നു. പക്ഷെ അങ്ങനെ ഒരു കരച്ചിലോ കരച്ചിലിന്റെ ഉടമയെയോ യാതൊരു പരിചയവുമില്ലെന്ന മട്ടിൽ ആൾ നിൽക്കുമ്പോഴാകും കൂട്ടുകാരാരെങ്കിലും ‘എടാ നിന്റെ അനിയത്തി കരയുന്നു’ എന്ന് പറയുന്നത്. പിന്നെ പിന്നിലെ സീറ്റിന്റെ ഇടയിലോ മറ്റോ കയറി നിന്ന് മുന്നിൽ എവിടെ എങ്കിലും നിന്ന് കരയുന്ന എന്നെ കണ്ടെത്തി ആംഗ്യങ്ങളിലൂടെ ഭീഷണിപ്പെടുത്തിയും കണ്ണുമിഴിച്ച് കാണിച്ച് ദേഷ്യപ്പെട്ടും എന്റെ കരച്ചിൽ തീർക്കാൻ ശ്രമിക്കുമ്പോഴേയ്ക്ക് സഹാനുഭൂതി തോന്നി ബസ്സിലെ യാത്രക്കാരായ ചേച്ചിമാർ ആരെങ്കിലും എന്നെ അവർ ഇരിയ്ക്കുന്ന സീറ്റിനിടയിൽ കയറ്റി നിർത്തിയിട്ടുണ്ടാകും. പിന്നെ തികച്ചും സ്വസ്ഥമായ യാത്ര... പോകെ പോകെ ഞാൻ ബസ്സിൽ കയറുമ്പോ തന്നെ ആരെങ്കിലും എന്നെ സീറ്റിനിടയിലേയ്ക്ക് കയറ്റി നിർത്തും. ബാഗും അവർ തന്നെ വാങ്ങി പിടിയ്ക്കും. അങ്ങനെ സാവധാനം ബസ്സിന് എന്റെ കരച്ചിലിൽ നിന്ന് ഒരു മോചനം കിട്ടി.

ഇങ്ങനെയൊക്കെ ജീവിതം പുരോഗമിയ്ക്കുന്നതിനിടയ്ക്കാണ് ആദ്യമായി അനീതിക്കെതിരെ ഞാൻ പടവാളുയർത്തുന്നത്.... രണഭൂമി എന്റെ വീട് തന്നെ. അക്കാലത്ത് എന്റെ ആജന്മശത്രുവായി ഞാൻ പ്രഖ്യാപിച്ചിരുന്നത് എന്റെ ചേട്ടനെ തന്നെ ആയിരുന്നു. നേരെ നോക്കിയാൽ അടിപിടി അക്രമത്തിലെത്തുന്ന എല്ലാ സാഹചര്യങ്ങളിലും ചേട്ടന്റെ പക്ഷം പിടിയ്ക്കുന്ന എന്റെ ഉമ്മച്ചിയുടെ നിലപാടാണ് ഞാൻ ആദ്യമായി അറിഞ്ഞ അനീതി. ഇതിനെതിരെ പ്രതികരിച്ചാൽ കിട്ടാനുള്ള അടിയുടെ എണ്ണം കൂട്ടാമെന്നല്ലാതെ മറ്റ് പ്രയോജനമൊന്നും ഇല്ലെന്ന് മനസ്സിലായപ്പോൾ, പടവാൾ മറ്റൊരു ഡയറക്ഷനിൽ വീശാൻ തീരുമാനിച്ചു. വീട് വിട്ട്; നാടു വിട്ട് പോവുക. ഇതുവഴി രണ്ട് ലാഭങ്ങൾ ഉണ്ടാകും. ഒന്ന്, എനിയ്ക്ക് ഞാൻ അനുഭവിച്ചുകൊണ്ടിരിയ്ക്കുന്ന ‘അനീതി‘കളിൽ നിന്ന് രക്ഷപ്പെടാം. രണ്ട്, ഞാൻ പോകാൻ കാരണക്കാരനായ എന്റെ 'ശത്രു'വിന് ആ പേരിൽ കണക്കിന് കിട്ടുകയും ചെയ്യും, മതി... നമുക്കത്രയും മതി....

തുടർന്ന് മാസ്റ്റർ പ്ലാൻ തയ്യാറാക്കി. എന്ന് എങ്ങനെ എങ്ങോട്ട് പോകണം എന്നതിനൊക്കെ വ്യക്തമായ പദ്ധതികൾ. പക്ഷെ ചിന്തകൾ പ്രാവർത്തികമാക്കേണ്ട സമയമായപ്പോൾ പതുക്കെ പേടി തോന്നിതുടങ്ങി. തനിച്ച് ഒരു മുറിയിൽ കിടന്നുറങ്ങാൻ ഭയക്കുന്ന ഞാൻ എങ്ങനെ ഒറ്റയ്ക്ക് ദൂരെ എവിടേയ്ക്കോ യാത്ര പോകും? !!! പക്ഷെ എന്തുവന്നാലും പോകാതിരിയ്ക്കാനാവില്ല. ഇനി ഈ അക്രമം സഹിക്കാൻ വയ്യ. അങ്ങനെയാണ് അയൽക്കാരിയും കൂട്ടുകാരിയും അതേ സ്കൂളിൽ ആറാം ക്ലാസ്സിൽ പഠിക്കുന്നവളുമായ ബിജിതയോട് ഇക്കാര്യം പറയുന്നത്. ദാ തേടിയ വള്ളി കാലിൽ ചുറ്റി ! അവളാണേൽ ഇങ്ങനൊരു കാര്യം ആഗ്രഹിക്കാൻ തുടങ്ങിയിട്ട് കാലം കുറേ ആയി പോലും. അവൾക്ക് വീട്ടിൽ ഒന്നിനു പകരം രണ്ട് ശത്രുക്കൾ ഉണ്ട്. ചേട്ടനും അനിയത്തിയും. പേന പെൻസിൽ റബ്ബർ ഇത്യാദികൾ കൊടുക്കാത്തതു മുതൽ പുതിയതായി പണി കഴിപ്പിച്ചുകൊണ്ടിരിക്കുന്ന വീട്ടിൽ അവൾക്ക് മാത്രം സ്വന്തമായി മുറിയില്ല എന്നതു വരെയുള്ള അനീതികളുടെ കണ്ണീരിൽ ചാലിച്ച കദന കഥയാണ് അവൾക്ക് പറയാനുണ്ടായിരുന്നത്.കക്ഷി എന്റെ കൂടെ എവിടേം വരാൻ തയ്യാറാണ്. പക്ഷെ ഒരൊറ്റ നിബന്ധന മാത്രം. അവളുടെ വീടുപണി കഴിയാൻ പോകുന്നു; വീടിന്റെ പാലുകാച്ചൽ ചടങ്ങിനിടാൻ ഒരു ചുരിദാറെടുത്തുകൊടുക്കാമെന്ന വാഗ്ദാനം വീട്ടിൽ നിന്ന് കിട്ടിയിട്ടുണ്ട്. ആ ജീവിതത്തിൽ കിട്ടുന്ന ആദ്യത്തെ ചുരിദാറാണ്. അതൊന്നിടണം...പിന്നെ എന്നു വേണമെങ്കിലും എങ്ങോട്ട് വേണമെങ്കിലും അവൾ വരും....

സമയം വൈകിക്കുന്നത് വല്യ താല്പര്യമില്ലായിരുന്നെങ്കിലും അനീതിയുടെ കയ്പ്പുനീർ കുടിച്ച് ജീവിക്കുന്ന അവളെ രക്ഷിക്കേണ്ടത് എന്റ്റെ കടമയാണെന്ന് വിശ്വസിച്ച് ക്ഷമയോടെ കുറച്ച് നാൾ കൂടി കാത്തിരിയ്ക്കാൻ ഞാൻ തയ്യാറായി. അതിനിടയിലാണ് ക്ലാസ്സിലെ എന്റെ ഏറ്റവും അടുത്ത കൂട്ടുകാരി മഞ്ജു വീട്ടിൽ അവൾ അനുഭവിച്ചുകൊണ്ടിരിയ്ക്കുന്ന കടുത്ത ഒറ്റപ്പെടലിനെ കുറിച്ച് എന്നോട് പറയുന്നത്. ഇരട്ടകളായ അനിയനും അനിയത്തിയും എല്ലാ യുദ്ധങ്ങളിലും അവൾക്കെതിരാണ് പോലും. കൂടെ മറ്റൊന്നുകൂടി പറഞ്ഞു. അനിയനും അനിയത്തിയും അവളെ വിളിയ്ക്കുന്നത് ‘ചൊറിക്കാലി’ എന്നാണെന്ന് (പണ്ടെങ്ങോ ചൊറി വന്നതിന്റെ പാടുകൾ അവളുടെ കാലിൽ ഉണ്ട്). അതിനുമപ്പുറം ഒരു ചീത്തവാക്ക് ഈ ലോകത്തില്ലെന്ന മട്ടിലാണ് അവളുടെ ഇരിപ്പും സങ്കടവും. ഒക്കെയും കേട്ടു കഴിഞ്ഞപ്പോൾ അനീതിയുടെ ബലിയാടായ അവളേയും രക്ഷിക്കണമെന്ന് ഞാനുറപ്പിച്ചു. എന്തിനധികം പറയുന്നു, നാടുവിടൽപദ്ധതിയിൽ പങ്കാളികളുടെ അംഗസംഖ്യ പൊടുന്നനെ മൂന്നായി വർദ്ധിച്ചു.

അങ്ങനെയിരിക്കെ ഒരു ദിവസം പദ്ധതിയെക്കുറിച്ചുള്ള രഹസ്യ വിവരങ്ങൾ അവിചാരിതമായി ചോർന്നു. വൈകിട്ടത്തെ ബസ്സ് യാത്രയിൽ ഞാനും ബിജിതയും പദ്ധതിയെ കുറിച്ച് ചർച്ച ചെയ്തതെല്ലാം മറ്റൊരുത്തി കേട്ടിരിക്കുന്നു !. ഭയത്തിന്റെ നെരിപ്പോടിലുരുകിയ രാത്രി ! പക്ഷെ ഭയന്നതുപോലെ അവൾ ശത്രുവല്ലെന്ന് പിറ്റേന്ന് രാവിലെ തന്നെ മനസ്സിലായി. അതികഠിനമായ പല ദു:ഖങ്ങളും അവൾക്കുണ്ടെങ്കിലും ചില പ്രതികൂല സാഹചര്യങ്ങളാൽ കൂടെ വരാൻ കഴിയില്ലെന്നും യാത്രയ്ക്ക് വേണ്ട സഹായങ്ങളെല്ലാം ചെയ്തു തരാമെന്നും ഉപദേശ നിർദ്ദേശങ്ങൾ ഫ്രീയായി തരാമെന്നും അവൾ വാക്കുതന്നു. പദ്ധതി ചോർന്നതു വഴി അപകടങ്ങൾ ഒന്നും ഉണ്ടായില്ലെങ്കിലും അതോടെ ഇതിനെ കുറിച്ചുള്ള തുറന്ന സംസാരം നിർത്താൻ ഞങ്ങൾ തീരുമാനിച്ചു. പകരം കത്തെഴുതി വിവരങ്ങൾ കൈമാറാമെന്നും തീരുമാനമായി. വിപുലമായികൊണ്ടിരിക്കുന്ന പ്ലാനുകളെ കുറിച്ച് ക്ലാസ്സിലിരുന്ന് ഒരു ബെഞ്ച് പുറകിലിരിക്കുന്ന മഞ്ജുവിനും അടുത്ത ക്ലാസ്സിൽ ഉള്ള ബിജിതയ്ക്കും കത്തെഴുതി. പെട്ടെന്ന് ക്ലാസ്സിലേയ്ക്ക് ടീച്ചർ കയറി വന്നതുകൊണ്ട് മഞ്ജുവിനുള്ള കത്ത് അവൾക്ക് നേരിട്ട് കൊടുക്കാൻ കഴിഞ്ഞില്ല. അതുകൊണ്ട് തൊട്ട് പിന്നിലെ ബെഞ്ചിലെ സൗമ്യയുടെ കയ്യിൽ കൊടുത്തിട്ട് മഞ്ജുന് പാസ് ചെയ്യാൻ പറഞ്ഞു. ടീച്ചർ വന്ന തിരക്കിൽ ഞാൻ തിരിഞ്ഞിരിയ്ക്കുകയും ചെയ്തു. സൗമ്യ വളരെ കൃത്യമായി കത്ത് പാസ് ചെയ്തു.പക്ഷെ വിശദമായ ഒരു വായനയ്ക്ക് ശേഷമായിരുന്നു എന്ന് മാത്രം. അവിടുന്നാണ് കാര്യങ്ങൾ കൈവിട്ടുപോകാൻ തുടങ്ങിയതും ഇതിന്റെ തലക്കെട്ടിനു പിന്നിലെ അപൂർവ്വങ്ങളിൽ അപൂർവ്വങ്ങളായ സംഭവവികാസങ്ങൾ ഉരുത്തിത്തിരിയാൻ തുടങ്ങിയതും.....

ആ പീരീഡ് കഴിഞ്ഞതും സൗമ്യ എന്നെയും മഞ്ജുവിനേയും വിളിച്ച് ഗ്രൌണ്ടിൽ കൊണ്ട്പോയി.ആദ്യം ഇതൊക്കെ ടീച്ചറിനോട് പറയുമെന്ന് ഭീഷണി മുഴക്കി. ഞങ്ങൾ കരയുമെന്നായപ്പോ ടീച്ചറിനോട് പറയാതിരിയ്ക്കണമെങ്കിൽ അവളെ കൂടി കൊണ്ടുപോകണം എന്ന നിബന്ധന വെച്ചു. നിവർത്തി ഇല്ലാതെ ഞങ്ങൾക്ക് അത് സമ്മതിക്കേണ്ടി വന്നു. ഞങ്ങൾ ഒന്ന് ഹാപ്പി ആയ്ക്കോട്ടെ എന്ന് കരുതി ആകണം പോയി കഴിഞ്ഞാൽ എന്നും ഭക്ഷണമൊക്കെ സ്വയം ഉണ്ടാക്കാമെന്നും നീണ്ട മുടി ഉള്ള മഞ്ജുവിനെ എന്നും മുടി പിന്നിക്കെട്ടാൻ സഹായിക്കാമെന്നും ഉള്ള ഓഫർ സൗമ്യ വെച്ചത്. മറുപടി പറയാൻ സമയം കിട്ടുന്നതിനു മുൻപ് ബെല്ലടിച്ചു.

പോകാൻ തീരുമാനിച്ചത് 4 പേർ ആയിരുന്നെങ്കിലും അതുകൂടാതെ ഒരു അഞ്ചുപേരെങ്കിലും കൂട്ടത്തിൽ ചേർന്നു. പക്ഷെ കൂടെ വരാനല്ലെന്ന് മാത്രം . അവർക്കൊക്കെയും വരണമെന്ന് ആഗ്രഹമുള്ളവരാണ്, അതികഠിനമായ ‘ദു:ഖങ്ങൾ‘ ഉള്ളവരാണ്. പക്ഷെ യാത്രയിൽ പങ്കുചേരാൻ കഴിയാത്ത സാഹചര്യത്തിലാണ് എന്ന് മാത്രം. അതുകൊണ്ട് രക്ഷപെട്ട് പറക്കാൻ പോകുന്ന കിളികളുടെ ഓരം ചേർന്ന് നടന്നും നിർദ്ദേശങ്ങൾ തന്നും ആഗ്രഹം തീർക്കുന്നു. ചർച്ചകളൊക്കെ മുറുകി വന്നു. പക്ഷെ ഇതിനിടയിൽ അനീതിക്കെതിരെ ഞാൻ ഉയർത്തിയ പടവാൾ ആരും കാണാതെ ഉറയിലേയ്ക്ക് തിരികെ വെച്ചിരുന്നു. കാരണം മറ്റൊന്നുമല്ല ആ വെക്കേഷന് വീട്ടിൽ നിന്ന് പ്ലാൻ ചെയ്തിരിക്കുന്ന മൈസൂർ ട്രിപ്പ് തന്നെ. അനീതിയ്ക്കെതിരെ ഇപ്പോൾ പടവെട്ടണ്ട എന്നും അടുത്ത വെക്കേഷൻ കഴിഞ്ഞു വേണേൽ ആലോചിയ്ക്കാമെന്നുമുള്ളൊരു തണുപ്പൻ തീരുമാനം സൈലന്റായി ഞാനെടുത്തു. പക്ഷെ തയ്യാറാക്കിയ പദ്ധതി പ്രകാരം പോകേണ്ടുന്ന സ്ഥലത്തെ കുറിച്ചുള്ള അഭിപ്രായ സമന്വയവും പോയി കഴിഞ്ഞാൽ പുഴയോരത്തെ മണ്ണിൽ വെയ്ക്കുന്ന വീട്ടിലെ മുറികളുടെ എണ്ണത്തെ സംബന്ധിച്ച തർക്കവും ഒക്കെ ആയി ബാക്കി എല്ലാവരും അതിൽ തന്നെ മുഴുകി. ഞാൻ പ്രത്യക്ഷത്തിൽ ഇതിൽ ഒക്കെ സംബന്ധിക്കുന്നുണ്ടെങ്കിലും മനസ്സിൽ ഇതിൽ നിന്നെങ്ങനെ തലയൂരാമെന്ന കൂലങ്കഷമായ ആലോചനയിലും.
യാത്ര പുറപ്പെടാമെന്ന് പറഞ്ഞുറപ്പിച്ച ദിവസം വന്നെത്തി. പക്ഷെ അന്ന് പോകില്ലെന്ന് എനിക്ക് മാത്രമറിയാം. മറ്റാരോടും അത് പറയാൻ എനിക്ക് തോന്നിയില്ല. നടക്കാത്ത കാര്യത്തിനുവേണ്ടി നടത്തുന്ന ചർച്ചകളും കൂട്ടം കൂടലുകളുമൊക്കെ ഞാൻ നന്നായി ആസ്വദിച്ചു തുടങ്ങിയിരുന്നു. പതിവുപോലെ ഞാൻ രാവിലെ ക്ലാസിലെത്തി. ബിജിത എന്റെ കൂടെ ആണ് സ്കൂളിൽ വരുന്നത്. അവളും പ്രത്യേകിച്ച് തയ്യാറെടുപ്പൊന്നും ഇല്ലാതെ ആണ് വന്നിരിക്കുന്നത് എന്ന് രാവിലെ മനസ്സിലാക്കിയിരുന്നു. ഇനി അവളും വെക്കേഷന് വീട്ടിൽ നിന്ന് മൈസൂർ പോകുന്നുണ്ടോ എന്ന് ഞാൻ സംശയിക്കാതിരുന്നില്ല. മഞ്ജുവും എന്നത്തെയും പോലെ വന്നിരിക്കുന്നു. പക്ഷെ സൗമ്യ വന്നിരിക്കുന്നത് സകല തയ്യാറെടുപ്പോടും കൂടി ആയിരുന്നുവെന്നതിന് തെളിവ് അവളുടെ ബാഗിന്റെ വലിപ്പം തന്നെ ആയിരുന്നു.

ഞാനും മഞ്ജുവും മുഖാമുഖം നോക്കി. ഉച്ചയ്ക്കുള്ള ഇന്റർവെൽ സമയത്താണ് പോകാൻ തീരുമാനിച്ചിരിക്കുന്നത്. 2 പിരീഡ് കഴിഞ്ഞ് 10 മിനിറ്റ് ഇന്റെർവെൽ ആയി. സൗമ്യ എന്നെയും മഞ്ജുവിനെയും കൂട്ടി ബാഗുമെടുത്ത് ക്ലാസ്സിന്റെ മൂലയിൽ ചെന്ന് ബാഗ് തുറന്ന് കാണിച്ചു. ഒരു ജോഡി ഡ്രസ്സ്, 15 രൂപ, ടിഫിൻ ബോക്സ് നിറയെ അരി........ ഇതൊന്നും കൂടാതെ മറ്റൊരു പൊതി കൂടി.... തുറന്നപ്പോൾ 4 കൂട്ടം സാമ്പാർ കഷണങ്ങളും 3 ഉള്ളിയും. രണ്ട് തക്കാളി, രണ്ട് വെണ്ടക്ക, ഒരു വഴുതനങ്ങ, പിന്നെ ഒരു ക്യാരറ്റും. ഇതൊക്കെ എന്തിനെന്ന് ചോദിച്ചപ്പോൾ നിഷ്കളങ്കമായ ഉത്തരം “ അന്നു പറഞ്ഞില്ലേ ചോറും കറിയും ഞാൻ വെയ്ക്കാമെന്ന്. അതിനെടുത്തതാ” എന്ന്. ബെല്ലടിച്ചതും എനിക്ക് ആധി കയറിയതും ഒരുമിച്ചായിരുന്നു. ദൈവമേ....ഇനി എന്തു ചെയ്യും ??? !!!!!

ഇതിനുള്ള പോം‌വഴി ആലോചിച്ച് തലപുകഞ്ഞ് 2 പിരീഡുകൾ കഴിഞ്ഞുപോയതറിഞ്ഞില്ല. ഉച്ചയ്ക്ക്ക് ഇന്റർവെല്ലിനുള്ള ബെല്ലടിച്ചു. എല്ലാവരും ഭക്ഷണം കഴിക്കാൻ ഇറങ്ങി. ബിജിത പതുങ്ങി പതുങ്ങി ക്ലാസ്സിലേയ്ക്ക് വന്നു. ഞാനും മഞ്ജുവും സൗമ്യയും ബിജിതയ്ക്കൊപ്പം ഇറങ്ങി. സൗമ്യയുടെ കയ്യിൽ മാത്രം ബാഗുണ്ട്. സ്കൂളിന്റെ മെയിൻ ഗേറ്റ് എത്തിയതും സൗമ്യ ആ പതിനഞ്ചു രൂപ എന്നെ ഏൽ‌പ്പിച്ചു. അതുകണ്ടതും ബിജിത കരയാൻ തുടങ്ങി. പോകാൻ ഇഷ്ടമില്ലേ എന്ന് പ്രതീക്ഷയോടെ ഞാൻ ചോദിച്ചു, പക്ഷെ മറുപടി നിരാശാജനകം ആയിരുന്നു...”ചുമ്മാ സങ്കടം വന്നതാ” എന്ന്. ഞങ്ങൾ നാലു പേരുടെ പിന്നിലായി യാത്രയിൽ ഞങ്ങൾക്കൊപ്പം വരാൻ കഴിയാത്ത ഹതഭാഗ്യരുടെ ഒരു നിരയും ഉണ്ടായിരുന്നു. കുറച്ച് ദൂരം വരെ കൂടെ നടന്ന ശേഷം ഞങ്ങളെ യാത്ര അയയ്ക്കാനും മംഗളം നേരാനും കണ്ണിൽ നിന്ന് ഞങ്ങൾ നടന്ന് മറയും വരെ നോക്കി നിൽക്കാനും വന്നവർ.

കുറച്ച് നടന്നപ്പോൾ ഹിന്ദി പഠിപ്പിക്കുന്ന ശാന്തകുമാരി ടീച്ചർ ദൂരെ നിന്ന് നടന്നു വരുന്നത് കണ്ടു. ഇനി ഇതിലും നല്ല ഒരു അവസരം കിട്ടില്ലെന്നറിയാമായിരുന്ന ഞാൻ എല്ലാരോടും ടീച്ചർ ഞങ്ങളെ കണ്ടെന്ന് തോന്നുന്നുവെന്നും തിരിച്ച് സ്കൂളിലേയ്ക്ക് പോകുന്നതാണ് നല്ലതെന്നും പറഞ്ഞു. കുറച്ചൊന്നു സംശയിച്ചു നിന്നശേഷം ആദ്യം സൗമ്യ തിരിഞ്ഞോടി. പിന്നാലെ ഞങ്ങൾ മൂന്നുപേരും. ഞങ്ങൾ നാലു പേരും തിരിഞ്ഞോടുന്നത് കണ്ട് യാത്ര അയയ്ക്കാൻ വന്നവരും പുറകെ ഓടി. ഓടിക്കിതച്ച് ക്ലാസ്സിൽ കയറി ഒന്നും അറിയാത്തത് പോലെ ഇരുന്നു. ക്ലാസ്സ് ലീഡർ ആയിരുന്ന ഞാൻ ബെല്ലടിക്കുന്നതിനു മുൻപ് സ്റ്റാഫ് റൂമിൽ ചോക്കെടുക്കാൻ പോയി തിരിച്ചു വന്നത് പുതിയ ഒരു കഥയുമായിട്ടാ‍യിരുന്നു. ശാന്തകുമാരി ടീച്ചർ ചോദ്യം ചെയ്തുവെന്നും എന്തൊക്കെയോ പറഞ്ഞ് കഷ്ടി രക്ഷപെട്ടുവെന്നും ഇനി ഉടനെ ഒരു പോക്ക് അസാധ്യമാണെന്നും എല്ലാത്തിനേം പറഞ്ഞ് വിശ്വസിപ്പിച്ചു. സൗമ്യയ്ക്ക് പതിനഞ്ചുരൂപ തിരികെ കൊടുത്ത് തൽക്കാലം പ്ലാൻ മാറ്റി വെയ്ക്കാമെന്ന് പറഞ്ഞ് ആശ്വസിപ്പിച്ചു. ശേഷം അതുവരെ ഇല്ലാതിരുന്ന ശ്രദ്ധയോടെ പിന്നെ ഉള്ള ക്ലാസ്സുകളിലിരുന്ന് വൈകുന്നേരം ബിജിതയ്ക്കൊപ്പം വീട്ടിലേയ്ക്ക് മടങ്ങി.

പിറ്റേന്ന് രാവിലെ ക്ലാസ്സിലെത്തുമ്പോൾ പാടേ തകർന്നുപോയ ഒരു പദ്ധതിയുടെ അവശിഷ്ടങ്ങൾ പോലെ ക്ലാസ്സിൽ ചിതറിക്കിടന്നുണ്ടായിരുന്നു.... അനീതിയ്ക്കെതിരെ പോരാടുവാൻ നാടുവിട്ട് ഓടിയ നാലു പോരാളികൾക്ക് ഭക്ഷണമാകേണ്ടിയിരുന്ന നാലുകൂട്ടം സാമ്പാറിന്റെ കഷണങ്ങൾ...

വാൽക്കഷണം അഥവാ സാമ്പാർ കഷണം: അന്നത്തെ നാടുവിടൽ പദ്ധതിയിലെ പങ്കാളികളായ നാൽ‌വർ സംഘത്തിലെ 'മാസ്റ്റർ ബ്രെയ്ൻ' ആയിരുന്ന ഞാൻ ഇന്ന് ദുഫായിയിൽ ഇരുന്ന് പ്ലസ്സും ചാറ്റും ബ്ലോഗും ഒക്കെ ആയി പടപൊരുതുന്നു. ബിജിത മൂന്നാമത്തെ കൊച്ചിനെ പെറ്റു കിടന്ന് ജനസംഖ്യാ നിയന്ത്രണത്തോട് പടവെട്ടുന്നു. ബാക്കി 2 പോരാളികൾ ലോകത്തിന്റെ ഏതെങ്കിലും ഒരു കോണിൽ എന്തിനോടെങ്കിലും പടപൊരുതി സസുഖം ജീവിക്കുന്നുണ്ടെന്ന് കരുതാം.

അന്നത്തെ എന്റെ 'ആജന്മ ശത്രു' വർഷങ്ങൾ കഴിഞ്ഞപ്പോൾ അടുത്ത കൂട്ടുകാരനായി മാറി. അന്നത്തെ യുദ്ധങ്ങളൊക്കെയും കൗമാരത്തിലെത്തിയപ്പോൾ സന്ധിയായി. ഇന്ന് ഒരു ഭർത്താവിന്റെയും അച്ഛന്റെയും ഒക്കെ റോളുകൾ കൈകാര്യം ചെയ്ത് സസുഖം ജീവിയ്ക്കുന്നു... ഇടയ്ക്കിടെ കടലിനക്കരെ നിന്നു വരുന്ന ഫോൺ വിളികളിൽ ഒരുപാട് സ്നേഹം പകർന്നുതരുന്നു.....
--------------------------- ശുഭം ------------------------

കുഴിമാടങ്ങൾ പറഞ്ഞത്

2011-08-23T11:14:00.006+04:00

അറിഞ്ഞിരുന്നുവോ നീ....
കാലമിത്രയും കാത്തിരുന്നതൊക്കെയും
നിന്റെ കാലടിമണ്ണിന്നടിയിലാണുറങ്ങുന്നതെന്ന്?

കേട്ടിരുന്നുവോ നീ.....
നിന്റെ കാതുകളെ ലക്ഷ്യമാക്കിയ നിലവിളികൾ
മഞ്ഞിൽകുതിർന്ന മണ്ണിൽ കിതച്ചുവീണത്?

കണ്ടിരുന്നുവോ നീ....
മരിച്ചു വിറങ്ങലിച്ച എന്റെ നെഞ്ചിടുക്കിനുള്ളിൽ
നിനക്കായെന്നോ മിടിച്ചിരുന്ന ഹൃദയം

ഇല്ലെന്നെനിയ്ക്കറിയാം...
അറിവുകളുമടയാളങ്ങളും മായ്ച്ചെന്നെ അജ്ഞാതനാക്കി
മരിച്ചതിനുശേഷം തീവ്രവാദിയും.

ചത്തവളുടെ കാഴ്ച

2011-06-02T12:59:00.004+04:00

ചൂണ്ടയിൽ കൊരുത്തിട്ട വാചാലതയിൽ
കൊത്തിവലിയ്ക്കുന്ന നേരത്ത്
കൂർത്തുവളഞ്ഞ കാമത്തിന്റെ മൂർച്ചയെ
കാണാതെപോയത്
മോഹങ്ങൾ കാഴ്ചയെ ചതിച്ചതുകൊണ്ടാകും

ശേഷം ജീവനതിൽ കുരുങ്ങിപിടയുമ്പോഴും
വഞ്ചനകോർത്ത നൂലിന്റെയറ്റത്ത്
സ്നേഹം രുചിയ്ക്കാനൊരു നാവും
വിരഹം വിശപ്പായ വയറും
കാണുമെന്ന് അവൾ ആശ്വസിച്ചുകാണും

ചൂണ്ടയിൽ പ്രണയം കൊരുത്തവന്റെ
തൃപ്തിയുടെ ആവേശം കാണാനാവും
നാവുമുറിഞ്ഞ്; ജീവനറ്റ് ചീർത്തുകിടക്കുമ്പോഴും
സ്വപ്നങ്ങൾ ഒളിപ്പിച്ച കണ്ണുകൾ
തുറന്നുതന്നെ പിടിച്ചിരിയ്ക്കുന്നത്

നട്ടെല്ല്

2011-05-26T14:49:00.002+04:00

പ്രണയമെന്ന വാക്കിന്റെ
കേൾവിക്കൊടുവിലായ്
തികട്ടിവരുന്ന പുളിച്ച
ഓർമ്മകൾക്കൊടുക്കം
നിനക്കില്ലാതെപോയ
നട്ടെല്ലിന്റെ സ്ഥാനം നോക്കി
നീട്ടിത്തുപ്പാറുണ്ടിപ്പോഴും

വെറുപ്പിന്റെ കയ്പ്പുനീരെങ്കിലു-
മതിന്റെ നനവിറങ്ങി
മുളപൊട്ടിയൊരെല്ലിൻ തുമ്പ്
വളരാൻ തുടങ്ങിയെങ്കിൽ
നിന്റെ നിഴലാകുന്നവളെങ്കിലും
കണ്ണീരിൽ പുതയില്ലെന്ന്
വെറുതെ മനക്കോട്ട കെട്ടാൻ..

രണ്ടു ലോകങ്ങൾ

2011-05-11T15:19:00.004+04:00

അക്ഷരങ്ങളുടെ ലോകം
സ്വാതന്ത്ര്യത്തിന്റേതാണ്
മോഹങ്ങളും നിരാശകളും
ഇഷ്ടങ്ങളുമനിഷ്ടങ്ങളും
തീരുമാനങ്ങളും തീർച്ചകളും
എന്റേതുമാത്രമാണ്
ഇവിടെ ദൈവം ഞാനാ‍ണ്

അതിനുമപ്പുറത്തെ ലോകം
കണക്കുകളുടേതാണ്
വരവും ചെലവും കടങ്ങളും
നിരത്തിവെക്കുന്ന കണക്കുകൾ
അവിടെയൊന്നുമെന്റേതല്ല
ഇല്ലായ്മയുടെ ‘മൈനസ്‘-ൽ
മനം മടുക്കുമ്പോൾ
ഞാൻ ദൈവത്തെ വിളിയ്ക്കും

പക്ഷെ; കഴിഞ്ഞ പകലിൽ
കണ്ണാടിയിൽ നോക്കി തിരിച്ചറിയാനാവാതെ
നിന്നപ്പോഴാണറിയുന്നത്
ഞാനെവിടെയോ എന്നെ മറന്നുവെച്ചെന്ന്
ഒരിടത്തു ദൈവമായും
മറ്റൊരിടത്ത് സൃഷ്ടിയായും
മാറുന്നതിനിടയിലെവിടെയോ
നഷ്ടമായിപ്പോയതാവും
ഞാനെന്ന എന്നെ.

ഒരിക്കൽ തിരികെക്കിട്ടുകതന്നെ ചെയ്യും
പക്ഷെ;സ്വയം തേടിയുള്ള
യാത്രയവസാനിക്കുന്നിടത്ത്
വെളുത്ത ഭാണ്ഡക്കെട്ടായുപേക്ഷിക്കപ്പെടുക
ദൈവമോ അതോ സൃഷ്ടിയോ???

പടയോട്ടം

2011-05-08T11:39:00.003+04:00

ഓർമ്മകളിൽ വിഷാദം പൂവിടുമ്പോൾ
കുഴിച്ചിട്ട ചില മരവിപ്പുകൾക്കുമേലെ
അമർഷത്തിന്റെ തീനിറം പടരും

ഒരോ തവണയും വൈരാഗ്യത്തിന്റെ
കൊടുമുടി കയറിയിറങ്ങും
പൊള്ളിയടർന്ന മനസ്സ്

പ്രതികാരത്തിന്റെ വിത്തുപൊട്ടി
ചെടിയായി മരമായി വേരാഴ്ത്തി
ശാഖകളിലായുധമേന്തും

അടുത്ത നിമിഷത്തിൽ
അവരോഹണത്തിലൊരു വിത്തായി
മനസ്സിൽ വീണ്ടും മണ്ണുപുതയ്ക്കും

വാക്കുകൾകൊണ്ട് കണക്കുതീർത്തും
നേട്ടങ്ങൾ കൊണ്ട് കണിയൊരുക്കിയും
ഭൂതകാലത്തിലേയ്ക്ക് ചിന്തകൊണ്ടൊരു-
തേരോട്ടം നടത്താറുണ്ടിടയ്ക്ക്

അല്ലെങ്കിലൊരുപക്ഷെ;

ഓർമ്മകൾ മഴയായ് പെയ്യുമ്പോൾ
മറവിയുടെ കുട പിടിക്കുന്ന;
മനസ്സിനെ മൌനം പുതപ്പിച്ചുറക്കുന്ന
പരാജിതരിൽ ഒരുവളാകും ഞാനും

ചില വീട്ടാക്കടങ്ങൾ (പ്രസിദ്ധീകരിച്ചത്)

2011-04-10T14:48:00.003+04:00

തിരുത്തലുകൾ

2011-03-23T11:46:00.021+04:00

മൌനത്തിന്റെ കനത്ത ചങ്ങലയാൽ താൻ ബന്ധിതയായിട്ട് ഒരുദിവസമെങ്കിലുമായിക്കാണുമെന്ന് സ്വാതി ഓർത്തു. ഒരു വാക്കായോ ചിരിയായോ ആരുടേയും സ്വരങ്ങളവളെ തേടിച്ചെന്നില്ല. കണ്ണുകളൂം കാതുകളും കൊട്ടിയടയ്ക്കപ്പെട്ടിരിയ്ക്കുന്നു എന്നതാണ് സത്യം. ഇന്നലെ മുതൽ ബുദ്ധിയും മനസ്സും ജിതന്റെ ആ ചോദ്യത്തിനു പിന്നാലെയാണ്. ഒരുത്തരം തേടുമ്പോൾ അനേകായിരം ചോദ്യങ്ങൾ കൊമ്പുകുലുക്കി മുന്നിൽ വന്നു നിൽക്കുന്ന നിമിഷം വീണ്ടുമവൾ പിന്നോട്ട് നടക്കുന്നു. വീണ്ടും ഉത്തരങ്ങൾ തേടി മനസ്സിനെ കടിഞ്ഞാണില്ലാതെ പായാൻ വിടുന്നു. മണിക്കൂറുകൾ പൊഴിഞ്ഞു വീഴുന്നതറിയാതെ ചിന്തകളുടെ കുത്തൊഴുക്കിലേയ്ക്ക് കൂപ്പുകുത്തുന്നു.

ജിതന്റെ ജീവിതത്തിലെ രണ്ടുപേരിൽ ഒരാളാകാനുള്ള ക്ഷണമാണ് വന്നിരിയ്ക്കുന്നത്. പ്രണയവും ജീവിതവും പങ്കിട്ടെടുക്കുന്നവരിലൊരാൾ. ഒറ്റവാക്കിൽ ഇല്ലെന്ന് പറഞ്ഞു നടക്കാനൊരുങ്ങുമ്പോഴൊക്കെ പ്രണയത്തിന്റെ കാണാവള്ളികൾ സ്വാതിയുടെ കാലുകളിൽ ചുറ്റിപ്പിണയുന്നു. വരിഞ്ഞുമുറുക്കി കൊല്ലുമെന്നുറപ്പുള്ള ഒരു വളർച്ച നൊടിയിടയിൽ ആ വള്ളികൾക്കുണ്ടാകുമെന്ന സത്യം നിഷേധിയ്ക്കാനാവാത്തിടത്ത് അവൾ വീണ്ടും നിശ്ചലയാവുന്നു. പക്ഷെ ആ ക്ഷണം സ്വീകരിയ്ക്കാമെന്ന് വെച്ചാൽ വീണ്ടും ചോദ്യങ്ങളവളെ പിടിമുറുക്കുന്നു. പകുത്തെടുത്ത ദിവസങ്ങളിൽ മാത്രം കിട്ടുന്ന പ്രണയത്തിൽ തന്റെ മനസ്സ് തൃപ്തയാവില്ലെന്നവൾക്ക് നന്നായി തന്നെ അറിയാം. ജീവിതത്തിൽ എന്തു തന്നെ പങ്കിട്ടാലും അതിനാവാത്ത ചിലതുണ്ടല്ലോ. അതിലൊന്നല്ലേ പ്രണയം. സ്വാർത്ഥമല്ലാത്ത, സ്വന്തമാക്കലുകളില്ലാത്ത പ്രണയങ്ങളെക്കുറിച്ച് വായിച്ചപ്പോഴൊക്കെ അതെങ്ങിനെയാണെന്നവൾ അത്ഭുതപ്പെട്ടിട്ടേയുള്ളു. അതിനിയെങ്ങനെയായാലും അനുവദിയ്ക്കപ്പെട്ട സമയത്തേയ്ക്ക് മാത്രം അതിർത്തിവരച്ചിടാനാവുന്നതല്ല തന്റെ പ്രണയമെന്നവൾക്ക് നന്നായറിയാം. പ്രണയത്തിന്റെ ശാരീരികവും മാനസികവുമായ തലങ്ങളിലൊക്കെയും ഒരു പങ്കുവെയ്പ്പ്; ഇല്ല ആ ചിന്തകൾ പോലും ആത്മാവിന്റെ ചുട്ടുപൊള്ളിയ്ക്കുന്നതായി അവൾക്ക് തോന്നി.

നാളെ ജിതൻ വിളിയ്ക്കും. ഒരു പങ്കുകച്ചവടത്തിന് തയ്യാറല്ലെന്ന മറുപടി അയാളിൽ എന്ത് പ്രതികരണമുണ്ടാക്കുമെന്നവളാലോചിച്ചു നോക്കി. പൂർണ്ണമായും തന്റേതായിക്കൂടേ എന്ന് ഒരു പെണ്ണിന്റെ സ്വാർത്ഥത മുഴുവനായി തുറന്നുകാണിച്ച് അവനോട് ചോദിച്ചപ്പോൾ കുടുംബബന്ധങ്ങളുടെ അകലാൻ പോകുന്ന കണ്ണികളെ ഭയമാണെന്നായിരുന്നു മറുപടി. അതുകൊണ്ടാണുപോലും വീട്ടുകാർ നിശ്ചയിച്ച പെൺകുട്ടിയെ വിവാഹം കഴിയ്ക്കാൻ സമ്മതം മൂളേണ്ടി വന്നത്. അവന് ന്യായങ്ങളൊരുപാട് നിരത്താനുണ്ടായിരുന്നു. അച്ഛന്റെ പിടിവാശി, അമ്മയുടെ ഹൃദ്രോഗം, കല്യാണപ്രായമായി വരുന്ന അനിയത്തി അങ്ങനെ പലതും. പക്ഷെ ഇതൊക്കെയും പ്രണയം തുടങ്ങിയകാലത്തുമുണ്ടായിരുന്നതല്ലേ എന്ന് തിരിച്ചു ചോദിയ്ക്കാനവൾ ആഞ്ഞതാണ്. പക്ഷെ ആ വിവാഹം നടക്കുന്നതിന് മുൻപ് തന്നെ ഭാര്യയായി സ്വീകരിയ്ക്കാൻ തയ്യാറാണെന്നവൻ പറഞ്ഞപ്പോൾ ഒരു നിമിഷനേരത്തേയ്ക്ക് അവളൊന്ന് ആശയക്കുഴപ്പത്തിലായി. പക്ഷെ തൊട്ടടുത്ത നിമിഷം ജിതൻ അത് തീർത്തുകൊടുക്കുകയും ചെയ്തു. വീട്ടുകാർ നിശ്ചയിച്ച വിവാഹം നടന്നതിന് ശേഷം മാത്രമേ മൂന്നാമതൊരാൾ ഇതറിയാൻ പാടുള്ളു എന്നവൻ പറഞ്ഞപ്പോൾ കേട്ടതൊന്നും വിശ്വസിയ്ക്കാനാവാതെ സ്വയം മറന്നവൾ നിന്നുപോയി. നാട്ടിൽ പോയി വിവാഹം കഴിച്ചാലും ഒരിക്കലും ആ പെൺകുട്ടിയെ ഈ നഗരത്തിലേയ്ക്ക് കൊണ്ടുവരില്ലെന്നും വർഷത്തിലൊരിയ്ക്കൽ കിട്ടുന്ന അവധിക്കാലത്ത് മാത്രമേ ജിതനെ വിട്ടുകൊടുക്കേണ്ടി വരികയുള്ളുവെന്നുമൊക്കെ തന്നോട് ആശ്വാസരൂപേണ പറഞ്ഞത് ഒരു ഭ്രാന്തന്റെ അർത്ഥശൂന്യമായ പുലമ്പലുകളെന്നപോലെ സ്വാതി കേട്ടുനിന്നു. സ്വയം മറന്നിത്ര നാളും സ്നേഹിച്ചതിന്റെ നന്ദിയാവണം ആദ്യം അവളെ തന്നെ വിവാഹം കഴിയ്ക്കാമെന്ന തീരുമാനത്തിലെത്താൻ ജിതനെ പ്രേരിപ്പിച്ചത്. ഇതുവരെ നേരിൽ കാണാത്ത ഒരു പെൺകുട്ടിയോടൊത്തുള്ള ജീവിതത്തിനുവേണ്ടി തന്നോട് വിലപേശുകയാണവൻ ചെയ്യുന്നതെന്ന് സ്വാതിയ്ക്കു തോന്നി.യാത്രപറയാതെയവൾ നടന്നകന്നത് തികച്ചും ശൂന്യമായ ഒരു മനസ്സോടെയായിരുന്നു.

താൻ ജിതനെ ആണ് സ്നേഹിച്ചത്; തിരിച്ചൊരു സ്നേഹം തന്നോടില്ലായിരുന്നുവെന്ന് സ്വയം വിശ്വസിയ്ക്കാനും അതേ സമയം അവിശ്വസിയ്ക്കുവാനും ശ്രമിയ്ക്കുകയായിരുന്നു അവളിത്രനേരവും. ഏതെങ്കിലുമൊന്നിൽ മനസ്സുറയ്ക്കാതെ ഒരു തീരുമാനമെടുക്കാനാവില്ലെന്ന് സ്വാതിയ്ക്ക് തോന്നി. ജിതനില്ലാതെയാവുമ്പോൾ തന്റെ ജീവിതത്തിലുണ്ടായേക്കാവുന്ന ശൂന്യത അവളെ വല്ലാതെ ഭയപ്പെടുത്തി. വിട്ടുകൊടുക്കാൻ കഴിയാത്തവിധത്തിൽ ഒരു സ്വാർത്ഥത അവന്റെ കാര്യത്തിലുണ്ടെന്ന സത്യം നിഷേധിയ്ക്കാൻ അവൾക്കാകുമായിരുന്നില്ല. പക്ഷെ പങ്കിട്ടെടുക്കാൻ ശ്രമിച്ചാൽ നഷ്ടങ്ങളില്ല, എന്നാൽ നേട്ടങ്ങളുമില്ലെന്നത് അവളെ കൂടുതൽ ആശയക്കുഴപ്പത്തിലാക്കികൊണ്ടിരുന്നു. ഇതൊരു കുരുക്കാണ്. കഴുത്തിൽ മുറുക്കി ഞെരമ്പുകളെ വരിഞ്ഞുപൊട്ടിച്ച് ജീവനെടുക്കാൻ പോന്ന ഭ്രാന്തമായൊരു കുരുക്ക്.

മൊബൈൽ ഫോണെടുത്ത് ജിതനെ വിളിയ്ക്കുമ്പോൾ ഹൃദയം നെഞ്ചിൻ‌കൂട് തുറന്ന് പുറത്ത് ചാടുമെന്ന് സ്വാതിയ്ക്ക് തോന്നി. സ്വന്തം മനസ്സും ബുദ്ധിയും തമ്മിൽ കഴിഞ്ഞ കുറേ മണിക്കൂറുകളായി നടന്നുവന്ന യുദ്ധത്തിന്റെ ഫലമായി ശരീരം ഒരു ശ്മശാനമായി മാറിക്കഴിഞ്ഞെന്നവൾക്ക് ബോധ്യമായത് നാവ് പോലും മരവിച്ചിരിയ്ക്കുന്നു എന്ന തിരിച്ചറിവിലാണ്. ജിതൻ പലവട്ടം ഹലോ പറഞ്ഞതിന് ശേഷമാണ് അവൾക്ക് സംസാരിയ്ക്കാനായത് തന്നെ. വൈകിട്ട് നേരിൽ കാണണമെന്നും സംസാരിയ്ക്കാനുണ്ടെന്നും പറഞ്ഞ് ആ സംഭാഷണമവസാനിപ്പിച്ചപ്പോൾ സ്വാതി സ്വയമൊന്ന് ആലോചിച്ചുനോക്കി എന്താണ് തന്റെ തീരുമാനമെന്ന്. ഇല്ല; ഇതുവരെ ഒന്നും തീരുമാനിയ്ക്കാൻ കഴിഞ്ഞിട്ടില്ല, ആദ്യം നേരിൽ കാണട്ടെ; എന്നിട്ടാകാം. അങ്ങനെ മനസ്സിലുറപ്പിച്ചിട്ടാണ് അവൾ മൌനത്തിന്റെ കൂടുപൊട്ടിച്ചിറങ്ങിയത്.

താഴത്തെ നിലയിൽ ചെന്നപ്പോൾ ആരുമില്ല. എല്ലാവരും ജോലിയ്ക്ക് പോയിരിയ്ക്കുന്നു. അടുക്കളയിൽ ശ്രീദേവിയമ്മ മാത്രമുണ്ട്.അവൾ ചെന്നത് അവരറിഞ്ഞിട്ടില്ല. തിരക്കിട്ട പാചകത്തിലാണ്. പ്രണയിച്ചവന്റെ കൂടെ നാടുവിട്ടുവന്ന സ്ത്രീയാണ്. ഒടുവിൽ രണ്ട് കുട്ടികളായപ്പോൾ അയാൾ അവരെ തനിച്ചാക്കി മറ്റൊരു സ്ത്രീയോടൊപ്പം പോയി. കുട്ടികളെ നാട്ടിൽ വിട്ട് ഈ നഗരത്തിന്റെ ഭാഗമായത് സ്വന്തം കാലിൽ ജീവിയ്ക്കാനും, കുട്ടികളെ പഠിപ്പിച്ച് അവരുടെ ജീവിതം കരുപ്പിടിപ്പിക്കാനും വേണ്ടിയായിരുന്നു. ഒടുവിൽ കുട്ടികളും അവരുടെ വഴിതേടിപ്പറന്നപ്പോൾ ശ്രീദേവിയമ്മ ഇവിടെ തന്നെ ഒതുങ്ങി. ഈ നഗരത്തിലേയ്ക്ക് പറന്നെത്തുന്ന കുറെ പെൺമക്കൾക്ക് വെച്ചുവിളമ്പാൻ; അവർക്കമ്മയാകാൻ. ഒരിക്കലും ഇതിനെ ഹോസ്റ്റലെന്ന് വിളിയ്ക്കാൻ കഴിയാത്തതും ശ്രീദേവിയമ്മയുടെ സാന്നിധ്യം ഒന്നുകൊണ്ടുമാത്രമാണെന്ന് സ്വാതി ഓർത്തു. ഒരർത്ഥത്തിൽ ഇത് അന്യനാട്ടിലെ വീടുതന്നെയാണ്. കാത്തിരിയ്ക്കാൻ അമ്മയുള്ള സ്ഥലം വീടല്ലാതെ മറ്റെന്താണ്!

ഒന്നും പറയാതെ സ്വാതി തിരികെ നടന്നു. സംസാരിയ്ക്കാൻ നിന്നാൽ ഇന്നലെ രാത്രിഭക്ഷണത്തിനും ഇന്നത്തെ പ്രാതലിനുമൊന്നും കാണാതിരുന്നതിന്റെ കാരണമന്വേഷിയ്ക്കും. പോയതുപോലെ തന്നെ തിരികെ മുറിയിലെത്തി. മായയുടെ കട്ടിലൊഴിഞ്ഞുകിടക്കുന്നു. അച്ഛനു സുഖമില്ലെന്നറിഞ്ഞ് നാട്ടിലേയ്ക്ക് പോയിട്ട് ഒരാഴ്ച കഴിഞ്ഞിട്ടും ഇതുവരെ ഒന്ന് വിളിച്ചന്വേഷിയ്ക്കുകപോലും ചെയ്തില്ലല്ലോ എന്ന് കുറ്റബോധത്തോടെ അവളോർത്തു. മായ കൂടെ ഉണ്ടായിരുന്നെങ്കിൽ താനിത്രയ്ക്ക് അശക്തയാകുമായിരുന്നില്ലെന്ന് സ്വാതിയ്ക്ക് തോന്നി. മായ കുറച്ചുകൂടി ബോൾഡാണ്. എല്ലാത്തിനോടും വളരെ പ്രായോഗികമായ സമീപനം. ഒരുപക്ഷെ അവളകപ്പെട്ടിരിയ്ക്കുന്ന പത്മവ്യൂഹത്തെക്കുറിച്ച് മായയെ വിളിച്ചുപറഞ്ഞാൽ ആദ്യത്തെ പ്രതികരണം ഒരു ചിരിയായിരിക്കും. പ്രണയമെന്നത് കാലഹരണപ്പെട്ട ഒരു വികാരമാണെന്നാണ് അവളെപ്പോഴും പറയാറുള്ളത്. മായയ്ക്കെന്നും തന്റെ പ്രണയത്തെക്കുറിച്ച് പരിഹസിയ്ക്കാനേ നേരമുണ്ടായിരുന്നുള്ളു എന്നോർത്തപ്പോൾ ഒന്നും ആരോടും പറയേണ്ടെന്ന് അവൾ തീരുമാനിച്ചു.

ജിതൻ പതിവില്ലാതെ നേരത്തെ എത്തിയിരിയ്ക്കുന്നുവെന്ന് സ്വാതി തെല്ലത്ഭുതത്തോടെ ഓർത്തു. അലസമായ വസ്ത്രധാരണവും തളർന്ന കണ്ണുകളും അവൻ അനുഭവിയ്ക്കുന്ന മാനസിക സംഘർഷം വെളിപ്പെടുത്തുന്നുണ്ടായിരുന്നു. ഒന്നും സംഭവിയ്ക്കാത്തതുപോലെ എന്തെല്ലാമോ പറയാൻ അവൾ ശ്രമിച്ചുനോക്കി. എന്നിട്ടും തികച്ചും അപ്രതീക്ഷിതമായൊരു നിമിഷത്തിൽ അവനുനേരെ ഒരു ചോദ്യമെറിഞ്ഞ് കലുഷിതമായൊരു ലോകത്തിന്റെ വാതിലവൾ തന്നെ തുറന്നു. “എനിയ്ക്കീ വിവാഹത്തിന് സമ്മതമല്ലെങ്കിൽ എന്താകും ജിതന്റെ തീരുമാനം?”. തീരെ പ്രതീക്ഷിയ്ക്കാത്ത എന്തോ ഒന്ന് കേട്ടതുപോലെ അവനൊന്ന് പകച്ചെങ്കിലും ‘അതിനെക്കുറിച്ചാലോചിക്കണമെന്ന് തോന്നിയിട്ടില്ല’ എന്ന് അലക്ഷ്യമായി പറഞ്ഞ് ചായക്കപ്പിലേയ്ക്ക് മിഴിനട്ടിരിയ്ക്കുക മാത്രം ചെയ്തു. തന്നിൽ നിന്ന് പോസിറ്റീവായ ഒരു മറുപടി ജിതൻ പ്രതീക്ഷിയ്ക്കുന്നുണ്ടെന്നവൾക്കുറപ്പായി. “മറക്കണം” എന്ന് ഒറ്റവാക്കിൽ പറഞ്ഞവസാനിപ്പിക്കാതെ രണ്ടാളെയും സ്വീകരിക്കണമെന്ന് തീരുമാനിച്ചത് എന്തിനാണെന്ന് ചോദിച്ചപ്പോൾ ‘മറക്കാൻ കഴിയാത്തതുകൊണ്ടുതന്നെ’ എന്ന് പറഞ്ഞത് കേട്ട് വരണ്ട മണ്ണിൽ ഒരു മഴത്തുള്ളി പതിഞ്ഞതുപോലെ തോന്നി സ്വാതിയ്ക്ക്. പക്ഷെ തന്റെ മനസ്സിൽ ഒരായിരം ചോദ്യങ്ങൾ തീർത്ത ഊഷരതയെ ഇല്ലാതാക്കാൻ മാത്രം കെല്പില്ല ആ മഴത്തുള്ളിയ്ക്കെന്ന് അവൾക്കുറപ്പായിരുന്നു

മറ്റൊരുവൾക്കുവേണ്ടി ജിതനെ വിട്ടുകൊടുക്കേണ്ടി വരുന്ന അവധിക്കാലങ്ങളിൽ സ്വയം പങ്കുവെച്ചുകൊടുക്കാൻ ഒരു കൂട്ട് തനിയ്ക്കുമുണ്ടാകുന്നതിൽ തെറ്റെന്തെങ്കിലുമുണ്ടോ എന്ന ചോദ്യമവൾ ചോദിച്ചത് അവന്റെ കണ്ണിൽ തന്നെ നോക്കിയായിരുന്നു. നിവൃത്തികേടിന്റെ നിസ്സഹായാവസ്ഥ അവനുമൊന്നറിയാൻ വേണ്ടി മാത്രമായിരുന്നു അവളാ ചോദ്യമെറിഞ്ഞത്. ഇരച്ചുവന്ന കോപത്തിൽ ജിതന്റെ മുഖം രക്തവർണ്ണമായി. അതുകണ്ടപ്പോൾ സ്വാതിയ്ക്ക് ചിരിയാണ് വന്നത്. അവനവന് കഴിയാത്തത് മറ്റൊരാളിൽ അടിച്ചേൽ‌പ്പിക്കാൻ ശ്രമിയ്ക്കരുതെന്ന് പറഞ്ഞ് തിരികെ നടക്കാനൊരുങ്ങുമ്പോൾ ജിതൻ എന്തോ ചോദിയ്ക്കാൻ വന്നതുപോലെ അവൾക്ക് തോന്നി. പക്ഷെ വാക്കുകളൊന്നും പുറത്തേയ്ക്ക് വന്നില്ലെന്ന് മാത്രം. ജിതന്റെ ചിന്തകൾ ശബ്ദമെടുക്കുംമുൻപ് സ്വാതി തിരിഞ്ഞുനടക്കാൻ തുടങ്ങി. അവൾക്കറിയാമായിരുന്നു അവന് പറയാനുള്ളതൊക്കെയും തന്നെ ദുർബലയാക്കുമെന്ന്. ബസ്സിലിരുന്ന് മൊബൈൽ ഫോൺ സിം ഊരിയെറിയുമ്പോൾ ആത്മാവ് വിട്ടുപിരിയുമ്പോൾ ശരീരം പിടയുന്നതുപോലെ പോലെ അവളുടെ ഹൃദയം നൊന്തുപിടഞ്ഞു. രണ്ടുവർഷത്തെ സ്വപ്നങ്ങളും പ്രതീക്ഷകളും വികാരങ്ങളും പങ്കുവെച്ചിരുന്ന കിളിവാതിലിന്റെ താക്കോലാണ് വലിച്ചെറിഞ്ഞത്. നിറഞ്ഞുവരുന്ന കണ്ണുകളെ ഇറുകെപ്പൂട്ടി അവളിരുന്നു.

മായയ്ക്ക് ഒരു കത്തെഴുതി വെച്ച് ശ്രീദേവിയമ്മയോട് മാത്രം സ്വാതി യാത്ര പറഞ്ഞു. ഒറ്റ നോട്ടത്തിൽ അവളുടെ മനസ്സു വായിച്ചതുപോലെ ഒന്നും ചോദിയ്ക്കാതെ അവളുടെ തലയിൽ കൈവെച്ച് അനുഗ്രഹിക്കുക മാത്രമാണവർ ചെയ്തത്. ആ നഗരവുമായി അതുവരെയുണ്ടായിരുന്ന കെട്ടുപാടുകളൊക്കെയും ഇല്ലാതായതുപോലെ അവൾക്ക് തോന്നി. നാട്ടിലേയ്ക്ക് മടങ്ങുന്ന യാത്രയിൽ മുഴുവൻ അവളോർത്തത് അമ്മയെക്കുറിച്ചായിരുന്നു. ഓർമ്മവെച്ചകാലം മുതൽ അമ്മയോട് പറയാത്തതൊന്നുമുണ്ടായിരുന്നില്ല. ജിതനെ പരിചയപ്പെട്ടതുമുതൽ എല്ലാം അമ്മയ്ക്ക് അറിയുന്നതുമാണ്. തന്റെ ഇഷ്ടങ്ങൾക്കൊരിക്കലും എതിരു നിൽക്കാത്ത അമ്മയുടെ മനസ്സിൽ ജിതൻ എന്നോ സ്വന്തം മരുമകനായി പ്രതിഷ്ഠിക്കപ്പെട്ടുകഴിഞ്ഞിരുന്നു. “തെറ്റ് ചെയ്യാത്ത മനുഷ്യരില്ല. പക്ഷെ അതറിയുന്ന നിമിഷം ആ തെറ്റ് തിരുത്തുന്നതാണ് യഥാർത്ഥ മഹത്വം” എന്ന് തന്റെ കുട്ടിക്കാലത്തെങ്ങോ അമ്മ പറഞ്ഞത് ആ നിമിഷം സ്വാതിയുടെ മനസ്സിലേയ്ക്കെത്തി. അതെ; തന്റെ പ്രണയം തിരുത്തപ്പെടേണ്ട ഒരു തെറ്റ് മാത്രമായിരുന്നുവെന്നവൾ തിരിച്ചറിയുകയായിരുന്നു. വരാനിരിയ്ക്കുന്ന ശരികളെഴുതപ്പെടാൻ ചെയ്തുപോയ തെറ്റുകളൊക്കെയും കാലത്തിന്റെ സ്ലേറ്റിൽ നിന്ന് തുടച്ചുമാറ്റാനെന്നതുപോലെ പുറത്ത് മഴ പെയ്തുകൊണ്ടിരുന്നു.

ഒരു പെൺപൂവിന്റെ സ്വപ്നം

2011-03-22T09:46:00.010+04:00

“കല്യാണമൊക്കെ അറുബോറൻ ഏർപ്പാടാ‍ണ്, തനിച്ചുള്ള ജീവിതം മാക്സിമം എൻ‌ജോയ് ചെയ്ത ശേഷം സെറ്റിൽ ആകാം” എന്ന് വളരെ നിസ്സാരമായി പറഞ്ഞ് ജീവിതത്തിരക്കുകളിലേയ്ക്ക് ഊളിയിട്ടിറങ്ങുന്ന പെൺ‌യുവത്വത്തിനിടയിൽ ‘കല്യാണം കഴിയ്ക്കുക, ഭർത്താവൊന്നിച്ച് കുടുംബജീവിതം നയിക്കുക’ എന്നതാണ് തന്റെ ഏറ്റവും വലിയ സ്വപ്നമെന്ന് നിറഞ്ഞ കണ്ണുകളോടെ എന്നോട് പറഞ്ഞ കൂട്ടുകാരിയെ അന്നുമുതലാണ് ഞാനറിയാൻ ശ്രമിച്ചത്... അന്നുമുതലാണവളെനിയ്ക്ക് കൂട്ടുകാരിയായതും.

സറീന എന്ന ഹൈദ്രാബാദുകാരിയെ ഞാനാദ്യം കാണുന്നത് തൊട്ടടുത്ത മുറിയിൽ താമസിയ്ക്കാനെത്തുമ്പോഴാണ്. അവളണിഞ്ഞിരുന്ന പർദ്ദ കൊണ്ട് മറച്ചുപിടിച്ചിരുന്നത് മറ്റാരെയും കാണിയ്ക്കാൻ അവളിഷ്ടപ്പെടാതിരുന്ന വലതു കയ്യിന്റെയും കാലിന്റെയും സ്വാധീനക്കുറവായിരുന്നു. കുട്ടിക്കാലത്ത് പോളിയോരോഗം സമ്മാനിച്ച തളർച്ച അവളുടെ സ്വപ്നങ്ങളെയാണ് ഏറെ തളർത്തിക്കളഞ്ഞത്. പൂർണ്ണ ആരോഗ്യമുള്ള അനുജത്തിയുടേയും അനുജന്റെയും കളിചിരികൾക്കിടയിൽ സറീന ഒറ്റപ്പെടുകയായിരുന്നു. സ്വന്തം മാതാവ് പോലും ആവശ്യത്തിനും അനാവശ്യത്തിനും ക്രൂരമായി ശിക്ഷിച്ചും ശാസിച്ചും സ്നേഹമെന്ന വലയത്തിൽ നിന്ന് അവളെ മാത്രമകറ്റി നിർത്തി. അതുകൊണ്ടാകാം 12 വയസ്സിലവൾ ഇളയമ്മയുടെ കൈ പിടിച്ച് മുംബൈ നഗരത്തിന്റെ തിരക്കുകളിൽ മുഴുകാൻ വന്നെത്തിയതും. ഇടതുകയ്യിൽ പേന പിടിച്ച് വേഗത്തിലെഴുതാനും സ്വാധീനക്കുറവിനെ തോൽ‌പ്പിച്ച് സാധാരണ രീതിയിൽ നടക്കാനും ശ്രമിച്ച് സാധാരണജീവിതത്തെ അവൾ കയ്യെത്തിപ്പിടിയ്ക്കുകയായിരുന്നു. അതിലവൾ ഒട്ടൊക്കെ വിജയിയ്ക്കുകയും ചെയ്തു. തിരക്കുപിടിച്ച പഠനകാലത്തിനൊടുവിൽ ഒരു എം.ബി.എ സ്വന്തമാക്കി ഹൈദ്രാബാദിലേയ്ക്ക് മടങ്ങി.

കുറേക്കാലത്തിനു ശേഷം മടങ്ങി വന്ന മകളോട് ഏറെ വാത്സല്യമൊന്നും പ്രകടിപ്പിക്കാൻ പിന്നീടും ആ അമ്മയ്ക്ക് കഴിഞ്ഞില്ല. വിവാഹപ്രായമെത്തിയ മൂത്തമകളെ അവഗണിച്ച് ഇളയ പെൺകുട്ടിയെ വിവാഹം കഴിപ്പിച്ചയച്ചു. സറീനയുടെ ഭാവിജീവിതം അവർക്ക് മുന്നിൽ ഒരു വിഷയമേ അല്ലായിരുന്നു. ഇതിനിടയിലെപ്പോഴോ പൊട്ടിവിടർന്നൊരു പ്രണയം. അവളുടെ വരണ്ടുപോയ ജീവിതത്തിലെ ചെറിയൊരു കുളിർകാറ്റ്. വിദ്യാഭ്യാസപരമായി ഏറെ പിന്നിലായിരുന്ന അയാളെ സ്വയം മറന്ന് സ്നേഹിച്ചപ്പൊഴും വിരഹമെന്ന നോവിനെയകറ്റാൻ അയാൾക്ക് പിന്നാലെ ദുബായ് നഗരത്തിലെത്തിച്ചേർന്നപ്പോഴും അവളെ നയിച്ചതൊക്കെയും ഒരായിരം നിറവുള്ള ഭാവിജീവിതത്തെ കുറിച്ചുള്ള സ്വപ്നങ്ങളായിരുന്നു. തേടിപ്പിടിച്ച ജോലിയിൽ നിന്നുള്ള വരുമാനത്തിന്റെ ഏറിയ പങ്കും അവൻ കൈക്കലാക്കിയപ്പോഴും കുടുംബത്തിന് താങ്ങാവാനവൾ മറന്നില്ല. അനുജത്തിയുടെ പ്രസവം, അനുജന്റെ പഠനം, പിതാവിന്റെ ചികിത്സ അങ്ങനെ അങ്ങനെ നിരവധി ആവശ്യങ്ങളുണ്ടായിരുന്നു അവൾക്കു മുന്നിൽ. അവധിക്കാലങ്ങൾക്കവധി കൊടുത്ത് അവൾ അവരുടെ ആവശ്യങ്ങളൊരോന്നായി നടത്തിക്കൊടുത്തു.

പക്ഷെ കഷ്ടപ്പാടുകളിൽ അവളുടെ മനസ്സിന് താങ്ങായി നിന്ന സ്വപ്നങ്ങളും വൈകാതെ പൊലിഞ്ഞു. വീട്ടുകാരുടെ സമ്മതമില്ലെന്ന കാരണം പറഞ്ഞ് അവളുടെ കാമുകൻ വിവാഹത്തിൽ നിന്ന് പിന്മാറി. താമസിയാതെ തന്നെ അയാൾ നാട്ടിലേയ്ക്ക് മടങ്ങി വേറൊരു വിവാഹം കഴിച്ച് വീണ്ടും ദുബായിൽ എത്തുകയും ചെയ്തു. മാനസികമായും സാമ്പത്തികമായും അവളെ ചൂഷണം ചെയ്ത ശേഷം അയാൾ വിദഗ്ദമായി ഒഴിഞ്ഞുമാറുകയായിരുന്നു. നൊമ്പരങ്ങളിൽ നീറിയൊടുങ്ങാൻ അനുവദിയ്ക്കാതെ അവൾക്ക് കൂട്ടായി നിന്നത് കുറെ ചങ്ങാതിമാരായിരുന്നു. ആദ്യമൊക്കെ ഒഴിഞ്ഞുമാറിയെങ്കിലും പിന്നീട് അവരുടെ നിർബന്ധത്തിന് വഴങ്ങി പുതിയൊരു ബന്ധത്തെക്കുറിച്ച് സറീന ചിന്തിയ്ക്കാൻ തുടങ്ങി. ചങ്ങാതിമാർ വഴിയും മാട്രിമോണിയൽ സൈറ്റുകൾ വഴിയും വിവാഹാലോചനകൾ വന്നു. പക്ഷെ അവളുടെ വൈകല്യം അതിന് വലിയൊരു വിഘ്നമായി നിന്നു.

ഇതിനിടയിൽ എല്ലാം അംഗീകരിയ്ക്കാൻ തയ്യാറായി തന്നെ ഒരാൾ വന്നു. അവളെക്കുറിച്ചെല്ലാമറിഞ്ഞിട്ടും ആ വിവാഹാലോചനയുമായി മുന്നോട്ട് പോകാൻ തന്നെയായിരുന്നു ആ മനുഷ്യന്റെ തീരുമാനം. മനസ്സിൽ വീണ്ടും സ്വപ്നങ്ങൾ പൂക്കാൻ തുടങ്ങി. നേരിൽ കാണാൻ വരുമെന്ന് പറഞ്ഞ ദിവസം അയാളെ കാണാൻ അവൾ അണിഞ്ഞൊരുങ്ങി യാത്രയായി. വിശ്വസ്ഥയായ കൂട്ടുകാരിയേയും കൂടെ കൂട്ടി. കണ്ടു; സംസാരിച്ചു; ഇഷ്ടമായി. പക്ഷെ അവിടെയും വിധി അവൾക്കെതിരാവുകയായിരുന്നു. അന്നത്തെ കൂടിക്കാഴ്ചയിൽ സറീനയേക്കാളധികം അയാൾക്കിഷ്ടമായത് അവളുടെ കൂട്ടുകാരിയെ ആയിരുന്നു. അവർ ഫോണിലും നേരിലും സംസാരിയ്ക്കാൻ തുടങ്ങിയപ്പോൾ മൌനമായി അവൾ വഴിമാറിക്കൊടുത്തു.അല്ലെങ്കിലും അവൾ അവർക്കൊരു തടസ്സമേ ആയിരുന്നില്ലല്ലോ. പിന്നെ അവർ തമ്മിലുണ്ടായ പ്രണയത്തിനും ഒടുവിൽ വിവാഹത്തിനുമൊക്കെ ഒരു കാഴ്ചക്കാരിയായി മാത്രം മാറി സറീന. തനിയ്ക്ക് കിട്ടേണ്ട സൌഭാഗ്യങ്ങളൊക്കെ മറ്റൊരാളിലേയ്ക്ക് എത്തിച്ചേരുന്നത് എല്ലാ നിരാശയും സങ്കടങ്ങളും ഉള്ളിലൊതുക്കി നോക്കിനിൽക്കാൻ മാത്രമേ അവൾക്ക് കഴിഞ്ഞുള്ളു. ഇപ്പോഴും ഇടയ്ക്കിടെ അവരുടെ വീട്ടിലേയ്ക്ക് ക്ഷണിയ്ക്കപ്പെട്ട അതിഥിയായി അവൾ പോകുന്നു. നഷ്ടബോധത്തിന്റെ എരിതീയിൽ എണ്ണയൊഴിച്ച് മടങ്ങി വരുന്നു. പിന്നെ കുറച്ച് ദിവസങ്ങൾ മൌനത്തിന്റെ പുതപ്പാൽ സ്വയംമൂടി അതിനുള്ളിലെ ഏകാന്തതയിലലിയുന്നു.

തീർത്തും ഒറ്റപ്പെട്ടുപോയ മനസ്സോടെ സറീന ഇന്നും ജീവിയ്ക്കുന്നു. കഴിഞ്ഞ അവധിയ്ക്ക് നാട്ടിൽ പോകാൻ തുടങ്ങുമ്പോൾ അവളെന്നോട് പറഞ്ഞിരുന്നു. ഇത്തവണയെങ്കിലും വിവാഹമെന്ന സ്വപ്നം കയ്യെത്തിപ്പിടിയ്ക്കാൻ കഴിഞ്ഞാൽ ഇനിയൊരു തിരിച്ചു വരിവുണ്ടാകില്ലെന്ന്. പക്ഷെ അങ്ങനെയൊന്നുണ്ടായില്ല. അവളുടെ വീട്ടിൽ ആർക്കും അതിന് താല്പര്യവുമില്ല. വരുമാനമാർഗ്ഗമില്ലാതെ ആയെങ്കിലോ എന്നുള്ള ഭയം. ഇടയ്ക്കിടെയുള്ള ഫോൺ സംഭാഷണങ്ങളിൽ അവൾ പറയാറുണ്ട്, വിരസമാകുന്ന ജീവിതത്തെ കുറിച്ച്, തികച്ചും ന്യായമായിട്ടുപോലും കയ്യെത്തിപ്പിടിക്കാനാവാതെ പോവുന്ന സ്വപ്നത്തെക്കുറിച്ച്, കുത്തിനോവിയ്ക്കുന്ന ഏകാന്തതയെക്കുറിച്ച്. “ ഒരു പുരുഷന്റെ സ്നേഹം ലഭിയ്ക്കണമെങ്കിൽ അറിയേണ്ടുന്ന കുറുക്കുവഴികൾ എന്തൊക്കെയാണ്” എന്ന് തമാശയായി അവളെന്നോട് ചോദിച്ചപ്പോൾ പതിഞ്ഞ ഒരു ചിരിയിൽ ഞാനെന്റെ മറുപടിയൊതുക്കി.

വിവാഹമല്ല ഒരു പെൺപൂവിന്റെ ആത്യന്തികമായ ലക്ഷ്യമെന്നൊക്കെ പറയാമെങ്കിലും അരക്ഷിതമായ ഒരു ഏകാന്തതയിലിരുന്ന് ഇന്ന് അവൾക്ക് കാണാവുന്ന ഏറ്റവും മനോഹരമായ സ്വപ്നം വിവാഹം തന്നെയാണെന്ന് ഞാൻ മനസ്സിലാക്കിയില്ലെങ്കിൽ പിന്നെ ആരു മനസ്സിലാക്കാൻ. ഞാനൊരിയ്ക്കൻ പിന്നിട്ട വഴികളിലാണവളിലൂടെയാണവളിപ്പോൾ നടക്കുന്നത്. കാരണവും സാഹചര്യവും വ്യത്യസ്തമായിരുന്നെങ്കിലും അവളിന്നറിയുന്ന ആ ഘനീഭവിച്ച ഏകാന്തത എനിയ്ക്ക് പരിചിതമാണ്. അവളെ അറിയുന്ന, അവളുടെ മനസ്സിന്റെ നന്മ കാ‍ണാൻ കഴിയുന്ന ഒരാൾ അവളെ തേടിയെത്തുമെന്ന് പറയാനേ എനിയ്ക്ക് കഴിയൂ. അങ്ങനെ ആശ്വസിക്കാനും വിശ്വസിയ്ക്കാനുമാണെനിയ്ക്കിഷ്ടം. കാരണം അവൾ അത്തരത്തിലൊരു സ്നേഹവും ജീവിതവും അർഹിയ്ക്കുന്നു. അതല്ലെങ്കിൽ ദൈവമെങ്ങനെ നീതിമാനാകും!!!!

ഓർമ്മകളുടെ ഗന്ധം

2011-03-21T14:45:00.011+04:00

ഇന്ന് മധ്യാഹ്നത്തിൽ കണ്ണടച്ചാൽ ഓർമ്മയിലെത്തുന്ന ഗന്ധർവ്വന്മാരെ കുറിച്ച്; ഗന്ധങ്ങളെക്കുറിച്ച് വായിച്ച് തീർന്നപ്പോഴാണ് ഓർമ്മകളിൽ പലതരം ഗന്ധങ്ങൾ കഥപറയാൻ തുടങ്ങുന്നത്. കണ്ണടച്ചപ്പോൾ ആദ്യം ഓർമ്മയിലെത്തിയത് വല്യുമ്മ എന്നതിനു പകരം ഉമ്മ എന്നുതന്നെ ഞാൻ വിളിച്ചിരുന്ന എന്റെ ഉമ്മച്ചിയുടെ ഉമ്മയുടെ മണമായിരുന്നു. അത് കാച്ചിയ വെളിച്ചെണ്ണയുടേയും ലൈഫ് ബോയ് സോപ്പിന്റെയും ഒരു മിശ്രിത ഗന്ധമായിരുന്നു. അതിലുമുപരി സ്നേഹത്തിന്റെയും വാത്സല്യത്തിന്റേയും ഗന്ധമായിരുന്നു. ഉമ്മ ഒരിക്കൽ പോലും മറ്റൊരു സോപ്പു ഉപയോഗിച്ച് കണ്ടിട്ടേയില്ല. പ്രവാസികളായ പേരക്കുട്ടികളും മരുമക്കളും സമ്മാനിച്ചിരുന്ന വാസനസോപ്പുകളിലൊന്നുപോലും ഉപയോഗിച്ചതേയില്ല. അതിനു നിർബന്ധിച്ചാൽ “മരിച്ച് മയ്യത്ത് കുളിപ്പിക്കുമ്പോൾ മാത്രം ഫോറിൻ സോപ്പ് തേച്ച് കുളിപ്പിക്കണം” എന്ന് പാതി തമാശയായും പാതി കാര്യമായും പറഞ്ഞ് സുന്ദരമായി ചിരിച്ചൊഴിയുമായിരുന്ന തലമുഴുവൻ പഞ്ഞിപോലെ നരച്ച ആ വിരുതത്തി. ഒടുവിൽ ഉമ്മായുടെ മയ്യത്ത് കുളിപ്പിക്കുന്ന നേരത്ത് പേരോർമ്മയില്ലാത്ത ഏതോ ഒരു വിദേശനിർമ്മിത സോപ്പിന്റെയും വെള്ളതിൽ ചേർത്ത കർപ്പൂരത്തിന്റെയും ഗന്ധത്തിൽ മൂക്കിൽ നിന്ന് എന്നെന്നേയ്ക്കുമായി ആ ലൈഫ്ബോയ് സോപ്പിന്റെ ഗന്ധം ഒഴിഞ്ഞുപോകുന്നത് ഒട്ടൊരു ദു:ഖത്തോടെ തിരിച്ചറിഞ്ഞു. എങ്കിലും മനസ്സിലെ ഗന്ധങ്ങളെ ഒഴിവാക്കാൻ മരണത്തിനും കഴിയില്ലല്ലോ.

കുട്ടിക്കാലത്തിന്റെ ഹൃദ്യമായ ഗന്ധങ്ങളിലൊന്ന് വാപ്പിച്ചിയുടെ ജ്യേഷ്ഠന്റെ മകൻ വിദേശത്തുനിന്ന് വരുമ്പോൾ പെട്ടിതുറക്കുമ്പോൾ നിറയുന്ന മണമാണ്. ബ്രൂട്ടിന്റെയും യാഡ്ലീയുടേയും ലക്സിന്റെയും ഗന്ധങ്ങളെനിയ്ക്ക് ഇക്കായുടെ സ്നേഹവാത്സല്യങ്ങളുടെ ഓർമ്മകളാണ്. എനിയ്ക്കായ് പ്രത്യേകമെടുത്തുവെച്ച സമ്മാനങ്ങളും പുത്തനുടുപ്പും ഹീറോപ്പേനയുമൊക്കെ ഒക്കെ പകർന്നുതന്ന സന്തോഷത്തിന്റെ സുഖമുള്ള ഓർമ്മകൾ. പത്താംക്ലാസ്സിൽ ഉയർന്ന മാർക്ക് വാങ്ങി പാസ്സായപ്പോൾ പലരിൽ നിന്നും പേനയും ബുക്കുകളും വസ്ത്രങ്ങളുമെല്ലാം സമ്മാനമായി കിട്ടിയപ്പോൾ ഇക്കായുടെ വകയായി എനിയ്ക്ക് കിട്ടിയത് ഒരു പഴയ കത്തായിരുന്നു. രണ്ടാം ക്ലാസ്സിൽ പഠിക്കുമ്പോൾ ഒരുപാടു അക്ഷരത്തെറ്റുകളോടെ അതിലേറെ നിഷ്കളങ്കമായ സ്നേഹത്തോടെ ഞാൻ ഇക്കായ്ക്ക് അയച്ച ഒരു പഴയ കത്ത്. ആ വർഷങ്ങളത്രയും അത് സൂക്ഷിച്ചുവെച്ചിരുന്നു എന്ന അറിവ് എനിയ്ക്ക് പകർന്ന സന്തോഷം ഒരുപാട് വലുതായിരുന്നു. നീണ്ടപ്രവാസജീവിതത്തിനുശേഷം ഏതൊരു ശരാശരി ഗൾഫ്കാരനെയും പോലെ നാട്ടിലേയ്ക്കയച്ച; പ്രാരാബ്ധക്കടലിലൊഴുകിപ്പോയ ഒരുപാട് പണത്തിന്റെ കണക്ക് മാത്രം സ്വന്തമാക്കി ഇക്കയും. ഇന്ന് കാലങ്ങളേറെ കഴിഞ്ഞ് ഞാനുമൊരു പ്രവാസിയായി. നാട്ടിലേയ്ക്കുള്ള യാത്രകളിൽ പെട്ടിയൊരുക്കുമ്പോഴും നാട്ടിലെത്തി അത് തുറക്കുമ്പോഴും നിറയുന്ന ആ ഫോറിൻ മണം ഇന്നും എനിക്ക് ഒരു ജ്യേഷ്ഠന്റെ സ്നേഹത്തിന്റെ മണമാണ്.സ്വന്തം ഉപയോഗങ്ങൾക്കായി വാങ്ങാറില്ലെങ്കിലും ഇടയ്ക്കൊക്കെ കടയിൽ പോകുമ്പോൾ ഞാനിന്നും യാഡ്ലീയുടെയും ലക്സിന്റെയുമൊക്കെ ഗന്ധം വെറുതെയൊന്ന് മൂക്കിലാവാഹിയ്ക്കും. ടിക്കറ്റില്ലാതെ കുട്ടിക്കാലത്തിലേയ്ക്ക് ഫ്ലൈറ്റ് കയറാൻ.

മുല്ല്ലപ്പൂവിന്റെ ഗന്ധം കല്യാണത്തലേന്നുള്ള രാത്രിയുടെ ഓർമ്മയാണ്. മണവാട്ടിക്കും മറ്റു സ്ത്രീ ജനങ്ങൾക്കുമായി കല്യാണദിവസം ചൂടുവാൻ തലേന്ന് തന്നെ വാങ്ങിവെച്ചിട്ടുള്ള മുല്ലമാലകളിലെ മൊട്ടുകൾ വിരിയുന്നതിന്റെ സൌരഭ്യം. മുല്ലപ്പൂഗന്ധം നുകരുമ്പോൾ ഒപ്പനപ്പാട്ടുകളുടെ താളവും കുട്ടിപ്പട്ടാളത്തിന്റെ കളിയാരവങ്ങളും ബന്ധുജനങ്ങളുടെ സാന്നിധ്യവും നിറഞ്ഞൊഴുകുന്ന ഒരു കല്യാണവീടിന്റെ ചിത്രം ഇന്നും മനസ്സിലെത്തും.കൂടെ കുറേ ചിരിയ്ക്കുന്ന മുഖങ്ങളും. അറയൊരുക്കലും മൈലാഞ്ചിയിടലും രാത്രി വൈകുവോളം നീളുന്ന സദ്യയൊരുക്കലുമൊക്കെയായി കുസൃതികളും തമാശകളും സന്തോഷവും പരന്നൊഴുകുന്ന കല്യാണരാവിന്റെ മനോഹരമായൊരു ചിത്രം.

വാട്ടിയ വാഴയിലയിൽ പൊതിഞ്ഞ ചോറിന്റെയും കറികളുടേയും ഗന്ധം സ്കൂൾകാലത്തിന്റേതാണ്. പലതരം കറികളുടേയും അച്ചാറുകളുടേയും സമ്മിശ്ര ഗന്ധത്തിന്റെ ഓർമ്മയിൽ ഞാനിന്നും കൂട്ടുകാരൊന്നിച്ചിരുന്ന് ഭക്ഷണം കഴിക്കുന്നൊരു ഹൈസ്കൂൾ വിദ്യാർത്ഥിനിയാകും. പുതിയ പുസ്തകത്തിന്റെയും ബാഗിന്റെയും മണം, പുതിയ അധ്യയന വർഷത്തിനുമാത്രം സ്വന്തമാണ്. മഴയുടെ ശീൽക്കാരങ്ങളിൽ ഒഴുകിപ്പോയ കുറേ ജൂൺ മാസങ്ങളുടെ ഓർമ്മകൾ. നനഞ്ഞൊട്ടിയ നീലപ്പാവാടയുമിട്ട് വേനലവധിക്കാലത്തിന്റെ ആലസ്യങ്ങളിൽ നിന്ന് മുഴുവനായും വേറിടാത്തൊരു മനസ്സോടെ പുസ്തകത്താളുകൾ ആദ്യമായി തുറക്കുമ്പോൾ മൂക്കിലേയ്ക്കിരച്ചെത്തുന്ന ആ ഗന്ധം ഒന്നുകൂടി നുകരാൻ, ഓർമ്മകളിൽ ചിറകടിച്ചു പറക്കാൻ ഇന്നും പുതിയ പുസ്തകങ്ങളെ ഒരു നിമിഷം മുഖത്തോടു ചേർക്കുന്നു. അവാച്യമായ ഒരു നിർവൃതി കണ്ണടച്ചാസ്വദിയ്ക്കുന്നു.

വയലിലെ ചേറിന്റെ മണമെനിയ്ക്ക് ഒരു വീഴ്ചയുടെ ഓർമ്മയാണ് സമ്മാനിയ്ക്കുക. അഞ്ചാംക്ലാസ്സിൽ വെച്ച് ഓഫീസ് റൂമിൽ നിന്ന് ചോക്കെടുക്കാൻ പോയി വരവേ തട്ടിയലച്ചു വീണതിന്റെ ഓർമ്മ ഇന്നും മായാതെ കണ്ണിനുതാഴെയായി അടയാളമായി അവശേഷിയ്ക്കുന്നു. ആ മുറിവും മുഖം മുഴുവൻ നീരുമായി ആമ്പൽ‌പ്പൂവ് പറിയ്ക്കാൻ വയലും താണ്ടിപ്പോയതുകൊണ്ടാണ് ആ വീഴ്ച വയലിലെ ചേറുമായി ബന്ധം സ്ഥാപിച്ചത്. റെയ്നോൾഡ് പേനകൊണ്ടെഴുതുന്ന മീരയെന്ന അഞ്ചാംക്ലാസ്സിലെ കൂട്ടുകാരിയെ മനസ്സിലേയ്ക്കെത്തിക്കുന്നത് കുട്ടിക്യൂറാ പൌഡറിന്റെ മണമാണ്. അവളോടൊപ്പം ആദ്യമായി അമ്പലത്തിൽ പോയതിന്റെ ഓർമ്മയ്ക്ക് അവിടുത്തെ വിളക്കിലെ എണ്ണയുടെയും മഞ്ഞൾ പ്രസാദത്തിന്റെയും മണവും.

അങ്ങനെ എത്രയെത്ര ഗന്ധങ്ങൾ, ഓർമ്മകൾ, മുഖങ്ങൾ. ഗന്ധങ്ങളെ ഗന്ധർവ്വനോടുപമിച്ച ഞാനറിയാത്ത ആ ചങ്ങാതിയ്ക്കൊരുപാട് നന്ദി.... ഒരുപാട് ഗന്ധങ്ങളെ ഓർമ്മകളിലേയ്ക്കെത്തിച്ചതിന്; ഒരുപാട് മുഖങ്ങളെ മനസ്സിൽ നിറച്ചതിന്.....

ഗന്ധമെന്ന ഗന്ധർവ്വനെ സമ്മാനിച്ച കൂട്ടുകാരനിവിടെയുണ്ട്....
http://www.mathrubhumi.com/nri/orthunokkumbol/article_165817/

അപരിചിതൻ.....

2010-11-25T10:58:00.002+04:00

2010 ആഗസ്റ്റ്മാസം, വല്ലാതെ വരണ്ടുപോയിരുന്നു മനസ്സും ജീവിതവും. വിരസങ്ങളാകുന്ന ദിനരാത്രങ്ങൾ; അവധിക്കാലം കഴിഞ്ഞ് മാതാപിതാക്കളെ പിരിഞ്ഞതിന്റെ വേദനയും വിരസതയും ഒക്കെ മനസ്സിനെ ഭരിയ്ക്കുന്നുണ്ടായിരുന്നു. നഷ്ടങ്ങളോർത്ത് സ്വയം വേദനിയ്ക്കുക എന്ന ദു:ശ്ശീലം ഒരുപാട് ശക്തിപ്രാപിച്ചിരുന്നു എന്നിൽ. ഒന്നും ചെയ്യാനില്ലാതിരുന്ന ഒരു മധ്യാഹ്നത്തിലാണ് ഒരു വലിയ ഇടവേളയ്ക്ക് ശേഷം ഞാൻ വീണ്ടും ഫേസ്ബുക്കിൽ അക്കൌണ്ട് തുറക്കുന്നത്. പതിവിനു വിപരീതമായി ഇത്തവണ ശരിയായ പേരിൽ തന്നെ മതി പ്രൊഫൈൽ എന്ന് തീരുമാനിയ്ക്കുകയായിരുന്നു. ആരിൽ നിന്നൊക്കെയോ സ്വയം മറച്ചുപിടിയ്ക്കേണ്ടിവന്നത് എന്നിൽ ഒരു മടുപ്പുളവാക്കിയിരുന്നു. അതിന് ഒരു പരിഹാരമാകട്ടെയെന്നും കരുതി.

കൂട്ടുകാരുമായി ചാറ്റ് ചെയ്യുന്നതോ പുതിയ കൂട്ടുകാരെ കണ്ടെത്തുന്നതോ ഒന്നുമായിരുന്നില്ല ഞാനതിൽ ചെയ്തിരുന്നത്. കൂടുതലും സ്റ്റാ‍റ്റസ് മെസ്സേജുകളെഴുതിക്കൂട്ടുന്നതിലും അവ മാറിമാറി പരീക്ഷിയ്ക്കുന്നതും തന്നെയായിരുന്നു പ്രധാന വിനോദം. പതിവുപോലെ നൈരാശ്യത്തിന്റെ; ദു:ഖത്തിന്റെ ഭാഷയായിരുന്നു അവയിൽ പലതിനുമുണ്ടായിരുന്നത്. അന്നൊരു ദിവസം ഫേസ്ബുക്ക് തുറക്കുമ്പോൾ ഒരു അപരിചിതന്റെ ഫ്രണ്ട്സ് റിക്വസ്റ്റ് കണ്ടു. പ്രൊഫൈൽ എടുത്തുനോക്കിയപ്പോൾ സുമുഖനായ ഒരു ചെറുപ്പക്കാരൻ. സാധാരണ അപരിചിതരെ കൂട്ടുചേർക്കാൻ ഒരു മടിയാണ്. അത്രയൊന്നും ആക്ടീവ് അല്ലാത്തൊരു പ്രൊഫൈൽ ആണെന്ന് മനസ്സിലാക്കാനായി. പക്ഷെ എന്തുകൊണ്ടോ നിരസിയ്ക്കാൻ കഴിയാത്തൊരു സൌഹൃദംപോലെ തോന്നിച്ചു അത്. അതുകൊണ്ടാകണം ഒരുമടിയും കൂടാതെ ഞാനാ സുഹൃത്തിനെ സ്വീ‍കരിച്ചത്. ‘ആഡ്’ ചെയ്തെങ്കിലും ഓൺലൈൻ ആയി കണ്ടില്ല. വെറുതെ ഫോട്ടോസ് എല്ലാം എടുത്തുനോക്കി. ഒരു മോഡലിന്റെ ഓർമ്മപ്പെടുത്തുന്ന വിധം ഒരുപാട് പോസിലുള്ള കുറെ ചിത്രങ്ങൾ. ഇടയ്ക്കെപ്പോഴോ തോന്നി വെറും ഒരു ജാഡക്കാരനാകുമെന്ന്. സൌഹൃദത്തിൽ പൊതുവേ ഉപാധികളോ ജാഡകളോ ഇഷ്ടപ്പെടാത്ത എനിയ്ക്ക് ഈ സുഹൃത്തിനെ അംഗീകരിക്കാൻ കഴിയില്ലായിരിക്കുമെന്നുതന്നെ തോന്നി.

തൊട്ടടുത്ത ദിവസം രാത്രിയിൽ ജിമെയിലിൽ സുഹൃത്തുക്കളോട് ചാറ്റ് ചെയ്തുകൊണ്ടിരിയ്ക്കുമ്പോഴാണ് ഫേസ്ബുക്കിൽ ചാറ്റ് മെസ്സേജ് കണ്ടത്. തലേ ദിവസത്തെ ജാഡക്കാരനാണ്. തിരിച്ച് ഹായ് പറയണോ എന്ന് ഒരു നിമിഷം സംശയിച്ചു. പിന്നെയെന്തോ സംസാരിയ്ക്കാമെന്ന് തോന്നി. ആദ്യത്തെ ഉപചാരങ്ങൾക്കൊക്കെ ശേഷം പെട്ടെന്ന് തന്നെ ആ വിദ്വാൻ എന്നോട് മൊബൈൽ നമ്പർ ചോദിച്ചു. “അമ്പടാ!! ഇവൻ ആളുകൊള്ളാമല്ലോ...പെൺകുട്ടികളെ വളയ്ക്കുന്നതും കുറച്ച സമയമൊക്കെ എടുത്തുവേണ്ടേ..ഇതൊരുമാതിരി സ്വിച്ചിട്ടപോലെയാണല്ലോ” എന്ന് മനസ്സിലോർത്തുകൊണ്ട് ഇപ്പോൾ തരാൻ പറ്റില്ലെന്ന് പറഞ്ഞു. എന്റെപ്രൊഫൈലിന്റെ ഉടമസ്ഥ(ൻ) അതിൽ പറയുന്നതുപോലെ ഒരു പെൺകുട്ടി തന്നെയാണൊ അതോ ഇനി കപടമാണോ എന്ന് തീരുമാനിയ്ക്കാൻ ആണ് മൊബൈൽ നമ്പർ എന്ന് മറുപടി തന്നു. എന്റെ പ്രൊഫൈൽ ചിത്രത്തിൽ കാണുന്നത് ഞാൻ തന്നെയാണോ എന്നും ചോദിച്ചു. മറുപടിയ്ക്ക് കാത്തുനിൽക്കാതെ പിന്നെക്കാ‍ണാമെന്ന് പറഞ്ഞ് ആ കഥാപാത്രം മുങ്ങി. അപ്പോഴേയ്ക്ക് എന്റെ ചുണ്ടിൽ ഒരു ചിരിയുണർന്നിരുന്നു എന്തിനോ വേണ്ടി....

അതൊരു തുടക്കമായിരുന്നു പിന്നീടുള്ള ദിവസങ്ങളിലെ മണിക്കൂറുകൾ നീണ്ട ചാറ്റിങ്ങിന്റ്റെ വളരെ ലളിതമായ തുടക്കം. പിന്നെയെപ്പോഴോ കൈമാറിയ മൊബൈൽ നമ്പരിലേയ്ക്ക് വിളിവന്നു. സുന്ദരമായ; മൃദുലമെങ്കിലും മുഴങ്ങുന്ന ശബ്ദത്തിൽ ആദ്യമായ് എന്നെത്തേടിയെത്തിയ അവന്റെ ഫോൺകോൾ. കൂടുതൽ അറിഞ്ഞപ്പോൾ ഇഷ്ടങ്ങൾ, കാത്തിരിപ്പുകൾ, പ്രതീക്ഷകൾ, ആഗ്രഹങ്ങൾ ഇവയിലൊക്കെയും പൊരുത്തങ്ങളായിരുന്നു ഏറെയും. ജീവിതത്തിൽ ഞാൻ ആഗ്രഹിച്ചതുപോലെയുള്ള ഒരാളാണ് എന്റെ സുഹൃത്തെന്ന് പതിയെ മനസ്സിലാക്കാനായി.

കുറച്ചുദിവസങ്ങളങ്ങനെ ചാറ്റിങ്ങിലും ഫോണിൽ കൂടിയുള്ള സംസാരവുമൊക്കെയായി മുന്നോട്ടുപോയി. നേരിൽ കാണാനുള്ള തിടുക്കം വല്ലാതെയുണ്ടായിരുന്നു. രണ്ടുമണിക്കൂർ യാത്രയുടെ അന്തരമുണ്ടായിരുന്നു ഞങ്ങളുടെ ജോലിസ്ഥലങ്ങൾ തമ്മിൽ. ആ വരുന്ന വാരാന്ത്യത്തിൽ നേരിൽ കാണാമെന്ന് തീരുമാനിയ്ക്കുകയായിരുന്നു.പറഞ്ഞതുപോലെ എന്നെയും തേടിയവൻ വന്നു. ഫേസ്ബുക്കിൽ കണ്ട ചിത്രത്തിൽ കാണുന്നതുപോലെ തന്നെ സുമുഖനാണ്. അവനെക്കണ്ടപ്പോൾ അല്പം ഇരുണ്ടനിറക്കാരിയായതിന്റെ അപകർഷതാബോധം എനിയ്ക്ക് കുറച്ചൊന്നുകൂടിയോ എന്ന് സംശയം. ഹൃദ്യമായ പെരുമാറ്റം. സന്തോഷം പകരുന്ന; ചിരിയ്ക്കുന്ന മുഖം. ഞാനവനെ വല്ലാതെയിഷ്ടപ്പെടാൻ തുടങ്ങുകയായിരുന്നു. തിരികെയെന്നെ സ്നേഹിയ്ക്കുമെന്ന യാതൊരു പ്രതീക്ഷയുമില്ലാതെ; സ്വീകാര്യതയെക്കുറിച്ചു തെല്ലും ഭയമില്ലാതെ ഞാൻ പ്രണയിയ്ക്കാൻ തുടങ്ങുകയായിരുന്നു.

വന്ന് കണ്ട് മടങ്ങിയശേഷം ഫോൺ‌വിളികളുടേയും ചാറ്റിങ്ങിന്റ്റേയും എണ്ണവും ദൈർഘ്യവും പതിന്മടങ്ങായി വർദ്ധിച്ചു. പക്ഷെ അപ്പോഴൊക്കെയും സൌഹൃദത്തിന്റെ പരിധി ലംഘിക്കപ്പെടാതിരിക്കാൻ പരമാവധി ശ്രദ്ധിച്ചിരുന്നു. പ്രതീക്ഷിയ്ക്കാതൊരു ദിവസം സ്വന്തം വീടിന്റെ ചിത്രം മെയിൽ ചെയ്തുതന്നിട്ട് “ഇതാണെന്റെ വീട്. ഈ വീടിന്റെ ഭാഗമാകാൻ വരുന്നോ” എന്നവൻ എന്നോട് ചോദിക്കുമ്പോൾ ആഗ്രഹിച്ചതൊക്കെയും എഴുതിച്ചേർക്കപ്പെട്ടൊരു പകൽ‌സ്വപ്നം സത്യമാവുകയായിരുന്നു. ജീവിതത്തിലേയ്ക്ക് സന്തോഷം തിരിച്ചെത്തുകയായിരുന്നു. “നിന്നെ ഞാൻ സ്നേഹിയ്ക്കുന്നു”വെന്ന് ഒരിക്കൽ‌പ്പോലും പരസ്പരം പറയാതെ തുടങ്ങിയ പ്രണയത്തിന്റെ വസന്തകാലം.

ദുരനുഭവങ്ങളാൽ പകച്ചമനസ്സോടെയെങ്കിലും പ്രതീക്ഷകളെ ഞാനുള്ളിൽ വളർത്തി. പ്രക്ഷുബ്ധമായൊരു മനസ്സോടെ ഞാനൊരു യാത്രയിലായിരുന്നു. ഉറങ്ങുന്നവന്റെ ചുണ്ടിൽ മൌനമേൽ‌പ്പിച്ച രഹസ്യം പോലെ പ്രണയമെന്റെ മനസ്സിൽ പതുങ്ങിയിരുന്നു. പ്രതീക്ഷകളേൽ‌പ്പിച്ച അശാന്തമായൊരു കടലുള്ളിൽ ആർത്തിരമ്പുന്നുണ്ടായിരുന്നു.തിളച്ചുമറിയുന്ന ചിന്തകൾക്കുമേലെ പ്രണയമുണരുമെന്നും രഹസ്യമെന്ന കൂടുതുറന്ന് ലോകത്തിന്റെ കാതിലതമൃത് പോലെ വർഷിയ്ക്കപ്പെടുമെന്നും ഞാൻ പ്രതീക്ഷിയ്ക്കാൻ തുടങ്ങി.

എങ്കിലും പ്രണയനഷ്ടത്തിൽ ഒരിക്കൽ ഉലഞ്ഞുപോയ മനസ്സ് പലപ്പോഴും ഭയക്കുന്നുണ്ടായിരുന്നു. ഒരു ഓർമ്മപ്പെടുത്തൽ‌പോലെ ഇടയ്ക്കിടെ ഞാൻ ആ ദുർദിനങ്ങളെ ഞാൻ ചിന്തകളിലേയ്ക്ക് കടംകൊണ്ടു. പക്ഷെ യഥാർത്ഥപ്രണയത്തിന്റെ തിരകൾ തീരം തേടി ചെല്ലുകതന്നെ ചെയ്യുമല്ലോ. എന്റെ ഭയങ്ങളൊക്കെയും അസ്ഥാനത്താണെന്ന് ബോധ്യമാക്കിക്കൊണ്ട് കഴിഞ്ഞ നവംബർ 11 ന് വളരെ ലളിതമായി നടന്ന വിവാഹചടങ്ങിൽ ഞങ്ങൾ ഇനിയുള്ള ജീവിതം പരസ്പരം പകുത്തുനൽകി.കാത്തിരുന്ന പ്രണയം സഫലമായി.

പുതിയൊരു ജന്മത്തിന്റെ തുടക്കം.ഒരുപാടുകാലങ്ങൾക്ക് ശേഷം ഞാൻ എന്റെ ജീവിതത്തെ സ്നേഹിയ്ക്കാൻ തുടങ്ങിയിരിയ്ക്കുന്നു. പുലരിയുടെ സൌന്ദര്യവും രാത്രിയുടെ വശ്യതയുമൊക്കെ എന്റെ ദിവസങ്ങളിൽ വീണ്ടും വർണ്ണങ്ങൾ ചാലിയ്ക്കുവാൻ തുടങ്ങുന്നു. ഒരു കൊടുംവേനലിനൊടുക്കം പ്രണയമെന്നിൽ മഴയായ് പൊഴിയുന്നു. .

എന്റെ പ്രണയമേ... സൌമ്യമായ കാൽ‌വെപ്പുകളോടെ നീ വന്നുകയറിയത് എന്റെ ഹൃദയത്തിലേയ്ക്കായിരുന്നു.. സുന്ദരമായ ശബ്ദത്തിൽ നീയെന്നോട് പറഞ്ഞത് പ്രണയത്തിന്റെ ഭാഷയായിരുന്നു... മൃദുലമായി നീ തൊട്ടുണർത്തിയത് എന്റെ ആത്മാവിനെയായിരുന്നു.... തനിച്ചുള്ള യാതനകൾക്കും യാത്രകൾക്കുമൊടുക്കം ചിറകുതളർന്ന് നിന്റെ ഹൃദയത്തിലേയ്ക്കാണ് ഞാനടർന്നുവീണത്. ഇന്നു ഞാൻ നിന്നിലേയ്ക്കൊതുങ്ങുകയാണ്. എന്റെ ചിറകുകളുടെ സ്വാതന്ത്ര്യം പ്രണയത്തിന്റെ നേർത്ത തന്ത്രികളാൽ നിന്റെ ഹൃദയത്തോട് ചേർക്കപ്പെട്ടിരിയ്ക്കുന്നു. വാക്കുകളുടെ മാസ്മരികത കൊണ്ട് നിന്നെ പ്രലോഭിപ്പിക്കാനല്ല, പ്രണയത്തിന്റെ മാന്ത്രികതകൊണ്ട് നിന്റെ ഹൃദയത്തെ ഭ്രമിപ്പിക്കാനാണ് ഞാനിഷ്ടപ്പെടുന്നത്. എങ്കിലും ഇനിയെനിയ്ക്കിതുപറയാതെ വയ്യ!!! നിന്നെ ഞാനൊരുപാട് സ്നേഹിയ്ക്കുന്നു. സ്വന്തമാക്കലുകളിൽ മൃതിയടയാത്ത എന്റെ പ്രണയം ഒരു വർഷമേഘം പോലെ നിന്നെ പൊതിയുന്നുണ്ട്.... പെയ്തൊഴിയാനല്ല...മറിച്ച് നിന്നിൽ പെയ്തലിയാൻ.....

ഇല മരത്തിനോട്....

2010-10-02T11:23:00.000+04:00

ഒക്ടോബറിന്റെ നഷ്ടം‌പോലെ
ഞാൻ നിന്നിൽ നിന്നടർന്നുവീഴുന്നത്
ശിശിരത്തിന്റെ അനിവാര്യതയ്ക്കൊടുവിൽ
മറ്റൊരു വസന്തത്തിൽ നീ പൂവിട്ടുനിൽക്കുന്ന
സ്വപ്നമെന്റെ നെഞ്ചിലേറ്റിയാണ്.

ഞാനടർന്നുമാറിയ മുറിവുണക്കാൻ
വസന്തത്തിന്റെ വാർത്തയും‌പേറി കാറ്റുവരും
എന്നിലെ ജീവരക്തം നിന്റെ വേരുറഞ്ഞ-
മണ്ണിൽ പടർത്തി കരിഞ്ഞുണങ്ങി
ഞാനാ കാറ്റിലലിഞ്ഞുയാത്രയാകും...

എന്റെ ഹൃദയരക്തം കുടിച്ചുറങ്ങുന്ന
വരണ്ട മണ്ണിന്റെ ചുവന്ന മാറിൽ
നീയെനിയ്ക്കായ് പൊഴിയ്ക്കണം
പ്രണയത്തിന്റെ ഒരിതൾപ്പൂവ്..
വേർപാടിനെ വെല്ലുന്നൊരടയാളം പോലെ

അനന്തമായ എന്റെയീ യാത്രയിൽ
മറ്റേതെങ്കിലുമൊരു കാറ്റിലലിഞ്ഞെന്നെ-
ത്തേടിയെത്താതിരിയ്ക്കില്ല
പ്രണയത്തിന്റെയാ നഷ്ടസുഗന്ധം...
അന്നൊരുപക്ഷെ...
നിന്നിൽനിന്ന് വസന്തമൊഴിഞ്ഞിട്ടുണ്ടാകും

ചില വീട്ടാക്കടങ്ങൾ

2010-09-15T08:50:00.000+04:00

നെഞ്ചോട്ചേർന്നിരുന്ന് നീയെന്റെ
ഹൃദയതാളമെണ്ണുമ്പോൾ
മൌനം തുളച്ചെന്റെ പ്രണയം
നിന്റെ കാതിൽ‌വന്നലയ്ക്കുമെന്ന്
ഞാനൊരുവേള വല്ലാതെ ഭയപ്പെട്ടു

ഒരു ജന്മത്തിന്റെ പ്രണയം നൽകി-
പകരം നിന്റെ ചിന്തകളിലിടംനേടവേ
പ്രിയത്താൽ നീയാർക്കോ മുറിച്ചു നൽകിയ
ഹൃദയത്തിന്റെ താളം പിഴയ്ക്കരുതെന്ന്
സ്വയമൊരിക്കൽക്കൂടിയോർമ്മിച്ചു

അരക്കെട്ടിലാളിയ കാമത്തിന്റെ കനൽ
മിഴികളിൽ ശലഭങ്ങളാകാതിരിയ്ക്കാൻ-
കൺ‌മൂടി മനസ്സിൽ വരച്ചെടുക്കുകയായിരുന്നു
ഞാനിതുവരെ കാണാത്തൊരു മുഖവും
നനഞ്ഞ രണ്ടുമിഴികളും

കുത്തിനോവിയ്ക്കാറുണ്ട് പലപ്പോഴും
പങ്കുവെച്ചപ്രണയത്തിന്റെ വിരലടയാളങ്ങൾ;
നീ ഹൃദയവും ജീവനും ജീവിതവും വീതിച്ച
നിന്റെ പ്രണയിനിയിൽനിന്നവളറിയാതെ-
കടംകൊണ്ട നിമിഷങ്ങളുടെ
പലിശപ്പെരുക്കങ്ങൾ....

നനഞ്ഞത്

2010-08-10T14:35:00.000+04:00

നനഞ്ഞുകത്തുന്ന വിറകുപോലെ മനസ്സ്
പുകഞ്ഞും നീറ്റിയും ഇടയ്ക്ക്
അടക്കത്തിൽ ചില പൊട്ടലും ചീറ്റലും...
കണ്ണീരുവീണ് ആത്മാവടക്കം നനഞ്ഞതിനാലാകുമോ
പ്രണയത്തിന്റെ പൊൻ‌വെയിൽ തട്ടിയിട്ടും
നനവുമാറാതെയിങ്ങനെ??

.

ഒരു കണ്ണീർച്ചിത്രം

2010-01-27T00:42:00.000+04:00

ജനുവരി 19, 2010... വളരെ സാധാരണമായ ഒരു ദിവസമായിരുന്നു...വൈകുന്നേരം ആറുമണി വരെ. തലേന്ന് ജോലികഴിഞ്ഞ് മടങ്ങും വഴി കാണേണ്ടി വന്ന ഒരു അപകടത്തിന്റെ ഓർമ്മയാണോ അതോ നേരിടാൻ പോകുന്ന ഒരു തീരാനഷ്ടത്തിനെ മുൻ‌കൂട്ടിക്കണ്ട അകക്കണ്ണിന്റെ അപകടസൂചനയോ...അന്ന് ഓഫീസിൽ നിന്ന് ഇറങ്ങും മുൻപ് ചാറ്റ്ചെയ്തുകൊണ്ടിരുന്ന ചങ്ങാതിമാരുമായി ഞാനൊടുവിൽ സംസാരിച്ചത് മരണത്തെക്കുറിച്ചായിരുന്നു; അതിന് യാതൊരു കാരണവുമുണ്ടായിരുന്നുമില്ല. റൂമിലെത്തി ലാപ്ടോപ്പ് ഓൺചെയ്തതും എന്തൊക്കെയോ ചില എറർ മെസ്സേജും തന്ന് അത് അതിന്റെ പ്രവർത്തനം മുടക്കി. ഒരു നേരം ഭക്ഷണമില്ലെങ്കിലും എനിക്ക് അതുമായി പൊരുത്തപ്പെടാനാകും. എന്നാൽ എന്നെ ചുറ്റി നിൽക്കുന്ന കനത്ത ഏകാന്തതയ്ക്ക് ഏകപരിഹാരമായ ലാപ്ടോപ്പിന്റെ മൌനം എന്നെ വല്ലാതെ അസ്വസ്ഥയാക്കി. അകലങ്ങളിലെവിടെയൊക്കെയോ ഉള്ള എന്റെ ചങ്ങാതിമാരെ കാണാനും സംസാരിയ്ക്കാനുമായി തുറന്നിട്ടിരുന്ന ജാലകവാതിലാണ് കൊട്ടിയടയ്ക്കപ്പെട്ടത്. മൌനത്തിന്റെ ഒരു തുരുത്തിൽ അരാലോ ഉപേക്ഷിക്കപ്പെട്ടതുപോലെ ഞാനിരുന്നു; എന്തൊക്കെയോ ചിന്തിച്ചുകൊണ്ട്...

ആ ചിന്തയിൽ നിന്നുണർന്നത് വീട്ടിൽ നിന്നും ഉമ്മച്ചി വിളിയ്ക്കുമ്പോഴാണ്. പതിവുള്ള എന്റെ ഫോൺ വിളി കാണാത്തതുകൊണ്ടുള്ള വിളിയാണെന്നറിയാവുന്നതുകൊണ്ട് ഹലോ പറയലും, വിളിക്കാൻ കഴിയാഞ്ഞതിന്റെ കാരണം ബോധിപ്പിക്കലും ഒരുമിച്ചങ്ങ് നടത്തി. പക്ഷെ; “അതിനല്ല വിളിച്ചത്....വേറെ ഒരു കാര്യം പറയാനുണ്ട്...കേട്ടാൽ വിഷമിയ്ക്കരുത്” എന്ന് ഉമ്മച്ചി പറഞ്ഞത് കേട്ടപ്പോൾ അടുത്ത വാചകത്തിലേയ്ക്കുള്ള ഒരു നിമിഷാർദ്ധം കൊണ്ട് പല മുഖങ്ങൾ മനസ്സിലൂടെ കടന്നുപോയി. പക്ഷെ.... ഒരു ദു:ഖവാർത്തകേൾക്കാൻ സ്വയം സന്നദ്ധയായിക്കൊണ്ടിരുന്ന എന്റെ മനസ്സിനെ ആകെ തകർത്തുകളഞ്ഞു പിന്നെ ഞാൻ കേട്ട വാക്കുകൾ.

കവിരാജ്... മണിയൻ എന്ന ഓമനപ്പേരാൽ ഞാനടക്കമുള്ള കളിക്കൂട്ടുകാർ വിളിച്ചിരുന്ന ഞങ്ങളുടെ പ്രീയപ്പെട്ട ചങ്ങാതി മരണത്തിന്റെ കയ്യും പിടിച്ച് നടന്നകന്നിരിയ്ക്കുന്നു. ഏകദേശം ഒരേ പ്രായത്തിലുള്ള ആറേഴുകുട്ടികൾ; ഞങ്ങളൊരുമിച്ചാണ് കളിച്ചതും വളർന്നതും. ഗ്രാമപ്രദേശമായതിനാൽ അയൽ‌വക്കത്തുള്ള വീടുകൾ പരസ്പരം നല്ലൊരു ബന്ധം കാത്തുസൂക്ഷിച്ചിരുന്നു. അതേചങ്ങാത്തം ഞങ്ങൾ കുട്ടികൾ തമ്മിലും ഉണ്ടായിരുന്നു. മാതാപിതാക്കൾ ജോലിക്കാരായതിനാൽ അവധിക്കാലങ്ങളിൽ ഞാനും എന്റെ ജ്യേഷ്ഠനും മാത്രമാകും പകൽ സമയങ്ങളിൽ എന്റെ വീട്ടിൽ ഉണ്ടാവുക. അതുകൊണ്ട് തന്നെ ബാക്കിയുള്ളവർ ഞങ്ങളുടെ വീട്ടിലാണ് സമ്മേളിച്ചിരുന്നത്. കളികൾക്കിടയിലെ കാര്യം പോലെ ശാസ്ത്ര സാഹിത്യ പരിഷത്തിന്റെ ബാലവേദിയും അവധിക്കാലങ്ങളിൽ ഞങ്ങളടക്കമുള്ള ചങ്ങാതിമാരാൽ കൂടുതൽ സജീവമാകും. കളിയായാലും കലയായായും പഠനകാര്യങ്ങളായാലും കവിരാജ് എപ്പോഴും മുൻപന്തിയിലുണ്ടാകും. നന്നായി ചിത്രം വരയ്ക്കും, എഴുതും, പൊതുകാര്യങ്ങളെക്കുറിച്ചും വ്യക്തമായ ബോധവും കാഴ്ചപ്പാടും....പിന്നെ അസാമാന്യമായ നർമ്മബോധവും. വളർന്നപ്പോൾ ഞങ്ങൾ പെൺകുട്ടികൾ വീട്ടിലേയ്ക്ക് കൂടുതൽ ഒതുങ്ങിയപ്പോഴും പരസ്പരമുള്ള കൂട്ടുകെട്ടിന് മങ്ങലൊന്നും സംഭവിച്ചില്ല. പകരം ആ സുഹൃദ്ബന്ധം സഹോദരസ്നേഹമായി പരിണമിച്ചു എന്നതാകും ശരി.

ദുബായിൽ വന്നതിന് ശേഷം എപ്പോഴൊക്കെ നാട്ടിൽ പോയിട്ടുണ്ടോ അപ്പോഴൊക്കെയും കവിരാജ് എന്നെ കാണാൻ വന്നു. വിവാഹിതനായപ്പോഴും ഫയർഫോഴ്സിൽ ജോലികിട്ടി പരിശീലനത്തിന്റെ തിരക്കുകളായപ്പോഴും ഞാൻ നാട്ടിലെത്തിയെന്ന വിവരം അറിഞ്ഞാൽ ഉടനെ എന്നെ കാ‍ണാൻ വരുമായിരുന്നു. വന്നാൽ മണിക്കൂറുകളോളം സംസാരിയ്ക്കും. ഒരുപാട് തമാശകൾ പറയും. ഞാൻ എന്റെ എല്ലാ വേദനകളും മറന്ന് പൊട്ടിച്ചിരിയ്ക്കുന്ന അപൂർവ്വം അവസരങ്ങളായിരുന്നു അതൊക്കെയും. ഒരു സഹോദരന്റെ സ്നേഹത്തോടെ , സ്വാതന്ത്ര്യത്തോടെ ഒരുമിച്ചു ചെലവിട്ട ആ നിമിഷങ്ങളെ ഞാനിന്ന് മാറോട് ചേർക്കുന്നു. ഇനിയൊരിക്കലും തിരിച്ചുകിട്ടാത്ത ആ സാമിപ്യവും സ്നേഹവും ഓർമ്മ മാത്രമായി തീരുന്നത് അവസാനമായി ഒരുനോക്ക് കാ‍ണാൻ പോലും കഴിയാത്തത്രെ ദൂരെയിരുന്ന് വിങ്ങുന്ന മനസ്സോടെ നിസ്സഹായയായി ഞാൻ മനക്കണ്ണാൽ കാണുന്നു.

കാലത്തിന്റെ ഏത് കോണിലേയ്ക്കാ‍ണ് കൂട്ടുകാരാ (അതോ സഹോദരനോ?!)..... നീ പോയ്മറഞ്ഞത് ??? തനിച്ചായിപ്പോയതിന്റെ വ്യഥകളിൽ തളരുമ്പോൾ ആശ്വാസം പകരാൻ; തമാശകൾ പറഞ്ഞെന്നിൽ ചിരി പടർത്താൻ; ഹൃദയത്തിൽ സൂക്ഷിയ്ക്കുന്ന സ്നേഹത്തിന്റെ ആഴങ്ങളുമായി ഇനിയൊരിയ്ക്കലും നീയാപടികടന്ന് വരില്ലേ???? ഇല്ലെന്ന് എനിയ്ക്കറിയാം; എങ്കിലും മരണത്തിന്റെ ലോകത്തേയ്ക്ക് നീ നടന്നകന്നത് ഇന്നും അംഗീകരിയ്ക്കാൻ മടിയ്ക്കുന്ന എന്റെ മനസ്സ് വെറുതേയെങ്കിലും ഇനിയും കാത്തിരിയ്ക്കും, വീടിന്റെ തണലുതേടിയെത്തുന എന്റെ അവധിക്കാലങ്ങളിൽ ഒരു സഹോദരന്റെ സ്നേഹത്തോടെ ആകുലതകളോടെ എന്നെ കാണാനെത്തുമായിരുന്ന എന്റെ പ്രീയപ്പെട്ട കൂട്ടുകാരനെ...

ഒരോർമ്മച്ചിത്രം

2009-12-30T09:44:00.000+04:00

എന്റെ ഓർമ്മപ്പുസ്തകത്തിലെ ഏറ്റവും പഴക്കംചെന്ന താളുകൾ പലതും മറവിയിൽ പിഞ്ഞിത്തുടങ്ങിയിരിയ്ക്കുന്നു. പലതും തുടക്കവും അവസാനവുമില്ലാത്ത ചില ഓർമ്മച്ചിന്തുകൾ മാത്രമായിരിയ്ക്കുന്നു. അതിലൊന്നാണ് രണ്ടരവയസ്സിൽ എന്റെ ഫോട്ടോയെടുക്കാൻ കൊണ്ടുപോയ ചെറിയ ഒരോർമ്മ. സ്വതവേ മെലിഞ്ഞ ശരീരപ്രകൃതമായതിനാൽ, ശൈശവകാലത്തൊന്നും എന്റെ ഫോട്ടോ എടുത്തിട്ടുണ്ടായിരുന്നില്ല. എന്റെ ശരീരമൊക്കെ ഒന്നു പുഷ്ടിപ്പെട്ടിട്ട് ഫോട്ടോയെടുത്താൽ മതിയെന്ന് തീരുമാനിച്ച മാതാപിതാക്കൾക്ക് ഏറെ താമസിയാതെ ഒന്ന് ബോധ്യപ്പെട്ടു...ആ മഹാത്ഭുതം ഉടനെ ഒന്നും ഉണ്ടാകില്ലെന്ന്. എങ്കിൽ പിന്നെ അപ്പോഴുള്ള കോലം തന്നെ മതിയെന്ന് തീരുമാനിച്ച് എന്നെയും ജ്യേഷ്ഠനേയും ഒരുക്കി ചമയിച്ച് കൊണ്ടുപോയി. പക്ഷെ ഒറ്റയ്ക്ക് ഒരു കസേരയിലിരുത്തി പോസ് ചെയ്യിച്ച് ഫോട്ടോ എടുക്കാമെന്ന തീരുമാനത്തെ ഞാ‍ൻ നഖശിഖാന്തം എതിർത്തു. ആ സ്റ്റുഡിയോ മൊത്തം കേൾക്കാൻ പാകത്തിൽ അലറിവിളിച്ചു കരഞ്ഞു. ആ ക്യാമറയ്ക്ക് മുന്നിലിരുത്തി ഫോട്ടോഗ്രാഫർ എന്നെ ആ യന്ത്രത്തിനുള്ളിലേയ്ക്കോ മറ്റോ കയറ്റിവിടുമെന്ന് ഭയന്നാകണം ഞാനന്ന് നിർത്താതെ കരഞ്ഞത്. ഒടുവിൽ പതിനെട്ടടവും പയറ്റി തോറ്റപ്പോൾ ഒറ്റയ്ക്കുള്ള ഫോട്ടോ വേണ്ട, കുടുംബചിത്രം മതിയെന്ന് തീരുമാനിയ്ക്കുകയായിരുന്നു. അന്നു എന്നേക്കാൾ മൂന്നുവയസ്സ് കൂടുതലുള്ള ജ്യേഷ്ഠൻ കാണിച്ച പക്വത, കാലിൻമേൽ കാലും കയറ്റിവെച്ച് പോസ്ചെയ്ത നല്ലൊരു ചിത്രമായി ഇന്നും വീട്ടിലെ ആൽബത്തിൽ കാണാം.വീടെന്ന സ്നേഹക്കൂടിൽ നിന്ന് പറിച്ചുമാറ്റപ്പെടുമോ എന്ന എന്റെ കുഞ്ഞുമനസ്സിന്റെ ഭയം നിമിത്തം നല്ലൊരു കുടുംബചിത്രംകൂടി ആ ആൽബത്തിൽ ഇടം പിടിച്ചു. എങ്കിലും തനിച്ചുള്ള ഫോട്ടോ ഇല്ലെന്ന സങ്കടം ആൽബം കാണുമ്പോഴൊക്കെ മനസ്സിൽ തോന്നാറുണ്ടായിരുന്നു. പിന്നെ ഞാൻ വളർന്ന് ഫോട്ടോഷോപ്പ് ഒക്കെ പയറ്റാൻ തുടങ്ങിയപ്പോൾ ഉമ്മച്ചിയുടെ മടിയിലിരിക്കുന്ന എന്നെ താഴെകാണും വിധമാക്കി സ്വയം ആശ്വസിച്ചു.

വീടെന്ന തണലിൽ വാപ്പിച്ചിയുടേയും ഉമ്മച്ചിയുടേയും സ്നേഹവലയത്തിലൊതുങ്ങി നിൽക്കാനായിരുന്നു എന്നുമെനിക്കിഷ്ടം. ചെറുപ്പകാലത്ത് ഇടയ്ക്കൊക്കെ വീട്ടിൽ നിന്ന് സിനിമയ്ക്ക് കൊണ്ടുപോകുമായിരുന്നു. വീട്ടിൽ നിന്ന് മൂന്ന് കിലോമീറ്റർ പോയാൽ ഒരു തീയറ്റർ ഉണ്ട്. എറണാകുളം ടൌണിൽ സിനിമ കാണാൻ പോകുന്നത് വല്ലപ്പോഴും മാത്രമായിരുന്നു. അല്ലെങ്കിൽ ആശ്രയം ഈ കൊച്ചു തീയറ്റർ തന്നെ ആയിരുന്നു. അന്ന് ടി.വി ഒക്കെ അത്രയേറെ പ്രചാരത്തിൽ വന്നിട്ടില്ലാത്തതിനാൽ, പുതിയ സിനിമകൾ റിലീസായി കുറച്ച് കാലം കഴിഞ്ഞാണ് ആ തീയറ്ററിൽ പ്രദർശിപ്പിക്കുകയെങ്കിലും സാമാന്യം തിരക്കുണ്ടാകാറുണ്ട്. സിനിമ കണ്ടാസ്വദിക്കാനുള്ള പ്രായമൊന്നും ആയിട്ടില്ലെങ്കിലും എന്തോ മഹാകാര്യത്തിന് പോകുന്നതുപോലെ ഞാനും പോയി മാതാപിതാക്കൾക്കൊപ്പം എല്ലാ സിനിമയ്ക്കും. മുന്നിലിരിയ്ക്കുന്ന ആളിന്റെ തല കാരണം ഒന്നും കാണുന്നില്ലെന്ന് പറഞ്ഞ് ബഹളംവെച്ച് കരഞ്ഞും പിന്നെ സീറ്റിന്റെ ഹാൻഡ് റെസ്റ്റിൽ കയറ്റിയിരുത്തുമ്പോൾ സമാധാനപ്പെട്ടും കഥയും കഥാപാത്രങ്ങളുമൊന്നും മനസ്സിലായില്ലെങ്കിലും ഞാൻ സിനിമകൾ കണ്ടുവന്നു. എന്നാൽ അക്കാലത്ത് സിനിമയ്ക്ക് പോകുമ്പോൾ മനസ്സിൽ ഭയം തോന്നിച്ചിരുന്നത് അവിടെ സ്ഥിരമായി കാണാറുള്ള ഒരു പ്രായംചെന്ന മനുഷ്യനായിരുന്നു. അയാൾ എന്റെ വാപ്പിച്ചിയുടെ പരിചയക്കാരനായിരുന്നിരിക്കണം. സിനിമയ്ക്ക് ടിക്കറ്റെടുക്കാൻ നിൽക്കുമ്പോഴോ മറ്റോ അയാൾ ഞങ്ങളെ കണ്ടാൽ അടുത്തുവന്ന് കുശലാന്വേഷണം നടത്തുമായിരുന്നു. എന്റെ മനസ്സിനെ അലട്ടിയിരുന്നത് ഈ കുശലാന്വേഷണത്തിനൊടുവിൽ സ്ഥിരമായി അയാൾ വാപ്പിച്ചിയോട് എന്നെ ചൂണ്ടി പറഞ്ഞിരുന്ന ഒരു ഡയലോഗാണ്. “സിനിമ കഴിഞ്ഞിറങ്ങുമ്പോൾ ഇവളെ എനിയ്ക്ക് തന്നിട്ട് പോയാൽ മതി” എന്ന്. വാപ്പിച്ചി അത് സമ്മതിയ്ക്കുകയും ചെയ്യും. പിന്നെ സിനിമ കഴിഞ്ഞ് വീടെത്തുന്നതുവരെ അയാളുടെ ആ ചോദ്യം ഒരു ഭയമായി എന്റെ മനസ്സിനെ വലയം ചെയ്യുമായിരുന്നു. എന്നെ ആരുടേയോ കയ്യിൽ നിന്ന് വിലകൊടുത്ത് വാങ്ങിയതാണെന്നുള്ള ജ്യേഷ്ഠൻവക കെട്ടുകഥകൾ കൂടിയാകുമ്പോൾ എന്റെ ഭയം പൂർണ്ണസ്ഥായിയിലെത്തും. അപ്പോഴൊക്കെയും വാപ്പിച്ചിയോട് എന്നെ അയാൾക്ക് കൊടുക്കുമോ എന്ന് ചോദിയ്ക്കുകയും ‘കൊടുക്കില്ല’ എന്ന മറുപടിയിൽ ആശ്വാസം കണ്ടെത്തുകയും ചെയ്യുമായിരുന്നു.

അതുപോലെ വീടിനുമുന്നിലൂടെ ഇടയ്ക്കൊക്കെ പോകുമായിരുന്ന ഒരു പട്ടാളക്കാരനുണ്ടായിരുന്നു. അവധിയ്ക്ക് വരുമ്പോഴായിരിക്കണം അയാളെ ഞാൻ കണ്ടിരുന്നത്. സ്കൂളിൽ എന്റെ സഹപാഠിആയിരുന്ന ആൺകുട്ടിയുടെ അച്ഛനായിരുന്നു അദ്ദേഹം. മൂന്ന് ആൺ‌മക്കളുണ്ടായിരുന്ന അദ്ദേഹത്തിന് പെൺകുട്ടികളോട് ഒരു പ്രത്യേകവാത്സല്യമുണ്ടായിരുന്നു. അതുകൊണ്ടാകണം എന്നെ വീടിന്റെ മുറ്റത്തുകാണുമ്പോഴൊക്കെ അടുത്തേയ്ക്കു വിളിയ്ക്കുകയും ലാളിയ്ക്കുകയും ചെയ്യുമായിരുന്നു. പക്ഷെ ആ സ്നേഹം ഞാനിഷ്ടപ്പെട്ടിരുന്നുവെങ്കിലും അടുത്തുചെന്നാൽ കൂടെ കൊണ്ടുപോയെങ്കിലോ എന്ന ഭയം നിമിത്തം പലപ്പോഴും അദ്ദേഹത്തിന്റെ അടുത്തേയ്ക്ക് ചെല്ലാൻ ഞാൻ മടികാണിച്ചു. വിശേഷങ്ങൾ ചോദിയ്ക്കുന്നതിനിടയിൽ ഉമ്മച്ചിയോട് “മോളൂട്ടിയെ എനിയ്ക്ക് തന്നേക്കുമോ?” എന്ന് ചോദിച്ചിരുന്നതാകാണം എന്റെ മനസ്സിനെ അയാളിൽ നിന്ന് അകറ്റിനിർത്തിയ ഭയത്തിന് കാരണം. അയാൾ സ്വന്തം കുട്ടികൾക്കായി വാങ്ങിക്കൊണ്ടുപോകുന്ന മിഠായികളിൽ ഒരു പങ്ക് എനിയ്ക്കും ലഭിയ്ക്കാറുണ്ടായിരുന്നു. അത് പെൺമക്കളില്ലാതിരുന്ന ഒരുച്ഛൻ മകൾക്കായി കാത്തുവെച്ചിരുന്ന സ്നേഹത്തിന്റെയും വാത്സല്യത്തിന്റെയും പങ്കായിരുന്നുവെന്ന് ഏറെ വളർന്നതിനുശേഷം ഇന്നെനിയ്ക്ക് മനസ്സിലാകുന്നു. കാലമേറെകഴിഞ്ഞ് അദ്ദേഹത്തിന് ഒരു അപകടത്തിൽ തലയ്ക്ക് പരിക്കേൽക്കുകയും സമനിലയ്ക്ക് കാര്യമായ തകരാറ് സംഭവിയ്ക്കുകയും ചെയ്തെന്ന് ആരോപറഞ്ഞ് ഞാ‍നറിഞ്ഞിരുന്നു. ഓർമ്മകളിൽ ഇടയ്ക്കിടെ നുണയാറുണ്ടായിരുന്ന മിഠായികളുടെ മധുരത്തിൽ വേദന പടർത്തുന്ന ഒരു അനുഭവമായിമാറി അത്.

എന്നും വീടിന്റെയും മാതാപിതാക്കളുടേയും സ്നേഹസാമിപ്യം കൊതിച്ചിരുന്ന ഞാനിന്ന് അവരിൽന്നിന്നെല്ലാം ഒരുപാടകലെയിരുന്ന് ജീവിതത്തോട് നിശബ്ദമായി പരാതി പറയുന്നു. ആരും തട്ടിപ്പറിയ്ക്കാതെ തന്നെ എത്ര കൌശലത്തോടെ ജീവിതം എന്നെ അവരിൽ നിന്ന് അടർത്തിമാറ്റിയെന്ന് ഒട്ടൊരത്ഭുതത്തോടെ ചിന്തിയ്ക്കുന്നു. തനിച്ചായിപ്പോയതിന്റെ ഭയം മറച്ചുപിടിച്ച് നിലനിൽ‌പ്പെന്ന സമരത്തിന്റെ ഭാഗമായിമാറിയിരിയ്ക്കുന്നു ഞാനും. മറവിയെന്ന കൊടുങ്കാറ്റിൽ തകർന്നുപോയ ഓർമ്മകളിൽ, ബാക്കിയായതെന്തൊക്കെയോ തേടിപ്പിടിച്ച് മനസ്സുകൊണ്ടെങ്കിലും എന്നോ നഷ്ടപ്പെട്ടുപോയ ആ കുട്ടിത്തം തിരികെപ്പിടിക്കാൻ ഇടയ്ക്കിടെ ശ്രമിയ്ക്കുന്നു. പക്ഷെ ഇന്നും നശിയ്ക്കാത്ത മറ്റുചില ഓർമ്മച്ചിത്രങ്ങൾ തിരികെ നടക്കാനാവാത്തവിധം ഞാൻ വളർന്നുപോയെന്ന് എന്നെ ഓർമ്മപ്പെടുത്തുന്നു. മുന്നോട്ട് മാത്രം ചലിയ്ക്കുന്ന സമയത്തിനൊപ്പം ജീവിതവും മുന്നോട്ട് മാത്രം.പ്രാണനിൽ കൊത്തിവെച്ചതെന്തെല്ലാമോ പറിച്ചെടുത്തുകൊണ്ട് ഒടുവിൽ 2009ഉം വിടപറയുകയാണ്. ഓർമ്മകളിലേയ്ക്ക് കുറേ നൊമ്പരപ്പൂക്കൾ സമ്മാനിച്ച വർഷം. കടന്നുപോകുന്ന ഒരോ നിമിഷങ്ങളും ഓർമ്മപ്പുസ്തകത്തിലെ വാക്കുകളോ വാചകങ്ങളോ താളുകളോ ആയി മാറിക്കൊണ്ടിരിയ്ക്കുന്നു. 2010 എനിയ്ക്കായി കാത്തുവെച്ചതെന്തൊക്കെയാകുമെന്നറിയാൻ സമ്മാനപ്പൊതി തുറക്കാൻ ജിജ്ഞാസയോടെ കാത്തിരിക്കുന്നൊരു ബാല്യത്തിന്റെ മനസ്സുമായി ഞാനും കാത്തിരിക്കുന്നു. പൊള്ളിയടർന്ന മനസ്സിനെ പുത്തൻസ്വപ്നങ്ങൾക്കായി സജ്ജമാക്കുന്നു. സമയത്തിന്റെ; ബന്ധങ്ങളുടെ; കടപ്പാടുകളുടെ; കാണാച്ചരടുകളഴിയുകയാണ്. അനുഭവങ്ങളുടെ തീവ്രത സമ്മാനിച്ച ഒരു ലാഘവത്വം മനസ്സിനെ പതുക്കെ ഭരിച്ചുതുടങ്ങിരിയിക്കുന്നു. അതെന്നെ വീണ്ടും സ്വപ്നം കാണാനും ജീവിക്കാനും പഠിപ്പിക്കുന്നു.

വരും വർഷം എല്ലാവർക്കും നല്ലതുമാത്രം സമ്മാനിക്കട്ടെ.... നന്മയും സ്നേഹവും സമാധാനവും പകർന്നു തരട്ടെ...

എല്ലാവർക്കും എന്റെ സ്നേഹം നിറഞ്ഞ പുതുവത്സരാശംസകൾ !!!!

ഒരു മഴച്ചിത്രം

2009-12-12T00:39:00.000+04:00

മഴ, എന്നുമെന്റെ പ്രീയപ്പെട്ട കൂട്ടുകാരിയാണ്. സന്തോഷത്തിന്റെയും ദു:ഖത്തിന്റെയും പ്രണയത്തിന്റെയും വിരഹത്തിന്റെയും സമ്മിശ്രഭാവങ്ങളെന്നിലേയ്ക്ക് പകരുന്ന എന്റെ ചങ്ങാതി. നാട്ടിൽ അവധിക്കാലമാഘോഷിച്ച് മടങ്ങിവരുന്ന സുഹൃത്തുക്കളോടൊക്കെയും എന്റെ ഏറ്റവുമടുത്ത ബന്ധുവിനെക്കുറിച്ചന്വേഷിക്കുന്നതുപോലെ ഞാൻ മഴയെക്കുറിച്ചന്വേഷിക്കുന്നു. തീരാത്ത ദാഹത്തോടെ മഴച്ചിത്രങ്ങൾ കണ്ടാസ്വദിക്കുന്നു. മഴകാണാൻ കൊതിക്കുന്ന മനസ്സുമായി എന്നും ഞാൻ കാത്തിരുന്നു.ആ കാത്തിരിപ്പിന് മറുപടിയെന്നപോലെ ഇന്നിവിടെ മഴപെയ്തു. വൈകിയെത്തിയ അതിഥിയെപ്പോലെ അല്പം ജാള്യതയോടെ അവൾ ദുബായിയുടെ മണ്ണിൽ പെയ്തിറങ്ങുന്ന കാഴ്ച ഫ്ലാറ്റിന്റെ ബാൽക്കണിയിൽ നിന്ന് ഏറെനേരം ഞാൻ ആസ്വദിച്ചു. പിന്നെ,വർഷത്തിലൊരിക്കൽ വിശിഷ്ടാതിഥിയെപ്പോലെ വന്നെത്തുന്ന അവളുടെ കുളിരറിയാൻ;അറിഞ്ഞൊന്നു പുൽകാൻ ഞാനുമിറങ്ങിനടന്നു. ദിവസങ്ങളായി എന്നെ അലട്ടുന്ന പനിയുടെ ആലസ്യങ്ങളെ വകവെയ്ക്കാതെ നന്നായിതന്നെ മഴ നനഞ്ഞു.

ദുബായ് ക്രീക്കിൽ ഇളകി മറിയുന്ന കടലിനെ നോക്കിയിരുന്ന് ‘സാദാ ചായ’ യുടെ കടുപ്പം നുണയുമ്പോൾ തനിച്ചാണെന്ന തോന്നൽ എന്റെ മനസ്സിനെ വല്ലാതെ അലട്ടുന്നുണ്ടായിരുന്നു. കണ്ണീരിലവസാനിയ്ക്കുമെന്നുറപ്പുള്ള അത്തരം ചിന്തകളെ വഴിതിരിച്ചുവിടാൻപറ്റിയ കാഴ്ചകൾക്കായി എന്റെ കണ്ണുകൾ ചുറ്റിനും തിരഞ്ഞു. കുറച്ചുമാറി രണ്ട് പ്രണയിതാക്കൾ കടലിനോട് ചേർന്നുള്ള കൈവരിയിൽ പിടിച്ചുനിന്ന് എന്തൊക്കെയോ കുസൃതികൾ പറഞ്ഞ് ചിരിയ്ക്കുന്നത് എനിയ്ക്ക് കാണാമായിരുന്നു. അവരുടെ സ്വകാര്യതയിലേയ്ക്ക് നോക്കിയിരിയ്ക്കാൻ എന്തോ എനിക്കപ്പോൾ സങ്കോചമൊന്നും തോന്നിയതേയില്ല.ഒരു പക്ഷിയായോ പ്രാണിയായോ അവിടെ ചെന്നിരുന്ന് അവരുടെ സല്ലാപങ്ങളുടെ ശ്രോതാവാകാൻ കഴിഞ്ഞെങ്കിലെന്ന് ആ നിമിഷമെനിയ്ക്ക് തോന്നി. കടലിനെ സാക്ഷിയാക്കിയ ആ പ്രണയത്തിന്റെ ആഘോഷം കണ്ടങ്ങനെ കുറച്ചുനേരമിരുന്നു.

കഴിഞ്ഞ വർഷത്തെ മഴയുടെ വരവ് ആലിപ്പഴം പൊഴിച്ചുകൊണ്ടായിരുന്നു. അത് പ്രണയത്തിന്റെ ഒരു ഉത്സവകാലമായിരുന്നു എനിയ്ക്ക്. ഇന്ന് സിന്ദൂരം മാഞ്ഞൊരു വിധവയുടെ മുഖം പോലെ ഞാൻ അപൂർണ്ണയാണ്. കൈമോശം വന്ന എന്തിനെയോ ഓർത്ത് തേങ്ങുന്ന മനസ്സുമായി കരിഞ്ഞുപോയ എന്റെ പ്രതീക്ഷകളുടെമേൽ ആർത്തുപെയ്യുന്നൊരു മഴയെ ഞാനിന്ന് സ്വപ്നം കാണുന്നു. ആ മഴയിൽ, സ്നേഹനഷ്ടങ്ങളാൽ ഊഷരമായിത്തീർന്ന എന്റെ മനസ്സിൽ പുതിയ സ്വപ്നങ്ങൾ തളിർക്കുമെന്നും അങ്ങനെ എന്റെ ജീവിതത്തിൽ വർണ്ണങ്ങൾ നിറയുമെന്നും ഞാൻ സങ്കൽ‌പ്പിക്കുന്നു.

പ്രണയത്തിന്റെ; സ്നേഹത്തിന്റെ മുന്തിരിച്ചാറിൽ ഈശ്വരനെന്നെ മുക്കിയെടുക്കുമെന്ന് വെറുതെയെങ്കിലും സ്വപ്നം കാണാറുണ്ടെങ്കിലും ഭൂതകാലത്തിന്റെ ഭയപ്പെടുത്തുന്ന ഓർമ്മകളും പ്രണയത്തിന്റെ തിരസ്കരണവുമെല്ലാം എന്നിൽ വളർത്തിയ അപകർഷതാബോധം ഒരു കറുത്ത പാമ്പെന്നപോലെ എന്റെ മനസ്സിനെ ചുറ്റി വരിഞ്ഞിരിയ്ക്കുന്നു. ആലസ്യത്തിന്റെ നിദ്രയിലാണ്ടതുപോലെ കിടക്കുന്നുവെങ്കിലും അതിന്റെ വിഷം ചീറ്റുന്ന പത്തി പലപ്പോഴും എന്റെ ചിന്തകൾക്കുനേരെ ഉയരുന്നു. ഒരു സ്നേഹത്തിനും അർഹതയില്ലാത്തവളാണ് ഞാനെന്ന് ഒരു ഓർമ്മപ്പെടുത്തൽ‌പോലെ ഇടയ്ക്കിടെ അതെന്നോട് മന്ത്രിക്കുന്നു. ഒരു പുരുഷന്റെ സ്നേഹത്തിന് പാത്രീഭവിക്കാൻ കഴിയാത്തവളെന്ന വിചാരം പലപ്പോഴും എന്റെ മനസ്സിനെ അസ്വസ്ഥമാക്കുന്നു. ചപലമായ ആ ചിന്ത, എന്നെ സ്നേഹിയ്ക്കുന്നവരുടെ മനസ്സിനെ മുറിപ്പെടുത്താൻ തക്കവണ്ണം ശക്തിപ്രാപിയ്ക്കുന്നതും വാക്കുകളാൽ ഞാനവരെ വേദനിപ്പിയ്ക്കുന്നതും പതിവായി മാറിയിരിയ്ക്കുന്നു.

ചിന്തകളൊരുപാട് എന്നെ ആക്രമിക്കാൻ തുടങ്ങുന്നതിനുമുൻപ് അവിടെ നിന്നെഴുന്നേറ്റു നടക്കാൻ തുടങ്ങി. ക്രീക്ക്സൈഡിലൂടെ കുറച്ചുനടന്നപ്പോൾ കണ്ടു; മഴക്കോട്ട് ധരിച്ച് മുന്നിൽ നടന്ന് വരുന്ന ഒരു ഫിലിപ്പിനോകുട്ടിയും പുറകിൽ കുടചൂടി നടന്നുവരുന്ന അവന്റെ മാതാപിതാക്കളും. മഴ ആസ്വദിയ്ക്കാനിറങ്ങിയ ഒരു കുടുംബം. ആ കുഞ്ഞിനെ കണ്ടപ്പോൾ ഓർമ്മ വന്നത് മഴക്കോട്ടണിഞ്ഞ് വാപ്പിച്ചിയുടെ സൈക്കിളിലിരുന്ന് നഴ്സറി സ്കൂളിലേയ്ക്ക് പോകുന്ന മൂന്നുവയസ്സുകാരിയായ എന്നെയാണ്. മിന്നിമറയുന്ന ചില ഓർമ്മകൾ മാത്രമേ അക്കാലത്തെക്കുറിച്ചെനിയ്ക്കുള്ളു. വെയിലും മഴയും ഒരുമിച്ചുവരുന്നത് കുറുക്കന്റെ കല്യാണത്തിനാണെന്ന സങ്കല്പം ആരാണെന്റെ മനസ്സിലേയ്ക്ക് പകർന്നുതന്നതെന്ന് ഇന്ന് ഓർത്തെടുക്കാനാകുന്നില്ല. എന്റെ നഴ്സറിക്കാലത്തെ ഏതോ ഒരവധി ദിവസം അത്തരത്തിൽ മഴപെയ്തത് ഇന്നും ഞാൻ നന്നായി ഓർക്കുന്നു. വിവാഹത്തിനും മറ്റും സമ്മാനങ്ങൾ പൊതിഞ്ഞ് നൽകാറുള്ള പിങ്ക്നിറത്തിൽ പൂക്കളുള്ള വർണ്ണകടലാസിൽ എന്റെ പുസ്തകങ്ങളൊക്കെ പൊതിഞ്ഞെടുത്ത് കുറുക്കന്റെ കല്യാണത്തിന് പങ്കെടുക്കാൻ സമ്മാനവുമായി പോകുന്ന ഒരു ക്ഷണിതാവിനെപ്പോലെ ഞാൻ മുറ്റത്ത് മഴയിലിറങ്ങി നടന്നത് മഴയെക്കുറിച്ചുള്ള എന്റെ ഓർമ്മചിത്രങ്ങളിൽ ആദ്യത്തേതാണ്. എന്റെ സുന്ദരമായ ബാല്യത്തിന്റെ നല്ലൊരോർമ്മച്ചിത്രം. തെളിഞ്ഞ വെയിലിൽ പെയ്യുന്ന മഴയിൽ കുളിച്ചുനിൽക്കുന്ന ഒരു കുറുക്കനും അവന്റെ മണവാട്ടിയും എന്റെ കുഞ്ഞുമനസ്സിന്റെ ഭാവനയിൽ അന്നുണ്ടായിരുന്നിരിക്കാം. തീർച്ചയായും അത്ര നിഷ്കളങ്കമായ മനസ്സോടെ മഴയെ അറിഞ്ഞ ഒരു സന്ദർഭവും പിന്നീട് എന്റെ ജീവിതത്തിലുണ്ടായി കാണില്ല. പിന്നെയുമുണ്ട് ബാല്യത്തിന്റെ മഴച്ചിത്രങ്ങൾ. വരാന്തയിൽ മഴച്ചാറ്റൽ വീണുകിടക്കുന്ന നിലത്ത് പേരെഴുതിവെയ്ക്കുന്നതും അരമതിലിന്റെ ഇരുമ്പഴികൾക്കിടയിലൂടെ കാലുകളിട്ടിരുന്ന് മഴ കണ്ടിരിയ്ക്കുന്നതും പിന്നെ ഓരോ മഴക്കാലത്തും അതിരാവിലെ ആദ്യം പത്രമെടുക്കാൻ ജ്യേഷ്ഠനോട് മത്സരിച്ചോടുന്നതിനിടയിൽ മുറ്റത്ത് പായലിന്റെ വഴുക്കലിൽ തെന്നിവീഴുന്നതുമൊക്കെയായി ഓർമ്മകളിൽ മഴ ആർത്തിരമ്പുന്നു.

കുളിരുപകർന്ന് കടന്നുപോയൊരു മഴക്കാറ്റിൽ ഓർമ്മകളുമെന്നോട് തൽക്കാലം വിടപറഞ്ഞു. തണുപ്പിന്റെ കാഠിന്യം കൂടിക്കൊണ്ടിരുന്നു. ഞാനിട്ടിരുന്ന ജീൻസിന്റെ കീഴ്ഭാഗം പൂർണ്ണമായും നനഞ്ഞിരുന്നു.ഇടയ്ക്കിടെ വീശുന്ന കാറ്റിൽ ശരീരം വിറകൊള്ളാൻ തുടങ്ങിയിരുന്നു. വന്ന വഴിയിലൂടെ തന്നെ തിരികെ നടന്നു. മഴകാണാനിറങ്ങിയവരൊക്കെ മടങ്ങിപ്പോകാൻ തുടങ്ങിയിരിയ്ക്കുന്നു. പ്രണയരഹസ്യങ്ങൾ കൈമാറിനിന്നിരുന്ന ആ പ്രണയിതാക്കളും സ്ഥലംവിട്ടിരുന്നു.ദീർഘമായ ഒരു നടത്തത്തിനൊടുവിൽ ബസ്സ്‌സ്റ്റേഷനിൽവന്ന് താമസ സ്ഥലത്തേയ്ക്കുള്ള ബസ്സിൽ കയറിയിരുന്നു. കഴിഞ്ഞതവണ കാണാൻ പോയപ്പോൾ സുഹൃത്തായ സനേഷ് സമ്മാനിച്ച ബസ് കാർഡ് ആദ്യമായി ഉപയോഗിച്ചത് അപ്പോഴായിരുന്നു. ഏറെക്കാലത്തിനുശേഷം ഒരു ബസ്സ്‌യാത്ര തരമായി. ആകെ മൂന്നുയാത്രക്കാരുമായി നീങ്ങിയ ബസ്സിലിരുന്ന് വെറുതെ പുറത്തെ കാഴ്ചകളിലേയ്ക്ക് കണ്ണുനട്ടിരുന്നു. ഹെഡ്ഫോണിൽ കേട്ടിരുന്ന സംഗീതത്തിൽ സ്വയം മറന്നിരിയ്ക്കുമ്പോൾ മനസ്സ് ശാന്തമായിരുന്നു; ശൂന്യവും. പുറത്തപ്പോഴും വിട്ടുമാറാത്ത എന്റെ കണ്ണീരുപോലെ മഴ ചിന്നിചിന്നി പെയ്തുകൊണ്ടിരുന്നു.

ഒരു യാത്രയുടെ തുടക്കം

2009-12-10T13:11:00.000+04:00

മരുഭൂമിയിലെ ശൈത്യം ഇത്തവണ വന്നപാടെയെനിയ്ക്ക് സമ്മാനിച്ചത് വിട്ടുപോകാൻ മനസ്സില്ലാതെ ഇടയ്ക്കിടെ അടിമുടി തലോടുന്ന പനിക്കുളിരാണ്. ശരീരം നുറുങ്ങുന്ന വേദനയും ഒപ്പം കണ്ണുകളിൽ പെറ്റുപെരുകുന്ന തീച്ചൂടും. അതിന്റെ കൂടെ മനസ്സിനുകൂടി മൌഢ്യം ബാധിച്ചപ്പോൾ ഇരുളാൻ തുടങ്ങുന്ന പകലിന്റെ വ്യഥപോലെ എന്തോ ഒന്ന് എന്നെയാകെ പിടികൂടിയിരിയ്ക്കുന്നു. ഒരുപക്ഷെ ഈ ഒരു മൌഢ്യം താൽക്കാലികമാകാം. വീണ്ടും സ്വപ്നങ്ങളുടെ വർണ്ണലോകത്തേയ്ക്ക് ഞാൻ പറന്നുയർന്നേക്കാം. അതല്ലെങ്കിൽ കനത്തുവരുന്ന ഇരുളെന്നെ പൂർണ്ണമായും മൂടിയേക്കാം. ചിരികൊണ്ട് മറയിട്ടൊതുക്കിനിർത്തിയ എന്റെ ജീവിതത്തിന്റെ ഉയർച്ചകളും താഴ്ച്ചകളും ചുഴികളും തിരകളും പിന്നെയിടയ്ക്കൊക്കെ താൽക്കാലികമായി ചെന്നടിഞ്ഞ തീരങ്ങളുമെല്ലാം ഒറ്റനോട്ടത്തിൽ മൂടൽമഞ്ഞിലൂടെയുള്ള കാഴ്ചപോലെ അവ്യക്തമാണ്.അതുകൊണ്ടുതന്നെ ഒരു തിരിച്ചുപോക്ക് അനിവാര്യമാകുന്നു. കെട്ടിയാടിയ വേഷങ്ങളുടെ കപടതകൾക്കിടയിലെവിടെയോ വേർതിരിച്ചെടുക്കാനാവാതെ കുരുങ്ങിപ്പോയ ‘എന്നെ’ തിരഞ്ഞുള്ള ഒരുയാത്ര.
ഇതുവരെയുള്ള ജീവിതം കൊണ്ട് ഞാൻ നേടിയെടുത്തത് അനുഭവങ്ങളുടെ കനലിൽ വാർത്തെടുത്ത; ഇനിയും തളരാൻ മടിയ്ക്കുന്ന ഒരു മനസ്സുമാത്രമാണ്. ദുരന്തങ്ങളുടെ കാട്ടുതീ പടരുമ്പോഴും നഷ്ടങ്ങളിൽ കാലിടറുമ്പോഴും സ്വപ്നം കാണാനും പ്രതീക്ഷകളുടെ ചിറകിലേറി ആകാശം‌മുട്ടെ പറക്കാനും എന്നെ പ്രാപ്തയാക്കുന്നത് എനിയ്ക്ക് പോലും പലപ്പോഴും അപരിചിതമാകുന്ന എന്റെ മനസ്സാണ്. ചിലപ്പോൾ ആ മനസ്സ് ഞാനെന്ന യാഥാർത്ഥ്യത്തിന്റെ നേർക്കാഴ്ചയാകുമ്പോൾ മറ്റുചിലപ്പോൾ എന്നിൽ നിന്ന് യുഗങ്ങളുടെ അന്തരം തീർത്ത് എന്നെ തന്നെ അത്ഭുതപ്പെടുത്തുന്നു.

ഞാനെന്നും ഒരു സ്നേഹാന്വേഷിയായിരുന്നു. സ്നേഹം എത്രകിട്ടിയാലും മതിവരാത്ത ആർത്തിപിടിച്ച എന്റെ മനസ്സ് എപ്പോഴും അതിനുപിന്നാലെ പാഞ്ഞു.എനിയ്ക്ക് ചുറ്റിനും സ്നേഹംകൊണ്ടുതീർക്കപ്പെട്ട മതിൽക്കെട്ടുകൾ ഭേദിച്ച് ഞാൻ പുതിയ സ്നേഹങ്ങൾ തേടി നടന്നു. കൌമാരമെത്തിയപ്പോൾ ആ അന്വേഷണം പ്രണയത്തിന്റെ വഴിയിലൂടെയായി. പക്ഷെ പ്രണയവും സ്നേഹത്തിന്റെ പുതിയ അർത്ഥങ്ങൾ കണ്ടെത്തുവാനായുള്ള എന്റെ പരീക്ഷണമായിരുന്നു.തേടി നടന്നത് കയ്യിൽ കിട്ടിയപ്പോഴൊക്കെ കളിപ്പാട്ടം കിട്ടിയ കുട്ടിയെപ്പോലെയായി മനസ്സ്. കൂടെക്കൊണ്ടു നടന്ന് സ്നേഹിച്ചും ഇറുകെ പുണർന്നുകിടന്ന് ഉറങ്ങിയും മടുക്കുമ്പോൾ താൽക്കാലികമായി ഉപേക്ഷിച്ചും വീണ്ടും തിരികെയെടുത്തും ഞാൻ ഒരോ നിമിഷങ്ങളും ആസ്വദിച്ചു. പക്ഷെ ഓരോ സ്നേഹവും സ്വാർത്ഥതയുടെ അതിർവരമ്പുകൾ തീർക്കാൻ തുടങ്ങുമ്പോൾ എന്റെ മനസ്സ് പലപ്പോഴും എനിക്കപരിചിതയായി. ഞാൻ സ്നേഹത്തിന്റെ ആ വേലിക്കെട്ടിനുള്ളിൽ നിൽക്കാൻ കൊതിയ്ക്കുമ്പോൾ തനിയെ പറക്കുന്ന പക്ഷിയുടെ സ്വാതന്ത്ര്യം കാട്ടിത്തന്ന് എന്റെ മനസ്സെന്നെ ആശയക്കുഴപ്പത്തിലാക്കുമായിരുന്നു. രാത്രിസ്വപ്നങ്ങളിൽ പലപ്പോഴും ഞാൻ തനിച്ചു പറക്കാൻ തുടങ്ങി. പകൽ‌വെളിച്ചത്തിൽ ഞാൻ തനിച്ചാകാൻ ഇഷ്ടപ്പെട്ടതേയില്ല. പക്ഷെ ആ സ്വപ്നങ്ങൾ ഞാൻ ആഗ്രഹിക്കാതെ തന്നെ പലതവണ യാഥാർത്ഥ്യമായി. ജീവിതവഴികളിൽ പലപ്പോഴും ഞാൻ തനിച്ചായി. പക്ഷെ സ്നേഹത്തിന്റെ ഓരോ നഷ്ടങ്ങളിലും ഞാൻ വല്ലാതെ ദു:ഖിച്ചു. തനിയെ പറക്കുന്ന പക്ഷിയുടെ അതിരുകളില്ലാത്ത സ്വാതന്ത്ര്യത്തിനും മേലെയുള്ള മൌനവും ഏകാന്തതയും പലപ്പോഴും എന്നെ ഭ്രാന്തമായി കരയിച്ചു. സ്നേഹത്തിന്റെ സുരക്ഷതേടി എന്റെ ആത്മാവ് വീണ്ടുമലയാൻ തുടങ്ങുന്നത് അപ്പോഴാകും.

അടുക്കികൂട്ടുന്ന ഓർമ്മചിത്രങ്ങളിൽ വേഷങ്ങളുടെ കപടതയില്ലാത്ത ഞാനുണ്ടാകും. എന്റെ ചിന്തകളും സ്വപ്നങ്ങളും പ്രണയങ്ങളും പ്രതീക്ഷകളും നേട്ടങ്ങളും നഷ്ടങ്ങളും സന്തോഷങ്ങളും ദു:ഖങ്ങളുമുണ്ടാകും; ദുരന്തം മുന്നിട്ടുനിൽക്കുന്ന ജീവിതാനുഭവങ്ങളുണ്ടാകും. കൂട്ടിവായിച്ചാൽ കിട്ടുന്നതെന്തായാലും അതാകുമെന്റെ ജീവിതം. ജീവിതപ്പുസ്തകത്തിൽ നിന്നും ഞാൻ തന്നെ പലപ്പോഴായി കീറിയെടുത്തു ദൂരെയെറിഞ്ഞ താളുകൾ കാലമിന്നും കാത്തുവെച്ചിരിയ്ക്കുന്നു. അവയോരോന്നും തേടിയുള്ള എന്റെ യാത്ര ഞാനിവിടെ തുടങ്ങുന്നു.......

എന്റെ ഒരു ചെറിയ സന്തോഷം....

2009-11-03T12:37:00.000+04:00

ആദ്യമായിട്ടാണ് ഏതെങ്കിലും ഒരു അച്ചടി മാധ്യമത്തിൽ ഞാനെഴുതിയത് പ്രസിദ്ധീകരിയ്ക്കുന്നത്. ആ സന്തോഷം നിങ്ങളുമായി പങ്കുവെയ്ക്കുന്നു.

.

പുനർജന്മം

2009-05-14T15:21:00.000+04:00

ഇനിയുള്ള ജന്മമൊരു പ്രകാശത്തുണ്ടായി പിറക്കണം
ഏതോ ഇരുട്ടുമുറിയിലെ ഇടുങ്ങിയ പഴുതിലൂടൊഴുകി
ചിന്നിച്ചിതറാതെ ഒരൊറ്റബിന്ദുവിൽ പൊഴിഞ്ഞൊതുങ്ങി-
യതിൽ തന്നെ ജന്മമൊടുങ്ങുംവരേയുമങ്ങനെ...

അല്ലെങ്കിലുണങ്ങിവരണ്ട മണ്ണിൽ വീണൊരു മഴത്തുള്ളി;
ആത്മാവിന്റെ ദാഹത്തിലേയ്ക്കൊലിച്ചിറങ്ങുന്നമാത്രയിൽ,
ഒരുനുള്ളുമണ്ണിനെ പുണർന്നില്ലാതെയാകുമ്പോഴും,
ബാക്കിയാവുന്നൊരു നനവിന്റെ ചെറുകണിക.

സഫലമാകാത്തൊരു ജന്മത്തിന്റെയൊടുക്കം,
നീറിയില്ലാതാകുമ്പോഴും ബാക്കിയാകുന്ന മോഹച്ചിന്തുപോലെ
ഞാനുമുണ്ടാകുമെന്നും; മരണത്തിനൊടുക്കമെത്തുന്ന-
മഴയിലോ വെയിലിലോ... പിറവിതേടുന്നൊരു ഭ്രൂണമായ്

പരീക്ഷകള്‍

2008-08-27T13:14:00.000+04:00

ഞാനിപ്പോഴും സ്വപ്നം കാണാറുണ്ട്
പഠിക്കാതെയെഴുതുന്ന പരീക്ഷകളും
ഉത്തരങ്ങളില്ലാത്ത വെള്ളക്കടലാസും
എഴുതിയിട്ടും തെളിയാത്ത പേനകളും

സ്വപ്നത്തിലും തോല്‍‌വിയെ ചിന്തിച്ച്
വിളറി വിയര്‍ത്ത് പരവശയാകാറുണ്ട്
ഭയം വേരിറങ്ങിയ മനസ്സുണരുമ്പോള്‍
സ്വപ്നമെന്നറിഞ്ഞാശ്വസിക്കാറുമുണ്ട്

എന്നാലുണര്‍ന്നിരിക്കുമ്പോഴും മനസ്സില്‍-
കുറേ ഉത്തരമില്ലാത്ത ചോദ്യങ്ങളുണ്ടാകും
ആ പരീക്ഷയില്‍ പതറിപ്പായുന്ന മനസ്സ്
ഭയത്തിന്റെ ചൂടില്‍ ചുരുങ്ങിചെറുതാകാറുണ്ട്

മനസ്സിന്റെ പിടിയിലൊതുങ്ങാത്ത സമസ്യകള്‍-
പൂരിതമാകുന്നത് കല്ലറ‌കള്‍ക്കുള്ളില്‍ വെച്ചാകും
അതല്ലായിരുന്നുവെങ്കില്‍ ഉത്തരമില്ലാത്ത-
ചോദ്യങ്ങളായി ജന്മങ്ങളൊടുങ്ങില്ലായിരുന്നു

.

പിണക്കം

2008-08-10T13:13:00.000+04:00

അവനിന്നു വിഷയം,
ഞാനിട്ട കറുത്ത കുപ്പായത്തിന്റെ
സുതാര്യമായ കൈകളായിരുന്നു.
ഇനി ഇതിടേണ്ടെന്നതിലെ ശകാരം
മനസ്സില്‍ പെറ്റുപെരുകി.

ഞാനവനുമാത്രമെന്ന അവകാശം
വാക്കുകളിലൊളിഞ്ഞിരിക്കുന്നത്
കണ്ടില്ലെന്ന് നടിച്ച് പരിഭവിക്കാന്‍‍
മനസ്സേറെ തിടുക്കം കൂട്ടി.

സ്നേഹക്കുറവിന്റെ കള്ളക്കണക്കുനിരത്തി
പരാതികളുടെ അക്ഷയപാത്രമായി.
കരഞ്ഞും കലഹിച്ചുമവന്റെ ദിവസം
സ്വന്തമാക്കിയെന്ന് തൃപ്തിപ്പെട്ടു.

ഒരു മുത്തമുതിര്‍ത്ത ചൂടില്‍
പിണക്കത്തിന്റെ മഞ്ഞുമല
ഉരുകിയൊലിച്ചില്ലാതാകവേ
നൊമ്പരപ്പെട്ടതെന്തിനെന്നറിയാതെ
പരിഭവക്കൂടിനെ അടച്ചുവെച്ചു

ഒരുപാടിഷ്ടപ്പെട്ടുവാങ്ങിയ കുപ്പായം
വെറുപ്പോടെ ദൂരെയെറിയുമ്പോള്‍
എന്തിനാവും എന്റെ ചുണ്ടില്‍
ഒരു കള്ളച്ചിരി പടര്‍ന്നത്?

.

അവള്‍‌ യാത്രയായി.....

2008-07-27T09:22:00.000+04:00

അവള്‍‌ യാത്രയായി, ദു:ഖങ്ങളില്ലാത്ത; യാതനകളില്ലാത്ത ലോകത്തേയ്ക്ക്

ഇവിടെ ഒരിക്കല്‍ ഞാന്‍‌ അവളെക്കുറിച്ചെഴുതിയിരുന്നു; എന്നെങ്കിലും അവള്‍ ഞങ്ങളുടെ ചങ്ങാത്തിക്കൂട്ടത്തിലേയ്ക്ക് തിരികെപറന്ന് വരുമെന്ന പ്രതീക്ഷ എന്റെ ബൂലോക ചങ്ങാതിമാരോട് പങ്കുവെച്ചിരുന്നു. പക്ഷെ പ്രതീക്ഷകളൊക്കെയും വ്യര്‍ത്ഥമാക്കിക്കൊണ്ട് അവള്‍ മരണത്തിന്റെ ലോകത്തേയ്ക്ക് പറന്നകന്നു.

കപടസ്നേഹത്തിന്റെ വലയിലകപ്പെട്ടവള്‍ ആരെ തോല്‍പ്പിക്കാനാകും മരണത്തെകൂട്ടുപിടിച്ചത്? പക്ഷെ മരണം പോലും അന്നവള്‍ക്ക് കൂട്ടുനിന്നില്ല. മരണത്തിനും ജീവിതത്തിനുമിടയിലെ നൂല്‍പ്പാലത്തില്‍ അവള്‍ തള്ളി നീക്കിയത് യൌവ്വനത്തിന്റെ വിലപ്പെട്ട അഞ്ച് വര്‍ഷങ്ങള്‍. ഒടുവില്‍ മാതാപിതാക്കള്‍ക്കും ബന്ധുക്കള്‍ക്കും ചങ്ങാതിമാര്‍ക്കും ഒരിക്കലും തീരാത്ത നൊമ്പരം സമ്മാനിച്ച് അവള്‍ ജീവിതത്തില്‍നിന്ന് പടിയിറങ്ങി. ഇരുപത്തിയേഴുവര്‍ഷത്തെ ആ ജീവിതം, അതിലെ കളിയും ചിരിയും കണ്ണീരുമെല്ലാം ഒരു കോളം വാര്‍ത്തയിലും കുസൃതിച്ചിരിയോടെ നില്‍ക്കുന്ന ചിത്രത്തിലും പ്രീയപ്പെട്ടവരുടെ മനസ്സിലും മാത്രമായി ഒതുങ്ങുന്നു.

പ്രീയപ്പെട്ട കൂട്ടുകാരീ, നീ ഇനി ഇല്ലെന്ന് വിശ്വസിക്കാന്‍ ഇപ്പോഴും കഴിയുന്നില്ല. നിനക്കായ് രണ്ടുതുള്ളി കണ്ണീര്‍ പൊഴിക്കാന്‍‌ പോലും ഇന്നെനിയ്ക്കാവുന്നില്ല. പകരം ആഴമേറിയ ഭീതിതമായ ഒരു മൌനം മനസ്സില്‍ കൂടുകെട്ടുന്നു. നിന്റെ വിയോഗം സൃഷ്ടിച്ച നഷ്ടത്തോളം തന്നെ ആഴമേറിയത്..... എപ്പോഴും പ്രണയത്തെക്കുറിച്ച് വാചാലമാകുന്ന എന്റെ തൂലികയും ഇന്ന് മൌനിയാകുന്നു. അതിനാല്‍ ആരോ എന്നോ എഴുതിയ ഈ വാചകം ഞാനിവിടെ കൂട്ടുച്ചേര്‍ക്കുന്നു. പ്രണയിക്കുന്ന എല്ലാ മനസ്സുകള്‍ക്കും ഒരു ഓര്‍മ്മപ്പെടുത്തല്‍ പോലെ........

“Don't let someone become a priority in your life,when you are just an option in their life..... Relationships work best when they are balanced.”

എന്റെ വരികളില്‍ നീ വായിക്കുന്നത്.......

2008-07-22T10:03:00.000+04:00

എന്റെ വരികളില്‍‌ നീ വായിക്കുന്നതെന്താണ്?

കാണുന്നത് അടുക്കിവെച്ച അക്ഷരങ്ങളെങ്കിലും

വായിക്കപ്പെടുന്നത് തുറന്നുവെച്ചയെന്റെ മനസ്സല്ലേ?

അക്ഷരങ്ങളെ പൊതിഞ്ഞു നില്‍ക്കുന്ന

നനുത്ത മഞ്ഞ് നീ കാണുന്നില്ലേ?

അത് നിന്നെ പൊതിയുന്ന എന്റെ സ്നേഹമാണ്.

വാക്കുകളിലെ നനവ് നീ തൊട്ടറിയുന്നുണ്ടോ?

അത് ഞാന്‍ പൊഴിച്ച കണ്ണുനീരിന്റെ

ഇനിയുമുണങ്ങാത്ത ചാലുകളാണ്

വരികള്‍ക്കിടയിലൊളിഞ്ഞിരിയ്ക്കുന്നയകലം;

മൌനത്തിന്റെ കൂടിനുള്ളില്‍‌ ഞാനൊളിപ്പിച്ച

പ്രണയത്തിന്റെ മഴക്കാലമാണ്.

അതിലെ സൂര്യനും നിലാവും താരകങ്ങളും

നിന്നെ കാണുന്ന എന്റെ മിഴികള്‍ പോലെ

നിനക്കായ് മാത്രം പ്രകാശിതമാകും.

എന്റെ സ്വപ്നങ്ങളുടെയലകളും ചുംബനത്തിന്റെ ചൂടും

പറഞ്ഞാല്‍ തീരാത്ത പരിഭവങ്ങളുടെ ശോണിമയും

നിനക്കായ് മാത്രം പകുത്തു വെച്ചിട്ടുണ്ട്.

നീയറിയുന്നില്ലേ; അറിയാതിരിക്കാന്‍‌ നിനക്കാവില്ല;

ഇതൊക്കെയും നീ മാത്രമറിയുന്ന

എന്റെ ആത്മാവിന്റെ സ്പന്ദനങ്ങളാണ്.

അസത്യം ജനിച്ചപ്പോള്‍ മരിച്ചത്.......

2008-07-16T15:47:00.000+04:00

തുളുമ്പി വീഴാന്‍‌ തുടങ്ങുകയായിരുന്നു

അനുസരണയില്ലാത്ത വാക്കുകള്‍

താഴെ വീണ് ചിതറും മുന്‍പ് മനസ്സെന്ന-

മൂശയിലിട്ടുരുക്കി പതം വരുത്തി മിനുക്കി

വെളുത്ത താളില്‍‌ അടുക്കിയും തിരിച്ചും

ക്രമംതെറ്റാതെ നിരത്തിവെച്ചു

അര്‍ത്ഥപൂര്‍‌ണ്ണമായ ആശയസമ്പന്നതയില്‍‌

ചിരിയും ചിന്തയും ചോദ്യങ്ങളും സമന്വയിച്ചു;

സത്യത്തിന്റെ മൂര്‍ച്ചയേറിയ വാക്കുകളാല്‍

കവിയുടെ കയ്യിലും മനസ്സിലും രക്തം കിനിഞ്ഞു

ഒഴുകിയിറങ്ങിയ രക്തത്തുള്ളികളില്‍‌

വരികള്‍‌ ശാക്തീകരിക്കപ്പെട്ടു

ഉപാധികളിലുടക്കിയ മനസ്സില്‍ നിന്ന്

അസത്യം അവിഹിതജന്മമെടുത്തപ്പോള്‍

കവിത മരിച്ചു; കവിയും.

ഒന്ന് കൊലചെയ്യപ്പെട്ടെതെങ്കില്‍‌

മറ്റേത് ആത്മഹത്യയായിരുന്നു.

ഇടവഴിയുടെ ഗന്ധം

2008-07-09T16:42:00.000+04:00

പ്രഭാതത്തില്‍ പാല്‍ക്കാരിയമ്മയുടെ-
പാത്രത്തില്‍ നിന്നു തുളുമ്പിവീണ
പാല്‍ത്തുള്ളികളുടെ വാത്സല്യമുള്ള ഗന്ധം

സൌജന്യമരുന്നുമായി മടങ്ങുന്നനേരം
അയലത്തെ അമ്മൂമ്മ കാറ്റിനു സമ്മാനിച്ച
തൈലത്തിന്റെയും കഷായത്തിന്റെയും ഗന്ധം

കൂലിവേലയ്ക്ക് പോകുന്ന തമിഴ് മക്കളുടെ

കറുത്തിരുണ്ട ശരീരത്തിലെ വിയര്‍പ്പിന്റെയും

പേരറിയാത്ത എണ്ണയുടേയും ഗന്ധം

സന്താനങ്ങളുടെ ജീവിതസമരത്തിനിടയില്‍

ഒറ്റപ്പെട്ടുപോയ ഒരമ്മയുടെ കാത്തിരിപ്പിന്റെയും,

നെടുവീര്‍പ്പുകളുടെയും കണ്ണീരുപ്പലിഞ്ഞ ഗന്ധം

വില്പനയുടെ ലാഭനഷ്ടങ്ങളെയരിച്ചെടുത്തിടയില്‍
പീടികക്കാരന്‍ നുള്ളിയെടുത്തു വലിയ്ക്കുന്ന
മൂക്കില്‍‌പൊടിയുടെ തുമ്മലുണ്ടാക്കുന്ന ഗന്ധം

പഠനദിനത്തിന്റെ ഇടവേളകളില്‍
ബാല്യത്തിലെ ചങ്ങാത്തങ്ങള്‍ നുണഞ്ഞിറക്കുന്ന
ശര്‍ക്കരമിഠായിയുടെ മാധുര്യമുള്ള ഗന്ധം

വഴിയില്‍ കാത്തുനില്‍ക്കുന്ന കാമുകന്റെയും
കണ്ടിട്ടും കാണാതെ നടന്നു നീങ്ങുന്ന കാമുകിയുടെയും
മൌനപ്രണയത്തിന്റെ മുല്ലപ്പൂഗന്ധം

അങ്ങനെ എത്രയെത്ര ഗന്ധങ്ങളാണ്
ആ ഇടവഴി എനിക്കായി കാത്തുവെക്കാറുള്ളത്!
ഞാനൊരുപാടിഷ്ടപ്പെടുന്ന എന്റെ നാടിന്റെ സുഗന്ധം.....

പിറക്കാനിരിയ്ക്കുന്ന എന്റെ മകള്‍ക്ക്.....

2008-06-25T11:57:00.000+04:00

എന്നോ പിറക്കാനിരിയ്ക്കുന്ന എന്റെ പൊന്നുമകള്‍ക്ക്,

എന്നുമുതലാണ് നിന്റെ കുഞ്ഞു മുഖം എന്റെ സ്വപ്നങ്ങളിലേയ്ക്ക് വിരുന്നു വരാന്‍ തുടങ്ങിയത്? ഋതുമതിയായ നാളിലോ, അതോ ആദ്യം മനസ്സില്‍ പ്രണയത്തിന്റെ നൂലിഴ പാകിയപ്പോഴോ; അതുമല്ലെങ്കില്‍‌ കൂട്ടുകാരന്റെ കൈപിടിച്ച് വിവാഹസ്വപ്നങ്ങള്‍ക്ക് നിറമേകുമ്പോഴോ...അറിയില്ല. പക്ഷെ എപ്പോഴും നീ ഒരു കുഞ്ഞു മാലാഖയായി എന്റെ സ്വപ്നങ്ങളില്‍ വന്നെന്നെ കൊതിപ്പിച്ചുകൊണ്ടേയിരിയ്ക്കുന്നു.

എന്നെങ്കിലും നീ എന്റെ സ്വപ്നങ്ങളില്‍ നിന്ന് യാഥാര്‍ത്ഥ്യത്തിലേയ്ക്ക് കൂടുമാറാം. എന്റെ ശരീരത്തില്‍ ഒരു കുഞ്ഞുമൊട്ടായി മുളയെടുക്കാം. ആ ദിവസത്തെയായിരിക്കും ഞാന്‍ മറ്റെന്തിനേക്കാളും സ്നേഹിക്കുക.പക്ഷെ, ഇന്ന് ഈ ലോകത്തെ എനിയ്ക്ക് ഭയമാണ്. അന്തമില്ലാത്ത ഇരുട്ടുപോലെ ആഴമേറിയ ഭയം. നിന്നെ ഇവിടേയ്ക്ക് കൊണ്ടുവരാന്‍‌ ഞാന്‍‌ വല്ലാതെ ഭയക്കുന്നു. ഈ ലോകം അത്രമേല്‍‌ നശിച്ചിരിക്കുന്നു. കുഞ്ഞുമാലാഖമാരിലും കാമത്തിന്റെ അര്‍ത്ഥം തേടുന്ന കഴുകന്മാരാണ് ഇവിടെ മുഴുവനും. കൊച്ചരിപ്പല്ലുകാട്ടി ചിരിയ്ക്കുന്ന നിഷ്കളങ്കത നിറഞ്ഞ കുഞ്ഞുമുഖങ്ങളില്‍; എങ്ങനെയാണവര്‍ക്ക് ആഭാസനോട്ടമെറിയാന്‍‌ കഴിയുന്നത്? കുട്ടിത്തം തുളുമ്പുന്ന പിഞ്ചുശരീരങ്ങളില്‍‌ എങ്ങനെയാണ് കാമപൂരണം നടത്താന്‍‌ തോന്നുന്നത്? അല്ലെങ്കിലും എന്റെ പൊന്നോമനയ്ക്കെന്തറിയാം; നിന്റെ ലോകത്ത് നന്മകള്‍‌ മാത്രമല്ലേയുള്ളു. പക്ഷെ ഞാന്‍‌ ജീവിക്കുന്ന ഈ ഭൂമിയിലിന്ന് തിന്മകള്‍ മാത്രം!!!

കാലത്തെ പിടിച്ചുനിര്‍ത്താന്‍‌ കഴിയുമായിരുന്നെങ്കിലെന്ന് ഞാന്‍‌ വല്ലാതെ ആശിക്കുന്നു. എങ്കില്‍‌ മനസ്സിലെ ചെല്ലത്തൊട്ടിലിലെന്ന പോലെ എന്റെ ശരീരത്തിനുള്ളില്‍ തന്നെ നിന്നെ ഞാന്‍‌ കൊണ്ടുനടക്കുമായിരുന്നു. പരുന്തിന്‍ കാലുകളില്‍‌പെടാതെ, കഴുകന്‍‌കണ്ണുകള്‍‌ പതിയാതെ എന്റെ ചിറകിന്‍ കീഴില്‍‌ നിന്നെ ഞാന്‍‌ സൂക്ഷിക്കുമായിരുന്നു. മനസ്സുകൊണ്ട് സ്വപ്നങ്ങളില്‍‌ അമ്മയാകുന്ന ഞാന്‍‌ ഇത്ര ഭയക്കുന്നുവെങ്കില്‍‌ ഓരോ ദിവസവും ലോകത്തിന്റെ ക്രൂരതയുടെ മുന്നിലേയ്ക്ക്, അവരുടെ വിധിയുടെ, അല്ലെങ്കില്‍ വിശ്വാസത്തിന്റെ ബലത്തില്‍‌ സ്വന്തം കുഞ്ഞുങ്ങളെ പറഞ്ഞയയ്ക്കുന്ന ഓരോ അമ്മമാരും ഇതാഗ്രഹിയ്ക്കുന്നുണ്ടാകില്ലേ.... ഉണ്ടാകും. ഈ ലോകത്തിന്റെ ഇന്നത്തെ അവസ്ഥയ്ക്കുമുന്നില്‍‌ ഏത് അമ്മയാണ് പതറാത്തത്; ഭയക്കാത്തത്!

ഇന്ന് ഞാനാഗ്രഹിക്കുന്നു; പ്രതീക്ഷിക്കുന്നു... നല്ലൊരു നാളെ വരുമെന്ന്. എന്റെ പ്രാണന്റെ കുരുന്നായ നീയും കൂടെ നിന്നെപ്പോലെ അനേകം കുഞ്ഞുങ്ങളും പ്രാണഭയമില്ലാതെ മാനഭയമില്ലാതെ ഈ ലോകത്തു ജീവിക്കുന്ന നാള്‍. അതിനിയുണ്ടാകുമോ? അറിയില്ല. അതിനായി പ്രാര്‍ത്ഥിക്കാന്‍ മാത്രമേ എനിയ്ക്കു കഴിയുന്നുള്ളു. പാപത്തിന്റെ ഇരുട്ടുകയറിയ മനസ്സുകളില്‍‌ സ്നേഹത്തിന്റെ; അറിവിന്റെ; കനിവിന്റെ; പൊന്‍‌തിരിവെട്ടം തെളിയ്ക്കുന്ന സൂര്യന്‍ ഉദിച്ചുയരുന്ന നാളിനായ് കാത്തുകൊണ്ട്.......

ഒരുപാട് സ്നേഹത്തോടെ

അമ്മ

.
ചിത്രത്തിന് കടപ്പാട്: www.ourlittleangel.co.uk/

തെരുവിന്റെ മകള്‍

2008-06-23T11:36:00.000+04:00

പിറന്നുവീണ മണ്ണിന്റെ മാറില്‍‌

പ്രകൃതിയിറ്റിച്ച നീര്‍ത്തുള്ളികള്‍‌

മുലപ്പാലായ് നുണഞ്ഞിറക്കിയ
ജീവന്റെ നൂല്‍പ്പാലമേറിയ ശൈശവം

പിച്ചച്ചട്ടിയുടെ വ്യര്‍ത്ഥതയില്‍

എച്ചിലിലകളിലൊടുങ്ങാത്ത

വിശപ്പിന്റെ ആരോഹണത്തിലുലഞ്ഞ

അനാഥത്വത്തിന്റെ പുഴുക്കുത്തേറ്റ ബാല്യം

പ്രകൃതിയുടെ പക്ഷാഭേദമില്ലായ്മ

പട്ടിണിയുടെ അസ്ഥിക്കോലത്തില്‍‌

അഴകിന്റെ നിമ്നോന്നതങ്ങള്‍‌ തീര്‍ത്ത

തീണ്ടാരിയറിഞ്ഞ ക്ഷുഭിതമായ കൌമാരം

രാവിന്റെ അന്ധകാരത്തെരുവില്‍

ലോകത്തിന്റെ പകല്‍മാന്യത

ഇരുട്ടിന്റെ ബീജത്തെ ഗര്‍ഭത്തില്‍ സമ്മാനിച്ച

വേശ്യയാക്കപ്പെട്ട യൌവ്വനം

കാലത്തിന്റെ പ്രവേഗത്തില്‍

പൊതുശ്മശാനത്തിലേക്കെത്തും മുന്നേ

രോഗത്തിനും മരണത്തിനുമിടയില്‍

ജീവിതത്തിന്റെ വിശപ്പറുതി തേടുന്ന വാര്‍ദ്ധക്യം

ജനിമൃതികള്‍ക്കിടയില്‍‌,

കാലത്തിന്റെ നടവഴികളിലെവിയൊക്കെയോ

ചിന്തിത്തെറിച്ച ചോരപ്പാടുകളിലൊതുങ്ങുന്നു

തെരുവിന്റെ മകളുടെ ജീവിതസാക്ഷ്യം

ചിത്രത്തിന് കടപ്പാട്: http://photo.net/travel/india/

മഴക്കാറ്റുപോലൊരു പ്രണയം

2008-06-16T08:55:00.000+04:00

കയ്യിലൊരുനുള്ള് പ്രണയവുമായി

വൈകിയവേളയിലെന്തിനാണ് നീ വന്നത്?

തുറന്നിട്ട ജാലകവാതിലിലൂടെ

ഒഴുകിയെത്തുന്ന മഴക്കാറ്റിന്റെ

തിടുക്കത്തിലുള്ളൊരു ചുംബനം പോലെ

ഒരു കുളിരുമാത്രം ബാക്കിയാകുന്നു.

മനസ്സില്‍ മൌനം വേലികെട്ടിയ-

കലാലയനാളിലെ ഇടനാഴികളില്‍‌,

ആലസ്യത്തിന്റെ ഇടവേളകളില്‍,

രാക്കിനാവുകളെ ഇഴപിരിയ്ക്കുന്ന-

തണുപ്പുപുതച്ച പ്രഭാതങ്ങളില്‍‌,

നീയെന്തേ ഒരിക്കല്‍‌പോലും വന്നില്ല?

മനസ്സിന്റെ മണിച്ചെപ്പില്‍‌ കാത്തുവെച്ച

പ്രണയത്തിന്റെ സുഗന്ധം നുകരാന്‍

വരാനിരിക്കുന്ന നാളുകള്‍‌ മതിയാകില്ലെങ്കില്‍
സമയത്തിനും സകലതിനുമതീതരായി

നമുക്കൊരുമിച്ച് തിരികെ നടക്കാം.

പ്രതീക്ഷകളുണരുന്ന യൌവനവും,

സ്വപ്നാനുഭൂതികളുടെ കൌമാരവുമറിഞ്ഞ്,

പുതുമഴ നനയുന്ന കുട്ടിക്കാലത്തിലേക്ക്.

പോയ കാലവും പൊഴിഞ്ഞ വസന്തവും

വീണ്ടും നമുക്കായ് മാത്രം പൂവിടും.

ഓര്‍മ്മകളില്‍‌ പാഴായ നിമിഷങ്ങളില്‍

പ്രണയത്തിന്റെ പുതുജീവന്‍ നിറയ്ക്കാം.

പറഞ്ഞുതീരാത്ത ഒരായിരം സ്വകാര്യങ്ങളും

കൊഞ്ചിക്കരയിക്കുന്ന കുഞ്ഞുപിണക്കങ്ങളുമായി

ജന്മങ്ങളോളം പ്രണയിച്ചുകൊണ്ടേയിരിക്കാം.....

മുകളിലെ ചിത്രത്തിന് കടപ്പാട്: http://www.raedalrawi.com/00-05%20paintings.html

നീയറിയുന്നുണ്ടാകുമോ.....

2008-06-15T16:16:00.000+04:00

നിന്നെയെനിക്കിഷ്ടമല്ലായിരുന്നു;

ക്ഷണിക്കാതെയുള്ള വരവും,

പറയാതെയുള്ള തിരിച്ചുപോക്കും,

കാരണമില്ലാത്ത പിണക്കവും,

ശാഠ്യത്തില്‍‌ ചിണുങ്ങിക്കരച്ചിലും,

കളിയാക്കിയുള്ള കള്ളച്ചിരിയും,

ഒന്നുമെനിക്കിഷ്ടമല്ലായിരുന്നു।

എന്റെ പാവാടത്തുമ്പ് നനയ്ക്കുന്ന;

വരാന്തയിലെ അരമതിലിലിരുന്നാല്‍,

ചീറിപാഞ്ഞ് ചാറ്റലായെത്തുന്ന;

വെറുതെ പെയ്തെന്റെ കളിവീടിന്റെ-

പുല്ലുമേഞ്ഞ മേല്‍ക്കൂരനാശമാക്കുന്ന;

നിനച്ചിരിക്കാതെ വന്നെത്തിയെന്റെ

പുത്തന്‍‌കുടയെ നനച്ചീറനാക്കുന്ന;

കുശുമ്പിയായ തന്നിഷ്ടക്കാരി.

അന്ന് ഞാനറിഞ്ഞില്ല നിന്റെ മനസ്സ്,

നീ വന്നതെന്നെ കാണാനാണെന്നും,

പിണങ്ങിയതും ഇണങ്ങിയതും

കുലുങ്ങിച്ചിരിച്ചതും ശഠിച്ചു കരഞ്ഞതും

ഒക്കെയും എന്നോടു മാത്രമാണെന്നും,

നിന്റെ മനസ്സിലെ ഇഷ്ടവും കുസൃതിയും

പങ്കുവെക്കാനാണ് നീവന്നതെന്നും;

ഒന്നുമൊന്നും ഞാനറിഞ്ഞതേയില്ല.

ഇന്നകലെയിരുന്ന് ഞാനെല്ലാമറിയുന്നു,

എന്റെ നാട്ടില്‍‌ ഇക്കുറിയും നീ വന്നിട്ടുണ്ടാകും.

ആര്‍ത്തലച്ചു പെയ്യുന്നുണ്ടാകും.

എന്നെ കാണാതെയലറിക്കരയുന്നുണ്ടാകും.

വീടിനകത്തേക്കെത്തിനോക്കാനെന്ന പോലെ,

ചാറ്റലായ് പലവുരു പാറിയെത്തുന്നുണ്ടാകും।

ദൂരെയിക്കരെ ഞാന്‍‌ തനിച്ചാണെന്ന്-

നീയറിയുന്നുണ്ടാകുമോ?

നിന്നെ കണ്ണുനിറയെ കാണാന്‍,

നിന്റെ കുളിരിനെ മനസ്സിലെടുക്കാന്‍‌,

എന്റെ ചേലത്തുമ്പൊന്ന് നനഞ്ഞിടാന്‍‌,

പുതുമഴ നനഞ്ഞൊന്ന് പനിപിടിക്കാന്‍‌,

മനസ്സിലെ കളിവീടുമൊരുക്കിയിനിയെത്രനാള്‍‌????

മുകളിലെ ചിത്രത്തിനു കടപ്പാട്: http://www.houstonsahm.com/files/GirlInRain.gif

ചതിച്ചതും തോറ്റതും.....

2008-06-08T16:00:00.000+04:00

മാംഗല്യച്ചരടിലാണ് നീയെന്നെ ബന്ധിച്ചത്
അതറുത്തെടുക്കുമെന്നതു തന്നെ ഭീഷണിയും
കെട്ടിയത് ദുസ്സഹമായ ബന്ധനമെങ്കില്‍
അഴിച്ചെടുക്കുന്നത് മോചനമാകില്ലേ?
ഇനിയൊരു മോചനം മധുരിക്കുന്ന കയ്പാണെന്ന്
ഏതുചിന്തയാണെന്നോട് പറഞ്ഞത്?

ജന്മം കടം തന്നവര്‍ക്കാശ്രയമായപ്പൊഴൊക്കെയും
വിലങ്ങായ കൈകളില്‍ സനാഥയെന്നു നടിച്ചു
കടമെടുത്ത ജീവനെന്റെയുള്ളില്‍ തേങ്ങുമ്പോള്‍‌
വന്ന വഴികളില്‍ ഇരുട്ടു നിറച്ച് മറവി നടിച്ചു
ഉന്നതന്റെ തീന്‍‌മേശമര്യാദയ്ക്കുമേല്‍‌ ലഹരിയും
ലഹരിക്കുമേലെന്നെ ലാസ്യവുമാക്കി
സ്വന്തമെന്ന നിന്റെ കപടത മറനീക്കിയനേരം
പലര്‍ക്കും പലവുരു ഞാന്‍ പണയപ്പെട്ടു

മരവിച്ച മാംഗല്യം മനസ്സില്‍ മരിച്ച നാളില്‍
വീണുകിട്ടിയ സ്നേഹം കൈനീട്ടി വാങ്ങിയപ്പോള്‍‌;
അപ്പോള്‍‌ മാത്രം ഞാന്‍‌ നാറുന്ന വിഴുപ്പായി
അവിഹിതമായതിന്റെ കാവല്‍ക്കാരിയായി.
ദോഷം തിരിച്ചേല്‍പ്പി‍ക്കാന്‍‌ മാതാപിതാക്കളും
കൂടെപ്പിഴച്ചവരാകാന്‍ കൂടപ്പിറപ്പുകളുമുണ്ടായി

ശിക്ഷയായി അറുത്തെടുത്ത ചരടില്‍‌
സദാചാരത്തിന്റെ മാന്യതയും കെട്ടിത്തൂങ്ങി
ഇപ്പോഴും നീയറിയുന്നില്ല; നീയെന്നല്ലയാരും,
മോചനമെങ്ങനെയൊരു ശിക്ഷയാകും?
ആദ്യം ചതിക്കപ്പെട്ടത് ഞാനാണെങ്കില്‍
ഒടുവിലെ തോല്‍‌വി നിന്റേതാണ്; നിന്റേത് മാത്രം.

അവള്‍‌......

2008-06-04T13:33:00.000+04:00

എന്നെ മാത്രം സ്നേഹിക്കുന്നവള്‍‌;
എനിയ്ക്കായി മാത്രം കാത്തിരിക്കുന്നവള്‍‌;

ഞാന്‍ തൊട്ടാല്‍ മാത്രമുണരുന്നവള്‍‌‌;

അവളെന്റെ പ്രണയിനിയാണ്‌‌.

പിന്നാലെയെത്തുന്നവരേറെയുണ്ടെങ്കിലും

അവളവര്‍ക്ക് ഒരുപകരണം മാത്രം

അവളെ ചുംബിച്ചതും കാമിച്ചതും

ഞാനുമെന്റെ പ്രണയവും മാത്രമാണ്.

ഇന്ന് ഏതോ അഴുക്കുചാലിലേയ്ക്ക്-

മറ്റാരുടേയോ പിഴവിനാല്‍‌ ഞാന്‍‌ വീഴവേ

ഞാനില്ലെങ്കിലനാഥയാകുന്നവളെയോര്‍ത്ത്-

എന്റെ ഹൃദയം വല്ലാതെ തേങ്ങുന്നു

അവരവളുടെ പാതിവൃത്യം തച്ചുടയ്ക്കും

അപരിചിതരാലവള്‍‌ പീഡിതയാകും

പ്രാപിച്ചു കീഴ്പ്പെടുത്താനായില്ലെങ്കില്‍

ലക്ഷ്യത്തിനായവളെ ബലി കൊടുക്കും

വഴിമുടക്കുന്നവള്‍‌ അപശകുനമാവുകില്‍‌

മേനിക്കു വിലയിട്ടു വില്‍ക്കുകതന്നെ

തൊട്ടറിഞ്ഞു വിലപേശി വാങ്ങുന്നവന്‍

എല്ലാം കഴിഞ്ഞവളെ അഗ്നിക്കിരയാക്കും

എല്ലാത്തിനും മുന്നേയെന്റെ ജീവനെടുത്തെങ്കില്‍‌...

ഇല്ലതിനു ഞാനെപ്പോഴേ മൃതിയടഞ്ഞു;

ഉപേക്ഷിക്കപ്പെട്ട താക്കോലിന്റെ നിശ്ചലത

മരണമല്ലെങ്കില്‍ പിന്നെന്താണ്???

ചിത്രത്തിന് കടപ്പാട്: http://www.milogallery.net/img/jjaress/doors_open.jpg

ശാഠ്യം

2008-05-14T13:14:00.000+04:00

അമ്മയെ പിരിയാതെ കൂടെ നടന്നിടാന്‍
പുന്നാരക്കുട്ടനാമുണ്ണിയുണ്ടരികിലായ്
എന്നിട്ടുമെന്തിനാണച്ഛനോടെപ്പോഴും
കിന്നാരമോ‍തിനടക്കുന്നതെന്നമ്മേ
എന്റേതുമാത്രമാണെന്റെയീ പൊന്നമ്മ
അച്ഛനുകൂട്ടായി അച്ഛമ്മയുണ്ടല്ലോ
ചാച്ചുന്നോ‍രുണ്ണിയെ തറയില്‍ കിടത്തുന്ന-
കുറുമ്പുമായെത്തും കള്ളനാണീയച്ഛന്‍
എനിയ്ക്കമ്മതന്‍ചാരെ മാമുണ്ടുചാച്ചണം
ചാച്ചുമ്പോളെന്നെയോ കെട്ടിപ്പിടിക്കണം
രാത്രിയിലമ്മ ഭയക്കാതിരിക്കുവാന്‍
അമ്മയ്ക്കു വേണ്ടി ഞാന്‍ നാമം ജപിച്ചിടാം
എന്തിനുമേതിനും അമ്മയ്ക്കു തുണയായി
ഉണ്ണിയുണ്ടാകില്ലേ തെല്ലും പിരിയാതെ
അച്ഛനെയക്കരെക്കൊണ്ടുപോയാക്കിടാം
അമ്മയുമുണ്ണിയുമിക്കരെ വാണിടാം

ചിത്രത്തിന് കടപ്പാട്: http://www.allanstudios.com/images/allanblog/alaina2.jpg

നീയും ഞാനും...

2008-03-25T15:25:00.000+04:00

ഒരിക്കല്‍ മനസ്സുകളൊന്നായിരുന്നു
നീ ഞാനും ഞാന്‍ നീയുമാ‍യിരുന്നു.
ജീവിതസമരത്തില്‍ ദിശമാറി നീങ്ങവേ
അന്യോന്യമെന്നോ അന്യരായി
അര്‍ബുദം ആദ്യം പടര്‍ന്നുലഞ്ഞത്
നിന്നിലോ എന്നിലോ?
അകന്ന മനസ്സുകളുടെ വിടവിലൂടെ
പാഞ്ഞുകയറിയ വിഷവാഹിനി
സൌഹൃദവീഥിയില്‍ നഞ്ചേകി
ചിന്തകളില്‍ വെറുപ്പിന്റെ കയ്പുപാകി
ബന്ധങ്ങളിലെ സ്നേഹപ്രവാഹംനിലയ്ക്കവേ
മനസ്സില്‍ പരസ്പരം മൌനിയായി
സൌഹൃദത്തെ ബാധിച്ച അര്‍ബുദം
അസൂയയോ അഹങ്കാരമോ?
ചിന്തിക്കാന്‍ നേരമില്ല തെല്ലും
തിരക്കാണെനിയ്ക്കും നിനക്കും
ജീവിതമത്സരത്തിന്റെ വെപ്രാളത്തില്‍
തിരിച്ചറിവിന്റെ രോഗമുക്തി എന്നാണ്?

.

നഷ്ടങ്ങളുടെ കണക്ക്

2008-03-24T17:20:00.000+04:00

പറയാന്‍ മറന്ന വാക്കുകള്‍
കൊടുക്കാന്‍ കഴിയാതെ പോയ മനസ്സ്
കൈ നഷ്ടം വന്ന സ്വപ്നച്ചിന്തുകള്‍
ഒക്കെയും ഇന്നിന്റെ ഗദ്ഗദങ്ങള്‍
നാളെയുടെ തീരാനഷ്ടങ്ങളും

നഷ്ടങ്ങളായ് തീരാതിരിക്കാന്‍
വാക്കുകള്‍ക്ക് ഓര്‍മ്മയുടെ കാവലേകി
മനസ്സിനെ പാതിയായ് പങ്കു വെച്ചു
സ്വപ്നങ്ങളെ കയ്യെത്തിപ്പിടിച്ചു
എന്നിട്ടുമെന്റെ പുസ്തകത്താളില്‍
എന്തേ നഷ്ടത്തിന്റെ കണക്കുകള്‍?

വാക്കുകള്‍ക്കിടയില്‍ ചിന്തിയ മൌനം
മനസ്സ് വീതിച്ചെടുത്ത പങ്കാളി
സ്വപ്നങ്ങളുടെ ത്വരിതപ്രവേഗം
ലക്ഷ്യപ്രാപ്തിയില്‍ വഴുതിയതൊക്കെയും
ആ‍ കണക്കിലെ മൂല്യങ്ങളായിരുന്നു
തെറ്റിയത് സമവാക്യങ്ങളും
തിരുത്തിയെഴുതുക വയ്യ
തോല്‍‌വിയുടെ താളുകള്‍ മറിച്ചു കളയാം
പുതിയ താളുകളിലെ പുതുമയുടെ മണം
അനുഭവങ്ങള്‍ക്കു മറയാകാതിരുന്നെങ്കില്‍.....

എല്ലാം മറക്കാം...പക്ഷെ

2008-03-23T08:49:00.000+04:00

നിന്നെ കണ്ടറിഞ്ഞ കാഴ്ചകളൊക്കെയും
അന്ധയുടെ വികലസങ്കല്പമെങ്കില്‍

നിന്നെ സാകൂതം കേട്ടുനിന്നതൊക്കെയും
ബധിരയുടെ മൂകസംഗീതമെങ്കില്‍

നിന്നില്‍ നിന്നറിഞ്ഞ സ്പര്‍ശനങ്ങളൊക്കെയും
കുഷ്ഠരോഗിയുടെ കപടനാട്യമെങ്കില്‍

കണ്ടറിഞ്ഞതും കേട്ടറിഞ്ഞതും
തൊട്ടറിഞ്ഞതും ഞാന്‍ മറക്കാം.....

പക്ഷെ; നിന്നെ അറിയുന്ന,
നിനക്കായി മിടിക്കുന്ന,
നിന്നെ തേടുന്ന എന്റെ ഹൃദയം...
അതിനെ എന്തായ് കരുതി ഞാന്‍ അവഗണിക്കണം???

മുകളിലെ ചിത്രത്തിന് കടപ്പാട്.. http://sacred-shopping.com/andrea_smith_gallery.php

.

തിരിച്ചറിയപ്പെടാത്തവര്‍

2008-03-18T14:07:00.000+04:00

രാത്രിയുടെ പാരമ്യത്തില്‍
നഗരത്തിന്റെ വഴിയിടുക്കുകളില്‍
അന്നത്തിനു വേണ്ടി മാംസം വില്‍ക്കുന്നവളെ
പൊതുവില്‍ വിളിയ്ക്കാം; വേശ്യ

നാലുദിനം പശിയറികേ
വയറിന്റെ വിളി ആത്മാഭിമാനത്തെ ജയിച്ചാല്‍
അന്യനു മുന്നില്‍ കൈ നീട്ടുന്നവന്‍
അരായാലുമവന്‍; തെണ്ടി

ലോകത്തിന്റെ ശരവേഗതയില്‍
ഒപ്പം നടക്കാന്‍ കഴിയാതെ
മനസ്സിന്റെ താളം നഷ്ടപ്പെട്ടവന്‍
വിളിക്കാമവനെ; ഭ്രാന്തന്‍

ജീവിതസഹനത്തില്‍ മനസ്സുപിഴച്ചവന്‍
സ്വയമൊടുങ്ങും നേരം
പേരെഴുതിവെക്കാന്‍ മറന്നാല്‍
അവന്‍; അജ്ഞാതജഡം

പൊതുവായ നാമത്തില്‍
തിരിച്ചറിയപ്പെടാതെ പോകുന്ന
ജീവന്റെ ശേഷിപ്പുകള്‍ ഇനിയുമെത്ര!!!

.

ഞാന്‍‌ മാലാഖയല്ല

2008-03-16T15:59:00.000+04:00

എനിക്കു വേണ്ടത് നിതാന്തമായ മോചനമാണ്
ജീവിതത്തില്‍ നിന്നല്ല; മരണത്തില്‍ നിന്ന്
കാരണം നീ‍യെനിയ്ക്കു തന്നത് മരണമായിരുന്നു.
എനിയ്ക്കു പാര്‍ക്കാന്‍ നീയൊരുക്കിയത് നിന്റെ മനസ്സല്ല
പാപചിന്തകളുടെ മടിത്തട്ടാണ്;അതാകട്ടെ,
വേദനകള്‍ നിരന്തരം വേലിയേറ്റം നടത്തുന്ന
നരകത്തിലേക്ക് തുറക്കുന്ന വാതായനവും.
ഞാനെന്റെ വികാരങ്ങള്‍ പങ്കുവെച്ചത്
ദുരാത്മാവായ നിന്റെ അഴുകിയ ജഡത്തിലായിരുന്നു
വേട്ടയാടപ്പെട്ട എന്റെ ശരീരവും ഊഷരമനസ്സും
നിന്റെ പാപസ്നാനത്തിന്റെ സാക്ഷികളാണ്

എന്നെന്നേയ്ക്കുമായി നീ ഒഴിഞ്ഞു പോവുക,
എന്റെ സ്വപ്നങ്ങള്‍ക്കു കരിനിഴല്‍ വീഴ്ത്താതെ,
മനസ്സിലെ വടുക്കളെ വ്രണപ്പെടുത്താതെ.
ഒരപേക്ഷ; തിരികെ വരരുത്
മനസ്സില്‍ ഞാന്‍ നിനക്കു ബലിയൂട്ടുന്നു
അലഞ്ഞോരു കാറ്റായ് പോലും വരാതിരിക്കാന്‍.
വ്രണിത സ്വപ്നങ്ങളുടെ ചിതയില്‍;
ഓര്‍മ്മകളുടെ കനലുകള്‍ ആളിക്കത്തിയാല്‍
ആ അഗ്നി വിഴുങ്ങുന്നത് നിന്നെയാവും.
എന്റെ ക്ഷമയ്ക്കിനി മഴയായ് പെയ്യാന്‍ കഴിയില്ല;
കാരണം ഞാന്‍ മാലാഖയല്ല; മനുഷ്യസ്ത്രീയാണ്

മുകളിലെ ചിത്രത്തിനു കടപ്പാട്.. www.charlotte-baynes.com/laurensebastian/imgs...

സമാന്തര രേഖകള്‍

2008-03-13T17:38:00.000+04:00

അവന്‍ ഒരു വൃത്തമായിരുന്നു
വക്രതയാല്‍ ചമച്ച
നേര്‍വഴിയില്ലാത്ത ജീവന്റെ പതിപ്പ്
ശൂന്യതയുടെ നേര്‍ച്ചിത്രം
ചുറ്റി സഞ്ചരിച്ചെങ്കിലും
അവനാകുന്ന വൃത്തത്തെയുള്‍ക്കൊള്ളാന്‍
കഴിഞ്ഞില്ലെനിക്ക്
അര്‍ദ്ധവൃത്തമാകാനും

അവന്‍ വൃത്തമായിക്കോട്ടെ
ഞാന്‍ രേഖയും
വൃത്തത്തെ കീറിമുറിക്കവേ കണ്ടു
കണ്ടില്ലെന്നു നടിച്ച സമാന്തരരേഖയെ

സമാന്തരമായതിനോടൊത്തു
ഞാന്‍ സഞ്ചരിക്കാം
കൂടിച്ചേരാന്‍ കഴിഞ്ഞില്ലെങ്കിലും
കൃത്യമായ അകലത്തില്‍
ആ സാമിപ്യമെങ്കിലുമുണ്ടല്ലോ
എന്റെ യാത്രയില്‍ കൂട്ടായി

ശിരോലിഖിതം

2008-03-13T14:04:00.000+04:00

കാണാത്ത ലിപികളില്‍,
കേള്‍ക്കാത്ത വാക്കുകളില്‍,
ചേരാത്ത വാചകങ്ങളില്‍,
അജ്ഞാതമായ തൂലികയാല്‍,
അദൃശ്യമായ മഷിയില്‍
തൊട്ടെഴുതിയതെന്താണ് ....???

വിധി.....

.

ചേച്ചി

2008-03-12T13:02:00.000+04:00

അമ്മയ്ക്കു സ്നേഹമനുജനോടേറെയെന്നു
പരാതി ചൊല്ലിക്കരയുന്ന പൈതലേ
ഏറെക്കാത്തിരുന്നമ്മയ്ക്കു കിട്ടിയ പ്രിയമേറും
കടിഞ്ഞൂല്‍ക്കനിയാണു നീയോമനേ
നിനക്കു കൂട്ടായി നിന്‍ കൂടെ വളരുവാന്‍
ഈശന്റെ സമ്മാനമീ കുഞ്ഞുസോദരന്‍
സ്നേഹിക്ക നീയീ കുസൃതിക്കുരുന്നിനെ
നിന്നെ ഞാന്‍ ലാളിച്ചൊരാവിധമൊക്കെയും
കൂടെ കളിക്കുന്ന തോഴിയായ് മാറണം
നേര്‍വഴികാട്ടുന്ന തുണയായി തീരണം
സ്നേഹത്തിന്‍ നിഴലായ് നീ മാറുന്ന നേരത്തും
അമ്മതന്‍ സ്നേഹമതു നിന്നെ പൊതിഞ്ഞിടും

കളിക്കൂട്ടുകാരന്‍

2008-03-11T17:38:00.000+04:00

കുട്ടിക്കാലം മുതലേ നീമാത്രമാണെന്‍ ചങ്ങാതി
വെയിലില്‍ മഴയില്‍ ‍ നിനക്കൊപ്പം ഓടിയും വീണും തിമിര്‍ത്തും

രാവ് പടരവേ സന്ധ്യയ്ക്കമ്മതന്‍ വിളിവരും നേരം വരെയും
പാടത്തും തൊടിയിലും കണ്ണാരംപൊത്തിക്കളിച്ചതും

സ്കൂളിലും വന്നെനിയ്ക്കു നീ കൂട്ടായി കൂടെ കുസൃതി കാട്ടിയും
മടങ്ങും നേരമെത്തും വരേയും മുറ്റത്തങ്ങനെ ചുറ്റിത്തിരിഞ്ഞും

വളരവേ വിലക്കുകളേറെ വെയ്ക്കവേ ഒളിഞ്ഞാരുംകാണാതെ
അരികില്‍ നീ വന്നെത്തി ആശ്ലേഷിച്ചകന്നുപോയ്

മാസത്തിലേഴുനാളില്‍ ആരെയുംകാണാതെ തീണ്ടാതിരിക്കുകില്‍
കള്ളച്ചിരിപൊഴിച്ചെന്നെ കാണാനെത്തിടും ചോരന്‍ നീ

എന്നുമെന്‍ സ്വകാര്യതകളിലെത്തിനോക്കാനായ് വരുന്നവന്‍
രാപകലില്ലാതെ, ആരെയും കൂസാതെന്‍ മുറിയില്‍ നീ എത്തുന്നു

എപ്പോഴോ ശഠിച്ചുപരിഭവിച്ചെന്‍ കണ്ണൊന്നു നിറയുകില്‍
പിന്നെ ഞാന്‍ ചിരിക്കും നേരംവരെയും അലസമായ് ചുറ്റി നിന്നിടും

എന്നെ വിട്ടുപോകാതെ പോയതുപോല്‍ നടിച്ചെന്നെ പറ്റിച്ചും
ചിലനാളില്‍ കാണാനായെത്താതെ തെല്ലു ഭയപ്പെടുത്തിയും

പലനാളുകള്‍കൊഴിയവേ ഞാനിന്നു മാംഗല്യം തേടവേ
നിന്നെ പിരിയേണ്ടിവരുമെന്നോര്‍ത്തു ഞാന്‍ ഭയക്കുന്നു

എങ്കിലും നീ എന്നെ തേടിയെത്തുമെന്നറിയുന്നു ഞാന്‍
എത്രദൂരമെന്നാകിലും കാറ്റാകും നിനക്കെന്തു വിലക്കുകള്‍

മുകളിലെ പടത്തിന് കടപ്പാട്: Catch the Wind -- Original oil painting by Robert McIntosh, Muskogee (Creek) Nation

പരേതനു വേണ്ടി ഒരു കുമ്പസാരം

2008-03-10T09:45:00.000+04:00

ഇതെന്റെ അനുഭവമല്ല. എന്നാല്‍ ഇതറിഞ്ഞ നിമിഷം മുതല്‍ ഇന്നു വരെ ഇതിനെ കുറിച്ചു ചിന്തിക്കുന്ന ഓരോനിമിഷത്തിലും ഞാന്‍ അനുഭവിക്കുന്ന പറഞ്ഞറിയിക്കാനാകാത്ത ഒരു വേദനയുണ്ട്. അതാണ് ഇതെഴുതാന്‍ എന്നെ പ്രേരിപ്പിക്കുന്നതും. ഇതിലെ സത്യത്തിന്റെ മുഖം ഒരു പക്ഷെ വിശ്വസിക്കാന്‍ കഴിയാത്ത വിധത്തിലാകാം. എങ്കിലും നിങ്ങളും ഇതറിയട്ടെ എന്ന് ഞാന്‍ ആശിക്കുന്നു. ഒരിക്കലും ഞാന്‍ കാണാത്ത, അറിയാത്ത പരേതനായ ആ സുഹൃത്തിനു വേണ്ടി..

ഈ സംഭവത്തിലെ ഹതഭാഗ്യനായ നായകന്‍ എന്റെ പ്രീയപ്പെട്ട സുഹൃത്തിന്റെ ബാല്യകാലസുഹൃത്താണ്. അവന്‍ പറഞ്ഞുള്ള അറിവു മാത്രമേ എനിക്കീ സംഭവത്തെ കുറിച്ചുള്ളു. എന്റെ സുഹൃത്തിനെ ഞാന്‍ പരിചയപ്പെടുന്നത് സംഭവബഹുലമായ എന്റെ പോളിടെക്നിക് ജീവിതത്തിന്റെ തുടക്കത്തില്‍ ആണ്. അന്നുമുതല്‍ ഇന്നു വരെ അവന്‍ എന്റെ ഉറ്റ ചങ്ങാതിയും. ഒരിക്കല്‍ എന്തിനെന്നറിയില്ല; ഒരു പക്ഷെ അവന്റെ മനസ്സിന്റെ വിങ്ങല്‍ എന്നോട് പങ്കു വെച്ചതുമാകാം...അവന്‍ എന്നോട് ആ സംഭവം പറഞ്ഞു. അവന്റെ പ്ലസ് ടു ജീവിതത്തിനിടയില്‍ നേരിടേണ്ടിവന്ന ഒരു ദു:ഖത്തിന്റെ കഥ.

ഇടുക്കി ജില്ലയിലാണ് എന്റെ ചങ്ങാതിയിടെ വീട്. ബാല്യം മുതല്‍ അവന്റെ കൂടെ കളിച്ചും ചിരിച്ചും ഒക്കെ വളര്‍ന്നതാണ് നമ്മുടെ നായകന്‍. പേര് ബിജു. വളര്‍ന്നു വന്നപ്പോള്‍ ഏതൊരു കൌമാരക്കാരനുമുള്ളതു പോലെ നമ്മുടെ നായകനും ഒരു പ്രണയം. അത് മറ്റാരോടുമല്ല, സ്വന്തം മുറപ്പെണ്ണിനോട് തന്നെ. ആ പെണ്‍കുട്ടി കൌമാരത്തിലെത്തിയിട്ടേയുള്ളു. പലപ്പോഴും ടി.വി കാണാനും മറ്റുമായി ഈ പെണ്‍കുട്ടി ബിജുവിന്റെ വീട്ടില്‍ വരുന്നത് പതിവായിരുന്നു. സ്വാഭാവികമായും അവര്‍ക്ക് തനിയെ കാണാനും സംസാരിക്കാനും അവസരങ്ങള്‍ ലഭിക്കുക പതിവായിരുന്നു. കൌമാരത്തിന്റെ കുസൃതികള്‍ വഴിമാറി സഞ്ചരിക്കാന്‍ തുടങ്ങിയത് ഒരുപക്ഷെ അവിടെ നിന്നുമാകാം. ആദ്യമാദ്യം സ്വാഭാവികമായി വന്നു ചേര്‍ന്നിരുന്ന അവസരങ്ങള്‍ക്കായി അവര്‍ കാത്തിരിക്കാനും ഒത്തുചേരാനും ശ്രമിച്ചുതുടങ്ങി.

അത്തരത്തില്‍ അവര്‍ ഒരുമിച്ചു ചേര്‍ന്ന ഒരു രാവിലെ അപ്രതീക്ഷിതമായി ആ പെണ്‍കുട്ടിയുടെ അമ്മ ബിജുവിന്റെ വീട്ടിലേക്ക് വന്നു. മറ്റെന്തോ ആവശ്യത്തിനായി അവിടെ എത്തിയ അമ്മയെ കണ്ട് പെണ്‍കുട്ടി ഭയന്നു. അമ്മ വീടിനകത്തേക്കു വരുന്നതു വീടിന്റെ മുകളിലെ നിലയില്‍ നിന്ന് കണ്ട് പെണ്‍കുട്ടി പുറത്തേക്ക് ഓടാന്‍ ഭാവിച്ചു. ബിജു അവളെ തടഞ്ഞു. മിണ്ടാതെ നില്‍ക്കുവാനും കുറച്ച് കഴിഞ്ഞു അമ്മ തിരികെ പോകുമെന്നും പറഞ്ഞു അവളെ സമാധാനിപ്പിക്കാന്‍ ശ്രമിച്ചെങ്കിലും അവള്‍ താഴേക്ക് ഓടാന്‍ തുടങ്ങി. ഇതുകണ്ട് ബിജു അവളെ തടയുകയും ഒച്ച വെക്കാതിരിക്കാന്‍ അവളുടെ വായ് പൊത്തിപ്പിടിയ്ക്കുകയും ചെയ്തു. കുറച്ചു കഴിഞ്ഞ് അവിടെ എങ്ങും ആരെയും കാണാതെ ആ പെണ്‍കുട്ടിയുടെ അമ്മ തിരികെ പോവുകയും ചെയ്തു. അല്പം കഴിഞ്ഞ് പുറകെ അവള്‍ ഓടി പോകുന്നത് അവന്‍ കണ്ടതുമാണ്. പക്ഷെ കുറച്ചു കഴിഞ്ഞ് പുറത്തേക്ക് പോകാന്‍ ഒരുങ്ങി ഇറങ്ങിയ ബിജു കണ്ടത് മുറ്റത്ത് ബോധമില്ലാതെ കിടക്കുന്ന പെണ്‍കുട്ടിയെ ആണ്. ഓടിചെന്നു വിളിച്ചുണര്‍ത്താന്‍ ശ്രമിച്ചെങ്കിലും അവള്‍ മരിച്ചു കിടക്കുകയായിരുന്നു.

ഒരു കൌമാരക്കാരന്റെ പക്വതയില്ലാത്ത മനസ്സ് അവനെ സ്വയം ഒരു കൊലയാ‍ളിയാക്കി കഴിഞ്ഞിരുന്നു. ചിന്തിക്കാനുള്ള പാകത ആ മനസികാവസ്ഥയില്‍ ഉണ്ടായതുമില്ല. കിട്ടിയ നേരം കൊണ്ട് അവന്‍ ഓടി അല്പം ദൂരെയുള്ള കാട്ടില്‍ ഒളിച്ചിരുന്നു. ആദ്യമൊന്നും ബിജുവിന്റെ അസാന്നിധ്യം ആരും ശ്രദ്ധിച്ചില്ല. പക്ഷെ തുടര്‍ന്നുള്ള അന്വേഷണത്തില്‍ ബിജുവിനെ കാണുന്നില്ലെന്നതും മരിച്ച പെണ്‍കുട്ടിയും ബിജുവും തമ്മില്‍ ഉണ്ടായിരുന്ന പ്രണയവും ഒക്കെ ശ്രദ്ധിക്കപ്പെട്ടു. പ്രാഥമിക അന്വേഷണത്തില്‍ തന്നെ പെണ്‍കുട്ടി ശ്വാസം മുട്ടി മരിച്ചതാണെന്ന് കണ്ടെത്തിയിരുന്നു.
എല്ലാവരുടെയും മുന്നില്‍ അവന്‍ കൊലയാളിയായി.

ബിജുവിന്റെ മനസ്സില്‍ എവിടെയോ ഒരു നിരപരാധി ഉണ്ടായിരുന്നിരിക്കണം. അല്ലെങ്കില്‍ എല്ലാം ഏറ്റു പറയണം എന്നു അവനു തോന്നിയിരിക്കണം. അന്നു രാത്രി എന്റെ സുഹൃത്തിനെ തേടി അവന്‍ വന്നു. സ്ഥിരമായി അവര്‍ തമ്മില്‍ കൈമാറിയിരുന്ന ചൂളംവിളി അന്നും മുഴങ്ങി. പക്ഷെ ഇതൊന്നും അറിയാതെ എന്റെ സുഹൃത്ത് ദൂരെയുള്ള ഒരു ബന്ധുവീട്ടില്‍ ആയിരുന്നു. തിരികെ ചൂളം വിളിക്കാനോ ബിജുവിനെ തേടി ചെല്ലാനോ അവനു കഴിഞ്ഞില്ല. ഇതെല്ലാം പിന്നീട് സ്വന്തം അനുജന്‍ പറഞ്ഞാണ് എന്റെ ചങ്ങാതി അറിയുന്നത്. തുടര്‍ച്ചെയുള്ള ചൂളം വിളി കേട്ടെങ്കിലും പുറത്തേക്കിറങ്ങി പോയി നോക്കാന്‍ ‍സ്വാഭാവികമായുള്ള ഭയം അവന്റെ അനുജനെ അനുവദിച്ചതുമില്ല.

പിറ്റെ ദിവസം തിരികെ വരുമ്പോള്‍ എന്റെ ചങ്ങാതിയെ കാത്തിരുന്നത് രണ്ട് മരണവാര്‍ത്തകള്‍ ആയിരുന്നു. ആ പെണ്‍കുട്ടിയുടേതും ബിജുവിന്റേതും. ആത്മാര്‍ത്ഥ സുഹൃത്തിനെ കാണാനാകാതെ തിരികെ പോയ ആ കൌമാരമനസ്സില്‍ ആഴത്തില്‍ വേറിറങ്ങിയ ഭയം അവനെ കൊണ്ടുചെന്നെത്തിച്ചത് ആത്മഹത്യ എന്ന തീരുമാനത്തിലായിരുന്നു. അതിനേക്കാള്‍ ഞെട്ടിച്ചത് അതിനു പുറകെ വന്ന വാര്‍ത്തയായിരുന്നു. ആ പെണ്‍കുട്ടി മരിച്ചത് മുന്നേ തന്നെ ഉണ്ടായിരുന്ന ടി.ബി മൂലമായിരുന്നു എന്ന അറിവ്. കൂടാതെ മരണത്തിന് മുന്‍പ് ബിജു എഴുതി വെച്ച കത്ത് അവന്റെ നിരപരാധിത്വം തെളിയിക്കുന്നതായിരുന്നു. അതിന് പ്രയോജനം ഇല്ലെങ്കില്‍ കൂടി. ഒരുപക്ഷെ പെട്ടെന്നുണ്ടായ അപ്രതീക്ഷിതമായ വിഭ്രമവും കൂട്ടത്തില്‍ മുഖം പൊത്തിപ്പിടിച്ചതും എല്ലാം മരണത്തിനു പിന്നിലെ മറ്റൂ കാരണങ്ങള്‍ ആകാം. എങ്കിലും സ്വയം മരണം ഏറ്റുവാങ്ങാന്‍ മാത്രം ഒരു തെറ്റ് ബിജു മനപൂര്‍വ്വം ചെയ്തിരുന്നോ??? ആരോട് ചോദിക്കാന്‍.....കൌമാരത്തിന്റെ ചാപല്യം അവനെ കൊണ്ടുചെന്നെത്തിച്ചത് മരണത്തിലേക്കായിരുന്നു. അവന്റെ പാവം കാമുകിയേയും.

എന്റെ പ്രണയം

2008-03-09T11:30:00.000+04:00

ഭയം വിതയ്ക്കുന്ന ദു:സ്വപ്നത്തിനൊടുവിലെ
ആശ്വാസമേകുമൊരുണര്‍വ്വാണെന്റെ പ്രണയം
ഭീതിയുടെ നിഴല്‍പാകിയ താളംതെറ്റിയ നിശ്വാസങ്ങള്‍
സാന്ത്വനത്തിനു വഴിമാറുന്ന നിമിഷമാണ് എന്റെ പ്രണയം
മരണം താണ്ഡവമാടിയ ഇരുട്ടിന്റെ താഴ്വരയിലെ
തെളിഞ്ഞ ജീവന്റെ ശേഷിപ്പാണെന്റെ പ്രണയം

ഉണര്‍വ്വെന്നതില്ലാത്ത നിദ്രയിലെ ദു:സ്വപ്നവും
ഭീതിയുടെ നെരിപ്പോടിലുരുകുന്ന യുഗങ്ങളും
ജീവനെതുടച്ചു നീക്കുന്ന മരണവും പ്രതീക്ഷിക്കുമ്പോഴും
ഞാന്‍ ഏറെ സ്നേഹിക്കുന്നു ;വല്ലാതെ കൊതിയ്ക്കുന്നു;
അറിഞ്ഞു പുല്‍കുന്നു...എന്റെ പ്രണയത്തെ

നദിയുടെ വിലാപം

2008-03-04T10:44:00.000+04:00

അറിയുന്നില്ലാരുമെന്‍ ശിഥില മനസ്സിനെ
നിശബ്ദമൊഴുകവേ തിരതല്ലുമോളങ്ങളെ
വികാരവിക്ഷുബ്ധമാകുമെന്നുള്ളിലെ ചുഴികളെ
ഒഴുകുമൊരു നദിയാകുമെന്‍ തപ്തവികാരങ്ങളെ
എന്നെയുള്‍ക്കൊള്ളേണ്ടയാഴിയെങ്ങോ ദൂരെ
പിടയുമൊരു മനസ്സുമായ് കരയോട് കേഴുന്നു
ഒരുനോക്കു കാണുവാനവനില്‍ ചേരുവാന്‍
ദ്രുതവേഗമൊഴുകുന്നു ദൂരങ്ങള്‍ താണ്ടുന്നു
ആഴി തേടിയൊഴുകുമീ വീഥിതന്‍ പാപങ്ങള്‍
ഒക്കെയും ഞാനെന്റെ ചുമലിലായ് പേറുന്നു
കര്‍മ്മത്തില്‍ പ്രീതരാം ആത്മാക്കള്‍ക്കൊപ്പമാ‍യ്
ജീര്‍ണ്ണിച്ചു തീരുമീയനാഥ ശവങ്ങളും
വിഷലിപ്തമാകുമൊരു മാലിന്യവാഹിയായ്
ജീവനുകളേറെയെടുത്തോരു ദാ‍ഹിയായ്
തീരാത്ത ശാപങ്ങളാത്മാവില്‍ ചേരവേ
പുനര്‍ജന്മമില്ലാത്ത പാപിയായ് തീരുന്നു
നിതാന്തമായൊഴുകുന്ന ശാന്തതയ്ക്കിടയിലായ്
എന്‍ കാലിനെ തളയ്ക്കുന്ന ചങ്ങലക്കെട്ടുകള്‍
വ്യഭിചരിച്ചെന്നുടെ ഗര്‍ഭത്തില്‍ പേറുന്ന
ജീവനാം മണ്ണിനെ കവര്‍ന്നെടുത്തീടുന്നു
ലക്ഷ്യത്തില്‍ ചേരാതെ മൃത്യുവെ പുല്‍കുന്ന
ശാപജന്മത്തിന്നൊടുക്കമായ് തീരുന്നു
മാതാവിന്‍ കാരുണ്യമാര്‍ത്തൊരെന്‍ മനസ്സിനെ
കോപാഗ്നി ചിന്തുന്ന ദ്രോഹിയായ് മാറ്റുന്നു
അറിയുന്നില്ലാരുമീ തിന്മതന്‍ ചെയ്തികള്‍
അറിയാതെയെല്ലാമൊടുങ്ങട്ടെയീ വിധം

ഓര്‍മ്മകളില്‍‌‍ നിന്നൊരു മോചനം

2008-02-26T10:42:00.000+04:00

കാഴ്ചയ്ക്കു മറയാകും മൂടല്‍മഞ്ഞുപോല്‍
ഓര്‍മ്മകള്‍ക്കു മേല്‍ പുതപ്പായ് മറവിയും
പ്രകാശിതമാം നല്ലോര്‍മ്മച്ചിന്തുകള്‍
കെടാത്ത ചിരാതുപോല്‍ എരിഞ്ഞിടുന്നു
തിരിഞ്ഞു നോക്കുകില്‍ കാണാമെനിക്കിന്നും
ജ്വലിക്കുമൊരായിരം കാര്‍ത്തിക ദീപങ്ങള്‍
കാലമാകും കാറ്റതില്‍ ആഞ്ഞു വീശവേ
പിടഞ്ഞുമാറിയെഴുന്നുനില്‍ക്കുമാ ദീപാങ്കുരം
ഇടയില്‍ എരിയുന്നൊരാ തീക്കനലുകള്‍
നീക്കിയിരിപ്പാകും ദു:ഖത്തിന്‍ ചീന്തുകള്‍
കണ്ടിട്ടുമില്ലെന്നു വെറുതേ നടിക്കവേ
കൈ നീട്ടി തൊട്ടെന്റെയുള്ളമെരിക്കുന്നു
ഓടിയൊളിക്കുവാനാവില്ലെന്നറിയുന്നു
എന്നില്‍ നിന്നെനിക്കെന്തു മോചനമീ ഭൂവില്‍
എന്നില്‍നിന്നെന്നെയൊളിപ്പിച്ചു നിര്‍ത്തുവാന്‍
കൂട്ടാകുമിന്നിന്റെ നന്മയും നല്ലതും
പോയി മറഞ്ഞൊരാ ഇന്നലെകള്‍
മരിക്കട്ടെയാക്കനല്‍ നനഞ്ഞിടട്ടെ
തെളിവേറുമിന്നിന്റെ അനുഭവങ്ങള്‍
തിളങ്ങട്ടെ ഓര്‍മ്മതന്‍ ചെപ്പിനുള്ളില്‍
ഒരു നുള്ളു പുഞ്ചിരി തൂകി ഞാന്‍ നില്‍ക്കുന്നു
നാളെതന്‍ ആശകള്‍ പുല്‍കിടുവാന്‍

ശാപം

2008-02-21T17:12:00.000+04:00

നീയാരെന്നെനിക്കറിയില്ലിളം പൈതലേ

അറിവു നീ ആയിരങ്ങളിലൊരുവനെന്നുമാത്രം

തെളിഞ്ഞോരു ജീവനായ് പിറന്നിട്ടും നീയിന്നു-

കരിഞ്ഞോരു ജഡമായ് മാറിയതെന്തിങ്ങനെ

ദുഷിച്ചൊരു ലോകത്തിന്‍ വിഴുപ്പുകള്‍ പേറുന്ന

അഴുക്കു തന്‍ കൂന നിനക്കിന്നു തൊട്ടിലായ്

ആരെ ഞാന്‍‌ പറയേണ്ടു കാരണഭൂതരായ്

ചീന്തിയെടുത്ത നിന്‍‌ ജീവനു ഹേതുവായ്

പത്തുമാസത്തിന്റെ മാന്യതക്കേടു പോല്‍‌

നിന്നെയെറിഞ്ഞിട്ട മാതൃജന്മത്തിനോ

പാതിയാം ജീവനെ തന്നിട്ടു പിന്നെ നിന്‍‌

ജീവനെ പാതകം ചെയ്തൊരാ താതനോ

മാതൃസാഫല്യമതു തേടുന്ന സ്ത്രീജന്മം

നേര്‍ച്ചയും കാഴ്ച്ചയും നേദിച്ചു നില്‍ക്കവേ

കിട്ടിയ ഭാഗ്യത്തെയഗ്നിക്കു നല്‍കിയ

ജന്മങ്ങളീ ഭൂവിന്‍‌ ശാപമായ് മാറുന്നു

പാപത്തിന്‍ ഭാണ്ഡങ്ങള്‍ പേറുന്ന ഹീനരേ

നിങ്ങളറിയുന്നുവോ ജന്മനിയോഗങ്ങള്‍

അല്പവും മനസ്സുമടിയാതിതു ചെയ്യുമ്പോള്‍

അറിയണം നിങ്ങളും വിധി തന്നിരയെന്ന്

ഇത്ര മേല്‍ വേണ്ടാത്ത ജന്മത്തെയെന്തിനു-

മാനമതില്ലാതെ ഗര്‍ഭത്തില്‍‌ പേറുന്നു

കളങ്കമില്ലാത്തൊരു മാലാഖപ്പിറവിക്കു

സൃഷ്ടികര്‍ത്താക്കളായ് ദുഷ്ടപ്പിറവികള്‍‌‌

മാറേണമീലോകമിനിയേറെ നന്മതന്‍‌

പാപനാശത്തില്‍‌ മുങ്ങി നിവരേണം

ഇല്ലയെന്നാകിലോ നശ്വരമാം ലോകം

കുഞ്ഞുമനസ്സിന്റെ ശാപത്തിലുരുകിടും

സന്താനമില്ലാതെ വിങ്ങും ഹൃദയങ്ങളേ

നിങ്ങളാ ശാപത്തിന്‍ ജീവിക്കും സത്യങ്ങള്‍

എന്റെ ദിവസം...

2008-02-20T13:23:00.000+04:00

ആറേകാലിന്റെ ആദ്യത്തെ അലാറം

മണിമുഴക്കുമ്പോഴേ കൊന്നു ഞാനതിനെ

‘ഉറക്കത്തിലാണു നിന്റെ കിന്നാരം’

എടുത്തെറിയുമെന്ന ഭീഷണി പുറകെ

ഏഴേകാലിനു വീണ്ടും മണിമുഴക്കം

അതവസാന താക്കീതാകയാല്‍‌

വകവെക്കാതെ തരമില്ലെനിക്ക്

സമയമില്ലാത്ത സമയമെന്ന പരാതിചൊല്ലി

പ്രാഥമികങ്ങളൊക്കെയും നടത്തണം

പാലൊഴിച്ചൊരു ചായയില്ലാതെന്തു സുപ്രഭാതം

ഇതിനിടയിലാണെന്റെ തയ്യാറെടുപ്പുകള്‍‌

ചുണ്ടിലെ ചായം തേച്ചു നിര്‍ത്തിയാല്‍‌

പിന്നെയാകാം ഒരല്പം സുഗന്ധം കൂടി

പിന്നെയൊരോട്ടമാണതിനിടയില്‍ സംഗീതം

വഴിയേ പോകുന്ന സുന്ദരനൊരു കടാക്ഷം കൂടി

എട്ടിനെത്തേണ്ടുന്നവള്‍‌ എട്ടരക്കെന്നോ

ചോദ്യത്തിനുത്തരമായ് നല്ലൊരു പുഞ്ചിരിയും

പിന്നെ തുടങ്ങുന്ന ചാറ്റിങ്ങും ബ്ലോഗ്ഗിങ്ങും

ഇടയില്‍ മരിക്കാത്ത ആത്മാര്‍ത്ഥതക്കല്പം ജോലിയും

ആറുമണിയാകുന്നതറിയാറില്ല പലപ്പോഴും

സുഹൃത്‌മനസ്സുകളുമായുള്ള സംവേദനത്തിന്റെ കാര്യക്ഷമത

ആറുമണിക്കന്യദേശക്കാരി സഹമുറിയത്തിക്കൊപ്പം മടക്കം

കാതുപൂക്കുന്നു ആംഗലേയത്തിലെ ഹാസ്യം കേട്ട്

തിരികെ മറ്റെന്തു ചെയ്യാനെന്നോര്‍ക്കുകില്‍

മാതൃഭാഷയിലസഭ്യമെങ്കിലും പറയും ചിരിക്കവേ

തിരികെയെത്തിയാലെന്തു ചെയ്യാനെന്നോര്‍ക്കുമെന്നും

ആ കിടപ്പില്‍‌ തന്നെ മയങ്ങുമൊരല്പനേരം

കണ്ണുതുറന്നാല്‍‌ കാണുന്നതു കാര്‍ട്ടൂണിന്നതിപ്രസരം

എന്തിനീ ക്രൂരതയെന്നോടെന്നാ‍ത്മഗതം

ഭക്ഷിക്കാനെന്തെങ്കിലും കൂടിയായാല്‍ സ്വസ്ഥം

പിന്നെ മൊബൈലില്‍‌ അല്പം പ്രണയസല്ലാപം

ഉറക്കത്തിലെ കിനാക്കള്‍ക്കായി ചൂടുള്ളൊരു ചുംബനം

കാമുകന്റെ വകയും അവനായി സമര്‍പ്പിച്ചതും

രാവിലെ വിളിച്ചുണര്‍ത്താന്‍‌ അലാറവും വെച്ചാല്‍‌

ഉറങ്ങാം എനിക്കായുള്ള ദിനമെന്ന സ്വപ്നവും കണ്ട്

മറന്നു വെച്ച മനസ്സ്

2008-02-18T14:32:00.000+04:00

ഇന്നലെയും നീ വന്നില്ല;
കാത്തിരിപ്പിന്റെ സ്പന്ദിക്കുന്ന നിമിഷങ്ങള്‍‌
വിരസതയിലേക്കിഴയുന്നു
പൊഴിഞ്ഞു വീണ ഒരോ നിശ്വാസങ്ങളും
വിരഹത്തിന്റെ നേര്‍ക്കാഴ്ചകള്‍‌
എന്നെ പൊതിഞ്ഞു നില്‍ക്കുന്ന സ്നേഹത്തിലും
ഞാന്‍‌ എന്റെ പ്രണയത്തെ; നിന്നെ തേടുന്നു
നിന്റെ ചുംബനത്തില്‍ ചോന്ന അധരങ്ങള്‍‌
രതിയിലെ കുസൃതിയാം നഖക്ഷതങ്ങള്‍‌
പൊട്ടി വീണ കൊലുസുമണികള്‍‌
നിന്റെ വിയര്‍പ്പിന്റെ സുഗന്ധം പേറുന്ന വിരിപ്പുകള്‍‌
പ്രണയത്തിന്റെ സ്പര്‍ശനമേറ്റതൊക്കെയും
ഇന്നെന്നെ ചുട്ടുപൊള്ളിക്കുന്നു
എല്ലാത്തിനും പറയാനുള്ളത്
നിമിഷങ്ങളെ യുഗങ്ങളാക്കുന്ന
വിരസതയില്‍‌ ചാലിച്ച കാത്തിരിപ്പ്
നീ വരും; വരാതിരിക്കാനാവില്ല
കൂടെ നീ കൂട്ടിയത് എന്റെ മനസ്സാണ്
ഉപരിപ്ലവമായതൊന്നുമില്ലാത്ത
ഉപാധികളില്ലാത്ത പ്രണയം നിറച്ച എന്റെ മനസ്സ്
അതിനെ കാണാതിരിക്കാ‍ന്‍‌ നിനക്കാവില്ല
നിന്റെ മനസ്സ് നീയിവിടെ മറന്നു വെച്ചതല്ലേ???

നീ അന്യന്‍...

2008-02-10T09:55:00.000+04:00

മാതൃത്വത്തിന്‍ മാധുര്യം നിഷേധിച്ച നാളില്‍

മാതാവാം നീ മനസ്സു കൊണ്ട് തേങ്ങി

മുലക്കണ്ണിന്‍ കയ്പാലവനെ അന്യനാക്കരുതെന്ന്

നീ നിന്നോട് തന്നെ കരഞ്ഞു കേണു

അവന്റെ വളര്‍ച്ചയ്ക്കിതനിവാര്യമെന്ന് ചൊല്ലി

പിന്നെ സ്വയം ആശ്വസിച്ചൊതുങ്ങി

അമ്മയൂട്ടാ‍തെയുണ്ണാത്തൊരുണ്ണിയെ

വിദ്യയ്ക്കായി പറഞ്ഞയയ്ക്കവേ

ദൂരമീ രക്തബന്ധത്തെയകറ്റുമെന്ന്

നിന്റെ മനം വൃഥാ‍ ഭയത്തെ പൂകി

ലോകരറിയുംവിധം അവനു വളരാന്‍

വിദ്യവേണമെന്നു നീ സ്വയം ശാസിച്ചു

പിന്നെയവന്റെ മാംഗല്യത്തിനും

നീയറിയാതെ നിന്‍ മനം നീറി

വന്നുകയറുന്നവളെ കാരണമേതുമില്ലാതെ

നീയുള്ളാല്‍ സ്നേഹിക്കവേ വെറുത്തു

അവളവനെയെന്നില്‍ നിന്നകറ്റിയെന്ന്

വെറുതേ നീ മനസ്സാ വിലപിച്ചു

ജീവിതസൌഖ്യം തേടിയവന്‍

പ്രവാസം തേടി പോകവേ

മരണക്കിടക്കയിലെ ദാഹജലത്തെചൊല്ലി

നീ‍ വീണ്ടും വൃഥാ വ്യസനിച്ചു

നാലുവരി സ്നേഹത്തിനായുള്ള കാത്തിരുപ്പില്‍

നീ വീണ്ടും ദൂരത്തെ ശപിച്ചു

ഇന്നു കാലം നിന്നിലെ ജീവനെടുക്കുമ്പോള്‍

അവനെ ഒരുനോക്കു കാണാന്‍ നീ കരഞ്ഞു

എന്നോ അകന്നോരു മകനായ്

കാക്കാനാവില്ലെന്നു മരണം മൊഴിഞ്ഞു

പൊക്കിള്‍ക്കൊടി മുറിച്ചൊരു നാളില്‍തെന്നെ

അന്യനായ മകനെയോര്‍ത്തേറെ കരഞ്ഞതില്‍

നിന്നെ പരിഹസിച്ചു ചിരിക്കവേ

മരണം നിന്റെ കണ്ണില്‍ ചുംബിച്ചു.

ഭേദ്യമീ വൈധവ്യം...ഭേദം സതിയും

2008-02-06T11:11:00.000+04:00

തേങ്ങുവതിന്നെന്‍ മനം; നീയതറിയുന്നില്ലയോ

ഇന്നു ഞാനേകയായ് നിന്നോര്‍മ്മകള്‍ മാത്രമെന്‍ കൂടെ

അകലെയേതോ കാണാക്കോണിലിരുന്നെന്നെ കാണുന്നുവോ

അറിയുന്നുവോ മാംഗല്യച്ചരടില്ലാത്തൊരെന്‍ മാഹാത്മ്യം

എന്തിനു നീയെന്നെ തനിച്ചാക്കി യാത്രയായ്

ഒരിക്കലും പിരിയില്ലെന്നുചൊല്ലിയതും നീ മറന്നുവോ

മടങ്ങിവരവുടനെന്ന വാക്കുപറയാതെ നീയകന്നപ്പോള്‍

ലോകരെനിയ്ക്കു നല്‍കിയ സ്ഥാനപ്പേരിതോ ‘വൈധവ്യം’

പൊട്ടിച്ചെടുത്തെന്‍ താലിച്ചരടിനെ, നീ തലോടിയ കുപ്പിവളകളെ

തുടച്ചുനീക്കിയവരിലാരോ നീ തൊടുവിച്ചൊരാ സിന്ദൂരവും

വെള്ളപുതപ്പിച്ചവരെന്നെയും നിശ്ചലമായ നിന്‍ മേനിയേയും

ആശകളെനിക്കന്യം, നിറങ്ങളും പിന്നെ ഭൂഷകളും

ഒന്നുമെനിക്കു വേണ്ടിന്നു വേണ്ടതു നിന്റെയൊരു സ്പര്‍ശം മാത്രം

അകലെയിരുന്നെങ്കിലും അറിയണം നീയെന്റെ

അധമമാം അവസ്ഥ നീ കണ്ടറിഞ്ഞിടേണം

മരുമകളെന്നു ചൊല്ലിയ നാവിനാലിന്നെന്നെ

അപലക്ഷണമെന്നു ശപിച്ചതുനിന്‍ മാതാവും

അല്പായുസ്സായ നിന്‍ ഹത്യയ്ക്കു ഹേതുവായെനിക്ക-

റിഞ്ഞീടാത്തൊരു ജാതകദോഷത്തെയും നല്‍കി

ഏടത്തിയെന്നമ്മ എന്നോതിയൊരനുജനും

ഇരുട്ടിലെന്‍ കാമത്തിന്‍ കണക്കുമായെത്തുന്നു

എനിക്കെന്തിനീ ജന്മം നിന്‍ സാമിപ്യമില്ലാതെ

അബലയാം വിധവയായ് ഏവര്‍ക്കും ഭാരമായ്

ഐശ്വര്യക്കേടായി, അപശകുനക്കാഴ്ചയാ‍യ്

ഇരുട്ടിനു കാവലായ് ദിവസങ്ങളെണ്ണി ഞാന്‍ കഴിഞ്ഞീടുന്നു

അവകാശമേതുമതില്ലാതെ അടിമയായ് മാറിയ സ്ത്രീ ജന്മമിന്നു ഞാന്‍

അറിക നീ നന്നായി എന്‍ പ്രിയനേ

പതിയുടെ ചിതയതില്‍ സതി ചെയ്ത സ്ത്രീകളേ

എന്‍ വിധിയേക്കാള്‍ ഭാഗ്യമതു തന്നെയല്ലേ?

---------------------------------------------------

വൈധവ്യത്തെ ധീരമായി നേരിട്ട് ജീവിക്കുന്ന ഒരുപാടു പേരുണ്ടെങ്കിലും

ശപിക്കപ്പെട്ട ജന്മം ആണു വിധവയുടേതെന്ന് കരുതുന്ന ഒരു സമൂഹം ഇപ്പോഴും ഉണ്ട്.

സമൂഹത്തിന്റെ തുറിച്ചുനോട്ടങ്ങള്‍ക്കും കുറ്റപ്പെടുത്തലുകള്‍ക്കും നിന്നു കൊടുക്കേണ്ടി വരുന്ന ഒരു വിഭാഗമാണ് ഇന്നും വിധവകള്‍. ഇത് അവര്‍ക്കു വേണ്ടി.......

തപസ്സ്

2008-01-30T10:01:00.000+04:00

മണ്ണില്‍ പെയ്തിറങ്ങുന്ന നിമിഷത്തിനായ്

മുകിലാകുമാശ്രമവനിയില്‍

ഒരു ജന്മം തപസ്സ് ചെയ്യുന്ന

ജലകണികയെപ്പോലെ....

ഹിമബിന്ദുവിനെ സീമന്തരേഖയില്‍ ചാര്‍ത്തി

സൂര്യനെ നോക്കിച്ചിരിക്കാന്‍

പതിറ്റാണ്ടിലേറെ കാത്തിരിക്കുന്ന

കുറിഞ്ഞിപ്പൂവിനെപ്പോലെ....

വര്‍ണ്ണങ്ങള്‍ വിടരുന്ന കാലവും കാത്ത്

പൂവിനെ ഒരുമാത്ര ചുംബിക്കാന്‍

പോടിനുള്ളില്‍ വ്രതം നോറ്റിരിക്കുന്ന

കുഞ്ഞുപൂമ്പാറ്റയെപ്പോലെ....

പ്രകാശം തേടിപ്പറക്കാന്‍ ഒരുജന്മം മുഴുവന്‍

ചിറകിനായ് പ്രാര്‍ത്ഥിച്ച്

ചിതല്‍പ്പുറ്റിനുള്ളില്‍ മഴയെ കാത്തിരിക്കുന്ന

ഈയലിനെപ്പോലെ....

നീ എന്നില്‍ അലിയുന്ന നിമിഷത്തിനായ്

ഈ ജന്മം മുഴുവന്‍ സാഫല്യവും തേടി ഞാന്‍ കാത്തിരിക്കും

ഒരുവേള നീ വന്നില്ലെങ്കില്‍....

വരുന്ന ജന്മങ്ങളിലും

തോഴീ...നിനക്കായ്

2008-01-28T13:34:00.000+04:00

കാപട്യമറിയാത്ത കാലത്തു നീ വന്നു

കളിക്കൂട്ടുകാരിയായെന്റെ തോഴീ

എന്നുമെന്‍ കുറുമ്പിനും കുഞ്ഞുവഴക്കിനും

കൂട്ടായി നീ നിന്നതെന്റെ ചാരെ

വൈകാതെ കാലത്തിനനിവാര്യതയില്‍ നാം

അറിയാതെ വേര്‍പെട്ടകന്നു പോയി

എങ്കിലും മനസ്സാം പുസ്തകത്താളില്‍ നീ

തെളിവേറുമേടായ് മിഴിവോടെ നിന്നു

ഒരുനാളിലര്‍ബുദം നിന്നുടെ രക്തത്തില്‍

ക്രൂരമാം കുസൃതിയതു കാട്ടിയ വേളയില്‍

അകലെയെന്നാകിലും മനസ്സുകൊണ്ടെങ്കിലും

നിന്നിലേക്കെത്തുവാന്‍ ആശിച്ചുപോയ്

ജീവനും മരണവുംനിനക്കായി പൊരുതുന്ന

ആസ്പത്രിമുറിയില്‍ ഞാനെത്തിയ നേരത്തും

പാതിവഴിക്കായ പരീക്ഷയെ ചൊല്ലി നീ

വേവലാതിപ്പെട്ടു പൊട്ടിക്കരഞ്ഞതും

ഏറെക്കഴിയാതെ ബോധം മറഞ്ഞതും

വ്യാധിയാലവശമാം നിന്‍ മുഖം നോക്കി ഞാന്‍

ഏറെ നേരം നിന്നരുകിലായ് നിന്നതും

പാതിമയക്കത്തിലെനിക്കു നീ നല്‍കിയ

പുഞ്ചിരിത്തിളക്കവും ഞാനോര്‍ത്തീടുന്നു

പിന്നെയൊരു ചിതയായ് നീയടങ്ങുമ്പൊഴാ-

കാഴ്ചയതു മറച്ചെതെന്‍ കണ്ണുനീരും

ഒരുനാളീലൊന്നിച്ചെടുത്തൊരാ സ്കൂള്‍ചിത്രം

നെഞ്ചോടടക്കി ഞാന്‍ സ്വയമടങ്ങി

കാലപ്പഴക്കത്താല്‍ നിറം മങ്ങിയ ചിത്രത്തില്‍

കളങ്കമന്യേ നീ ചിരിച്ചു നില്‍ക്കെ

തേടുന്നു ഞാനീ ലോകത്തിലൊക്കെയും

എന്‍ ചാരെ നില്‍ക്കുമൊരു കൂട്ടിനായി

ഇന്നലെയും ഇന്നും

2008-01-24T11:28:00.000+04:00

ഇന്നലെ ഞാന്‍ ഉറക്കെ കരഞ്ഞു

എന്റെ നഷ്ടങ്ങളെയോര്‍ത്ത്.

തകര്‍ന്നടിഞ്ഞ സ്വപ്നങ്ങള്‍

മനസ്സിനെ മരുഭൂമിയാക്കി

ഭ്രാന്തന്‍ ചിന്തകളെന്റെ മനസ്സില്‍

വേലിയേറ്റം നടത്തി

ശേഷിപ്പുകള്‍ ഒന്നുമില്ലെന്ന്

ഞാന്‍ എന്നോട് പറഞ്ഞു

നാളെയെനിയ്ക്കില്ലെന്ന് ചൊല്ലി

ഞാന്‍ വിലപിച്ചുകൊണ്ടേയിരുന്നു

ഇന്ന് ഞാനാഴത്തില്‍ ചിന്തിക്കുന്നു

കരഞ്ഞതിന്റെ കാരണം തേടി.

നഷ്ടങ്ങളുടെ ശൂന്യതയ്ക്ക് മേലെ

ലക്ഷ്യങ്ങളുടെ മേലാപ്പ് വീണു

സ്വപ്നങ്ങള്‍ക്കു പൊട്ടിമുളയ്ക്കാന്‍

മനസ്സിനെ ഞാനുഴുതുമറിച്ചു

നാളെയെനിക്കുള്ളതെന്ന്

മനസ്സെന്നോട് മെല്ലെ മന്ത്രിച്ചു

പുതുനാമ്പെടുത്ത പ്രതീക്ഷകള്‍കണ്ട്

ഇന്നു ഞാന്‍ ചിരിയ്ക്കുന്നു

കരഞ്ഞതിന്റെ അര്‍ത്ഥമില്ലായ്മ

എന്നെ ചിരിപ്പിച്ചുകൊണ്ടേയിരിക്കുന്നു

കരഞ്ഞതും ചിരിച്ചതും ചിന്തിച്ചതും

ഇന്നലെയും ഇന്നും പിന്നെ നാളെയും

ഒക്കെ ചേര്‍ത്തുഞാനുറക്കെ വായിച്ചു

പിന്നെയൊറ്റവാക്കില്‍ പറഞ്ഞു “ജീവിതം”

പിതൃസ്നേഹം

2008-01-20T14:59:00.000+04:00

എന്നുമെന്‍ ശൈശവബാല്യസ്മരണകള്‍

വാത്സല്യച്ചൂടുള്ളോരാ വിരല്‍തുമ്പില്‍ തുടങ്ങുന്നു

പിച്ചവെക്കാന്‍ പഠിക്കുന്ന നാളിലെന്നോ

തട്ടിവീഴാന്‍ തുടങ്ങുന്ന നേരത്ത്

എത്തിപ്പിടിച്ചൊരെന്‍ പിതാവിന്റെ കയ്യുകള്‍

ശക്തി പകര്‍ന്നിടുന്നീ നാളിലൊക്കെയും

കൌമാരമെന്നെ തഴുകിയ നേരത്തും

യൌവ്വനമാകെ പൊതിഞ്ഞൊരാ നാളിലും

കുഞ്ഞിളം പൈതലായ് ഞാനാ കരങ്ങളില്‍

സുരക്ഷിതമാം കുഞ്ഞുറക്കങ്ങളറിഞ്ഞതും

അതിമോഹമെങ്കിലും ഞാന്‍ ചൊല്ലുമാശകള്‍

അദ്ധ്വാനവേഗത്തില്‍ നടത്തിച്ചു തന്നതും

മറവിതന്‍ മാറാല പൊതിയാതെവെച്ചിട്ടു-

നിധിപോലെ ഞാനെന്നുമോര്‍ത്തിടുന്നു

ഏതൊരു ജീവിതപ്രതിസന്ധിനാളിലും

വഴിയറിയാതെ പരതിയ നേരത്തും

കൈനടത്തുവാന്‍ തെളിയുന്ന വെളിച്ചമായ്

എത്തിയതൊക്കെയും ആ സ്നേഹമല്ലയോ

കരളുരുകുന്നൊരു നൊമ്പരമോടെന്നെ

ജീവിതപാതയില്‍ ഏകയായ് വിട്ടപ്പോള്‍

നിറഞ്ഞൊരാ കണ്ണുകളിന്നും മനസ്സിന്റെ

വിങ്ങലായ് ഞാനെന്നുമറിഞ്ഞിടുന്നു

ഇന്നീ മരുഭൂവിലൊറ്റക്കു ഞാനെന്റെ

ഭാവിതന്‍ ഏടുകള്‍ തുന്നിടുമ്പോള്‍

തേടുന്നതെപ്പോഴുമാ വിരല്‍ത്തുമ്പിന്റെ

സ്നേഹാര്‍ദ്രമാകും സുരക്ഷ മാത്രം

ഒരുനാളിലൊക്കെയും നേടി ഞാനെത്തിടും

വീണ്ടുമാ വാത്സല്യത്തണലില്‍ചേരാന്‍

ആ നല്ല നാളിനായ് ഞാനീ മണല്‍ക്കാട്ടില്‍

ഒരുനൂറു സ്വപ്നങ്ങള്‍ നെയ്തിടുന്നു.

രണ്ടു മുഖങ്ങള്‍

2008-01-17T16:02:00.000+04:00

ഇതും ദുബായില്‍ ഞാന്‍ കണ്ട ഒരു മുഖം. ഇതില്‍ രണ്ട് മുഖങ്ങള്‍ ഉണ്ടെങ്കില്‍ കൂടി ഒന്നിനെ പ്രസക്തമാക്കുന്നത് അതിന്റെ അഭംഗിയാണ്. പുറമെയുള്ള അഭംഗിയല്ല... ചിന്താരീതിയുടെ.

ഇത്തവണ വേദി ദുബായ് ഗതാഗതവകുപ്പിന്റെ ബസ്സാണ്. അന്നും ഇന്നും ഇവിടെയുള്ള ബസ്സില്‍ മുന്നില്‍നിന്ന് രണ്ടാമത്തെ നിരയില്‍ മറ്റു സീറ്റുകളേക്കാള്‍ ഉയരത്തിലുള്ള സീറ്റില്‍ ഇരിക്കാനാണ് എനിക്കിഷ്ടം. അതിന് പ്രത്യേകിച്ച് കാരണമൊന്നുമില്ല. അങ്ങനെ അന്നും എനിക്കിഷ്ടപ്പെട്ട ആ സീറ്റില്‍ തന്നെ ഞാന്‍ ഇരിപ്പുറപ്പിച്ചു. ഗതാഗതക്കുരുക്കൊക്കെ കഴിഞ്ഞ് എത്തണമെങ്കില്‍ കുറച്ചധികം സമയമെടുക്കും. ഇനിയുള്ള എന്റെ സമയം കാഴ്ചകള്‍ക്കും ചിന്തകള്‍ക്കുമുള്ളതാണ്.

അങ്ങനെ എന്തോ ചിന്തിച്ചിരുന്നപ്പോള്‍ ആണ് അടുത്ത സ്റ്റോപ്പില്‍ നിന്നും ഒരു സ്ത്രീ കയറുന്നത്. സാരിയാണ് വേഷം. അതുകൊണ്ടാണോ എന്നറിയില്ല എനിക്ക് പെട്ടെന്നു എന്റെ അമ്മയെയാണ് ഓര്‍മ്മ വന്നത്. അവര്‍ക്ക് ഒരു നാല്‍പ്പത്- നാല്പത്തിയഞ്ചിനടുത്ത് പ്രായം വരും. നല്ല ഐശ്വര്യമുള്ള മുഖം. എന്റെ ചിന്ത വിമാനം കയറി. അങ്ങനെ ഞാന്‍ പണചിലവില്ല്ലാതെ നാട്ടിലേക്കെത്തിക്കൊണ്ടിരിക്കെ കഥാനായികയുടെ വരവായി. ചുരിദാറാണ് വേഷം. പ്രായം അന്‍പതില്‍ കുറയില്ല. പ്രായത്തിന് ഒരുതരത്തിലും യോജിക്കാത്ത വേഷവിധാനങ്ങള്‍. ചുണ്ടില്‍ ചായം, ഉയര്‍ത്തിക്കെട്ടിയ മുടി... അങ്ങനെ ആവശ്യത്തിലധികം കോപ്രായങ്ങള്‍ കാണിച്ചിട്ടുണ്ട് കക്ഷി. പക്ഷെ ഇതൊക്കെ കൂടി ആയപ്പോള്‍ പ്രായം എടുത്തുകാണിക്കുന്ന പോലെ ആ‍യി എന്നു മാത്രം.

വന്നിരുന്നത് സാരിയുടുത്തിരിക്കുന്ന പാവം ചേച്ചിയുടെ അടുത്ത്. ഇരുന്നപാടെ ആ ബസ്സില്‍ എല്ലാവര്‍ക്കും കേള്‍ക്കാന്‍ പാകത്തില്‍ സംസാരം തുടങ്ങി. മലയാളി തന്നെ. സന്തോഷം!!! പരിചയപ്പെടല്‍ ആ‍ണ് നടക്കുന്നത്. മനപ്പൂര്‍വ്വം ശ്രദ്ധിക്കാതിരുന്നിട്ടുകൂടി എല്ലാം ഞാന്‍ കേള്‍ക്കുന്നുണ്ടായിരുന്നു. പ്രഭാഷണം അത്രയ്ക്കു വ്യക്തം. സാരി- ചേച്ചി സ്വരം താഴ്ത്തിയാണ് പറയുന്നതെങ്കില്‍ കൂടി തൊട്ട് പുറകില്‍ ഇരിക്കുന്നതിനാല്‍ എനിക്കു നന്നായി കേള്‍ക്കാമായിരുന്നു.

രണ്ടുപേരും പ്രവാസികളിലെഅടിസ്ഥാന വര്‍ഗ്ഗം. വീട്ടുജോലിക്കാര്‍. ജോലിയുടെയും യാത്രയുടെയും ബുദ്ധിമുട്ടുകളെ കുറിച്ചാണ് പറയുന്നത്. നല്ലത് തന്നെ....ആരുമല്ലെങ്കിലും പറയാന്‍ അവര്‍ക്ക് പൊതുവായ ചില കാര്യങ്ങള്‍ ഉണ്ടല്ലൊ. ബസ്സിലെ യാത്രയില്‍ ഇത്തരം ചങ്ങാത്തങ്ങള്‍ നല്ലതാണ് ഒരു പരിധി വരെ.

സംസാരം തുടരുകയാണ്. കേട്ടതില്‍ നിന്ന്... സാരി ചേച്ചി വന്നിട്ട് മൂന്നു മാസങ്ങളെ ആയിട്ടുള്ളു. ആദ്യത്തെ വരവാണ്. നാട്ടില്‍ നിന്ന് കടവും മേടിച്ച് ജീവിതം പച്ചപിടിപ്പിക്കാന്‍ വന്ന സാധാരണ പ്രവാസി. നാട്ടില്‍ ഭര്‍ത്താവും കുട്ടികളും. ഭര്‍ത്താവ് നല്ലവനെങ്കിലും വരുമാനം കുറവാണ്. പണമില്ലാത്തതിനാല്‍ വീടുപണി പകുതി ആയപ്പോള്‍ നിര്‍ത്തേണ്ടി വന്നു. ഇനിയെല്ലാം ശരിയാക്കണം. മകളെ കല്യാണം ചെയ്തയക്കണം. മകനെ എങ്ങനെ എങ്കിലും ഇവിടെ കൊണ്ടുവരണം. ഇതിനൊക്കെ മുന്‍പ് കടങ്ങള്‍ തീര്‍ക്കണം. പിന്നെ നാട്ടില്‍ പോയി മനസ്സമാധാനത്തോടെ ജീവിക്കണം. ഏതൊരു പ്രവാസിയുടെയും സ്വപ്നങ്ങള്‍.

അടുത്തത് ചുരിദാര്‍ ചേച്ചിയുടെ വിവരണമാണ്. വന്നിട്ട് അഞ്ചുവര്‍ഷത്തില്‍ കൂടുതല്‍ ആയി. ഇതിനിടയില്‍ പലതവണ പോയി വന്നു. പ്രസവാനന്തര ശുശ്രൂഷയില്‍ അഗ്രഗണ്യയാണ്. അതിലാണ് ഇപ്പോള്‍ കേന്ദ്രീകരിച്ചിരിക്കുന്നത്. കൂടെ ഇപ്പോള്‍ സേവനമനുഷ്ഠിക്കുന്ന വീടിനെ കുറിച്ചും വീട്ടുകാരെ കുറിച്ചും കുറച്ച് പരദൂഷണവും. രണ്ടോ മൂന്നോ ആഴ്ച മുന്‍പു മാത്രം ജനിച്ച ആ കുഞ്ഞ് എപ്പോഴും കരയുന്നു പോലും... (എങ്ങനെ കരയാതിരിക്കും? ഈ തിരുമുഖം അല്ലെ എന്നും കാണുന്നത്...അതിനു പോലും സഹിച്ചു കാണില്ല.)

ഞാന്‍ ഞെട്ടിയത് ഇതൊന്നും കേട്ടല്ല. സാരി- ചേച്ചിയോട് ചുരിദാര്‍ ചേച്ചി ഒരു ചോദ്യം. ആദ്യം കേട്ടാല്‍ തികച്ചും നിര്‍ദ്ദോഷകരമായ ചോദ്യം. “ആരുടെ കൂടെയാ താമസിക്കുന്നത്?” ...സാരി- ചേച്ചി ഉത്തരം പറഞ്ഞു... “കുറച്ചു കൂട്ടുകാരുടെ കൂടെ; ഞങ്ങള്‍ ഒരുമിച്ച് ഒരു മുറിയെടുത്തിട്ടുണ്ട്”

ഉടനെ അടുത്ത ചോദ്യം... “അതല്ല; ഇപ്പോ ആരുടെ കൂടെയാണ് കൂടിയിരിക്കുന്നതെന്ന്....?” സാരി ചേച്ചിയും കൂടെ ഞാനും ഒരുമിച്ചൊന്ന് ഞെട്ടി...

ചുരി- ചേച്ചി: “മനസ്സിലായില്ല അല്ലെ? ഇവിടിതൊക്കെ പതിവാ... ( ഏതൊക്കെ???ആര്‍ക്കറിയാം.) ഞാന്‍ തന്നെ ഈ അഞ്ചുവര്‍ഷമായി രണ്ടു പേരുടെ കൂടെയായിരുന്നു താമസിച്ചത്. ആദ്യം അവധി കഴിഞ്ഞു വന്നപ്പോഴേക്കും ആദ്യം താമസിച്ചയാളിന്റെ കൂടെ വേരൊരുത്തി താമസമായി. ഞാന്‍ പിന്നെ അടുത്തയാളെ നോക്കി. അല്ല പിന്നെ; ഇവിടെ ഇങ്ങനെ കഴിഞ്ഞിട്ടെന്താ കാര്യം? ഇപ്പോള്‍ ഉള്ളയാളും ഞാനും ഒരുമിച്ചാ അവധിക്കു പോകുന്നത്. ഒരു പ്രശ്നവുമില്ല. ശമ്പളം കയ്യിലിരിക്കും. ചെലവെല്ലാം അയാളു നോക്കിക്കോളും.... അല്ലാ വന്നിട്ട് മൂന്ന് മാസമായില്ലേ? ഇതൊന്നും വേണ്ടെ? ചെറുപ്പമല്ലെ? (ആരാണോ ചെറുപ്പം?) ആളെ വേണൊ? പറഞ്ഞാല്‍ മതി, ഫോണ്‍ നമ്പറും തന്നേക്ക്”

സാരി ചേച്ചി: “ എനിക്കൊന്നും വേണ്ട. എങ്ങനെ എങ്കിലും കടം തീര്‍ത്ത് നാടു പറ്റിയാല്‍ മതി. ജീവിക്കാനുള്ളതൊക്കെ ജീവിച്ചതാ... അതു മതി.... ഞാന്‍ ഇറങ്ങുവാ” ഇതും പറഞ്ഞ് സാരി ചേച്ചി അടുത്ത സ്റ്റോപ്പില്‍ ഇറങ്ങി ഒരു പോക്ക്. ഞാന്‍ അവരെ മനസ്സാ ഒന്ന് അഭിനന്ദിച്ചു. ഈ പ്രലോഭനത്തില്‍ വീണില്ലല്ലൊ. “നല്ല ഒരു അമ്മ” ...ഞാന്‍ മനസ്സില്‍ കരുതി.

ഞാന്‍ ചുറ്റും ഒന്ന് നോക്കി. എനിക്കിറങ്ങാന്‍ ഉള്ള സ്ഥലം ആയിട്ടില്ല. വെറുതെ ഒന്നു ചുരി- ചേച്ചിയെ നോക്കി. എവിടെയോ നോക്കിയിരുന്ന അവര്‍ പെട്ടെന്ന് തിരിഞ്ഞ് എന്നെ നോക്കി ചിരിച്ചു. എന്റെ അടുത്തേക്കുള്ള വരവാണ്. ഞാന്‍ ഇരുന്നു...ഒന്നും അറിയാത്തവളെ പോലെ... ഞാന്‍ ഈ നാട്ടുകാരിയേ അല്ലെന്ന മട്ടില്‍.

പുറത്തേക്ക് നോക്കി ഞാന്‍ ചിന്തിച്ചത് മറ്റൊന്നും ആയിരുന്നില്ല. പ്രവാസജീവിതത്തിന്റെ നാനാര്‍ത്ഥങ്ങളെ കുറിച്ച്. പ്രവാസിയുടെ ദു:ഖസത്യത്തെ നോക്കി പല്ലിളിക്കുന്ന മറ്റൊരു നഗ്നസത്യത്തെ കുറിച്ച്.....

തിരിച്ചറിവ്

2008-01-09T13:46:00.000+04:00

ആദ്യരാവില്‍ കുളിരാര്‍ദ്രതയില്‍

ആര്‍ത്തിയോടെന്നെ പുല്‍കിടുമ്പോള്‍

ചെവിയില്‍ നീയെന്നോട് മധുരമായ് മന്ത്രിച്ചു

നീയിന്നുമുതലെനിയ്ക്കുമാത്രം സ്വന്തം

സ്നേഹത്തിന്‍ മാധുര്യമേറും സ്വാര്‍ത്ഥതയെ

സ്വകാര്യമായ് ഞാനന്നാസ്വദിച്ചുനന്നെ

ഭാവിയും വര്‍ത്തമാനവും നിനക്കെന്ന്

ഞാനുമുറച്ചെന്നോടുമന്ത്രിച്ചുമെല്ലെ

നാളുകള്‍ക്കിപ്പുറമെന്‍ ഭൂതകാലം തേടി

തിരികെ നീയേറെ നടന്നപ്പോഴും

തീവ്രമാം സ്നേഹത്തിന്‍ ഭാവമെന്ന്
മനസ്സില്‍ ഞാ‍നൊരുവേളയന്ധയുമായി
എന്നോ മരിച്ചൊരെന്‍ കൌമാരപ്രണയത്തെ
ദുഷിച്ചൊരു വിഴുപ്പായ് നീയെന്നുമലക്കവേ
മറവിയില്‍ പൂണ്ടൊരായിന്നലെകള്‍
ആര്‍ക്കു ഞാന്‍ നല്‍കിയെന്നാരായവേ

ആര്‍ക്കും കൊടുക്കാത്തൊരെന്നിന്നലെകള്‍
നിനക്കെന്ന് ചൊല്ലിയതോര്‍മ്മയില്ലേ
സ്വാര്‍ത്ഥസ്നേഹത്തിന്റെ മൂര്‍ത്തമാം ഭാവത്തില്‍
വീണ്ടുമൊരിക്കല്‍ ഞാന്‍ കണ്ണടച്ചു
ആയിരം ചോദ്യങ്ങള്‍ അഗ്നിയായ് പെയ്യവേ
സ്നേഹത്തിന്‍ മാരിയെന്നോര്‍ത്തു നിന്നു
എന്തുഞാന്‍ പറയേണമെന്നു നിനക്കവേ
വാക്കുകള്‍ക്കിടയിലെ മൌനത്തിന്‍ ഭാഷയ്ക്ക്
കുറ്റസമ്മതത്തിന്റെ ഛായയെന്നോതി നീ
താലിമഹാത്മ്യത്തിന്‍ കൂട്ടു പിടിച്ചെന്റെ
ചാരിത്ര്യശുദ്ധിക്കു കല്ലെറിഞ്ഞു
മംഗല്യക്കുരുക്കിനാല്‍ ബന്ധിതമാം മനം
ചിന്തയാമശുദ്ധിയെ പ്രാപിച്ചു പോല്‍
ഇനിയേതു സ്നേഹത്തില്‍ ഭാവമായ് കരുതണം
നീയെനിക്കേകുന്ന പീഡനങ്ങള്‍
ഇല്ലെനിക്കാവില്ലയെന്റെ സ്വാതന്ത്ര്യത്തെ
സംശയകണ്ണിനായ് ബലി നല്‍കുവാന്‍
അര്‍ഹതയനര്‍ഹതയേകുന്ന ചാരിത്ര്യം
വേണ്ടതു നാരികള്‍ക്കെന്നതുണ്ടോ?
ഏതൊരഴുക്കിലും കാല്‍കഴുകാവുന്ന
പുരുഷനാ ശുദ്ധിയതു വേണ്ടപോലും...

തൂലികാസുഹൃത്ത്

2008-01-07T17:31:00.000+04:00

ഞാന്‍ പ്രീഡിഗ്രിയുടെ ‘ഉന്നതവിജയം’ കഴിഞ്ഞ് മറ്റൊന്നിനും അതിന്റെ പേരില്‍ പ്രവേശനം കിട്ടില്ലെന്ന അറിവിന്റെ അടിസ്ഥാനത്തില്‍ ആണ് ഇടുക്കി ജില്ലയിലെ പൈനാവില്‍ മോഡല്‍ പോളിടെക്‍നിക്കില്‍ ഡിപ്ലോമ പഠനത്തിന് ചേരുന്നത്‌‌‌. പ്രീഡിഗ്രിയ്ക്ക് മാര്‍ക്ക് കുറഞ്ഞതിനുള്ള ഒരു ശിക്ഷാനടപടിയായിട്ടാണ് ഞാന്‍ ആദ്യം അതിനെ കണ്ടത്. എന്നാല്‍ പിന്നീട് ഞാന്‍ ആ കാലത്തെ വല്ലാതെ സ്നേഹിക്കുന്ന നിലയിലേക്ക് കാര്യങ്ങള്‍ മാറിയത് വളരെ പെട്ടെന്നാണ്. അവിടെ ഹോസ്റ്റലിലെ ജീവിതവും സൌകര്യങ്ങള്‍ ഏറെയൊന്നുമില്ലാത്ത ക്യാമ്പസ്സും.... എല്ലാമായി അങ്ങനെ കഴിഞ്ഞു കൂടുന്ന കാലം. പെട്ടെന്ന് മനസ്സില്‍ ഒരു ആഗ്രഹം... ഒരു തൂലികാസുഹൃത്തിനെ വേണം.

സാഹിത്യത്തോടുള്ള ഭ്രമം പണ്ടേയുള്ളതു കൊണ്ട് ആ രീതിയിലുള്ള ആളായാല്‍ നല്ലത്. ആഗ്രഹം മനസ്സില്‍ മിനുക്കി വെച്ചു. ഇതിനിടയില്‍ ഇക്കാര്യം സഹമുറിയത്തിയോടും സൂചിപ്പിച്ചു. അവള്‍ക്കും കേട്ടപ്പോള്‍ താല്പര്യം. എന്നാല്‍പിന്നെ പൊതുവായിട്ട് ഒരു സുഹൃത്ത് മതിയെന്നായി തീരുമാനം. ശേഷം അങ്ങനെ ഒരാളെ കണ്ടെത്തുന്നതിനെ കുറിച്ചായി ആലോചന.

ആ ആഴ്ച വീട്ടില്‍ പോയി വരുന്ന നേരം ബാഗില്‍ യൂണിഫോം വെച്ചിട്ട് അതിനു മേലെയായി വെച്ചിരുന്ന പത്രത്താളില്‍ ആണ് അറിയാതെ കണ്ണുടക്കിയത്. നിമിത്തം! അല്ലാതെന്ത് പറയാന്‍. പത്രത്തില്‍ യുവ സാഹിത്യകാരന്മാരുടെ സൃഷ്ടികള്‍ പ്രസിദ്ധീകരിക്കുന്ന ഒരു പം‌ക്തി ഉണ്ടായിരുന്നു മുന്‍പ്. കയ്യില്‍കിട്ടിയത് അതായിരുന്നു. അതില്‍ ഒന്നിന് താഴെ പേരും മേല്‍‌വിലാസവും. മറ്റെന്തുവേണം.. ? കത്തു തയ്യാറായതും അയച്ചതുമൊക്കെ ശരവേഗത്തില്‍ ആയിരുന്നു. പിന്നെ മറുപടിക്കത്തിനായുള്ള കാത്തിരിപ്പായിരുന്നു. എല്ലാ ദിവസവും ഞാനും എന്റെ സഹമുറിയത്തി സുഹൃത്തും ക്യാമ്പസ്സിലെ കത്തുപെട്ടിക്കു മുന്നില്‍ തപസ്സായി. കുറെ ദിവസങ്ങള്‍ കാത്തിരുന്നു. ഞങ്ങള്‍ക്ക് സാധാരണ വരുന്ന കത്തുകള്‍ പോലും ഇല്ല.. ദിവസങ്ങള്‍ കഴിഞ്ഞപ്പോള്‍ ഞങ്ങള്‍ രണ്ടാളും അതു മറന്നു. പുതിയ വിഷയങ്ങള്‍, പുതിയ ചിന്തകള്‍.... പ്രായവും അതാണല്ലൊ.

ഒരു ദിവസം ഉച്ചയൂണിനു ശേഷം പതിവുപോലെ ഞാനും മറ്റു ചില സുഹൃത്തുക്കളും കൂടി വായ്‌നോട്ടം എന്ന കലയ്ക്ക് പുതിയ മാനങ്ങള്‍ നല്‍കികൊണ്ടിരിക്കുന്ന സമയം. പെട്ടെന്ന് എന്തോ അത്യാഹിതം സംഭവിച്ചതു പോലെ എന്റെ സഹ-സുഹ്രൃത്ത് (ചുരുക്കിയതാ!!!) ഓടി വരുന്നു.കയ്യില്‍ ഒരു കത്തും.ആര്‍ക്കെന്താണ് സംഭവിച്ചത് എന്നറിയാന്‍ ഭയം നിറഞ്ഞ ഒരു ആകാംക്ഷയോടെ ഞങ്ങള്‍ നോക്കി. അടുത്തെത്തിയ ഉടനെ കത്ത് എന്റെ കയ്യില്‍ തന്ന്‍ വായിക്കാന്‍ ആവശ്യപ്പെട്ടു. അത് ദിവസങ്ങള്‍ക്കു മുന്‍പ് ഞങ്ങള്‍ തൂലികാസുഹൃത്തിനെഴുതിയ കത്തിനുള്ള മറുപടിയായിരുന്നു. പ്രതീക്ഷിക്കാതെ ഒരു സമ്മാനം കിട്ടിയ മനസ്സോടെയാണ് ഞാന്‍ അത് വായിച്ചത്. “സാഹിത്യത്തോടുള്ള നിന്റെ ഭ്രമം ഇതോടെ അവസാനിക്കണം” എന്ന മട്ടിലുള്ള ഒരു കത്ത്. അന്നും ഇന്നും ലളിതസാഹിത്യത്തോട് മാത്രമെ മമതയുള്ളു. കാരണം മറ്റൊന്നുമല്ല; അതേ എനിക്ക് മനസ്സിലാക‍ൂ‍. ഒന്നുരണ്ടാവര്‍ത്തി വായിച്ചു നോക്കി. ഇല്ല; രക്ഷയില്ല. മലയാളസാഹിത്യത്തില്‍ ബിരുദമെടുത്താലും മനസ്സിലാക്കാന്‍ പ്രയാസപ്പെടേണ്ടിവരും. ഞാനിങ്ങനെ രണ്ടും മൂന്നും തവണ കത്ത് തിരിച്ചും മറിച്ചും ഒക്കെ വായിക്കുന്നത് കണ്ട് അവള്‍ എന്നെ തന്നെ നോക്കി നില്‍ക്കുകയാണ്. എന്തായാലും ഒന്നു മാത്രം മനസ്സിലായി. നിരാശയ്ക്ക് കയ്യും കാലും വെച്ച ആളാണ് ഞങ്ങളുടെ തൂലികാസുഹൃത്ത്. എന്തായാലും വീണ്ടും എഴുതാമെന്നായി തീരുമാനം. ഇത്രമേല്‍നിരാശ എന്താണെന്ന് അറിയണമല്ലോ. വീണ്ടും എഴുതി. നമ്മളും മോശക്കാരല്ലെന്ന് തെളിയിക്കാന്‍ കാവ്യാത്മകമായി തന്നെ എഴുതി. അറിയാവുന്ന സാഹിത്യം ഒക്കെ ചേര്‍ത്ത് കൊഴുപ്പിച്ചു.

ഇത്തവണ മറുപടി എന്റെ പേരില്‍ ആയിരുന്നു. പക്ഷെ നിരാശ തന്നെയാണ് അന്തര്‍ലേഖനം ചെയ്തിരിക്കുന്നത്. കുറച്ചു കൂടി വിശദീകരിച്ച് എഴുതിയിട്ടുണ്ടെന്ന് മാത്രം. കത്തിത്തീരാന്‍ കൊതിയ്ക്കുന്ന ഒരു തിരിയാണെന്നും അതുടനെ തന്നെ കാണുമെന്നുമാണ് . ജീവിക്കാന്‍ തീരെ ആഗ്രഹമില്ല; അതിനാല്‍ തന്നെ പുതിയ സുഹൃത്ബന്ധം ഒരു ബാധ്യതയാകുമെന്നും എഴുതിയിരിക്കുന്നു. ഇനിയൊരു കത്തെഴുതാന്‍ ജീവനോടെ കാണില്ലെന്നും. അതിലെ ചില വരികള്‍ മാത്രം ഇപ്പോള്‍ ഓര്‍ത്തെടുക്കാനാകുന്നു. “എന്നെ തേടി ഇനി നിങ്ങളുടെ കത്തുകള്‍ വരില്ലെന്ന് ഞാന്‍ കരുതുന്നു. അഥവാ വന്നാലും വായിക്കാന്‍ ഞാന്‍ ഉണ്ടാകില്ല. ആകാശത്തു നക്ഷത്രങ്ങള്‍ക്കിടയിലിരുന്നു ഞാന്‍ നിങ്ങളെ കാണുന്നുണ്ടാകുമെന്ന് മാത്രം നിങ്ങള്‍ അറിയുക.”

വായിച്ചപ്പോള്‍ ഭയം തോന്നിയെങ്കിലും ആത്മഹത്യ ചെയ്യാന്‍ തീരുമാനിച്ച സുഹൃത്തിനെ അതില്‍ നിന്ന് പിന്തിരിപ്പിക്കണമെന്ന് മനസ്സ് പറഞ്ഞു. വീണ്ടും എഴുതി, ജീവിതത്തില്‍ തോറ്റുകൊടുക്കരുതെന്നും ജീവിച്ച് ജയിക്കണമെന്നും സങ്കടങ്ങള്‍ പങ്കുവെച്ച് തീര്‍ക്കണമെന്നുമൊക്കെയായി കുറെ ഉപദേശങ്ങള്‍. പക്ഷെ മറുപടി വന്നില്ല. വീണ്ടും രണ്ടുമൂന്ന് കത്തുകള്‍ തുടരെ എഴുതി. ഒന്നിനും മറുപടി കണ്ടില്ല. ആരുമല്ലാതിരുന്നിട്ടും മനസ്സിന് വല്ലാത്ത ഒരു അസ്വസ്ഥത. എന്താണ് സംഭവിച്ചത് എന്നറിയാന്‍ യാതൊരു വഴിയുമില്ലല്ലോ എന്ന് മനസ്സ് പരിതപിച്ചുകൊണ്ടിരുന്നു.

തുടര്‍ന്നുള്ള ദിവസങ്ങളില്‍ പത്രങ്ങളില്‍ തിരഞ്ഞു. അങ്ങനെ എന്തെങ്കിലും സങ്കടകരമായ വാര്‍ത്തയുണ്ടോ എന്നറിയാന്‍. പക്ഷെ അതിനും പരിമിതികള്‍ ഉണ്ടായിരുന്നു. കാരണം ഈ സുഹൃത്തിന്റെ വീട് മറ്റൊരു ജില്ലയായതിനാല്‍ ആ വാര്‍ത്ത എന്തായാലും ഞങ്ങളുടെ പ്രാദേശിക ദിനപ്പത്രത്തില്‍ ഉണ്ടാകാന്‍ സാധ്യത കുറവാണ്. എന്തായാലും വെറുതെയിരിക്കാന്‍ മനസ്സ് സമ്മതിച്ചില്ല. ഞങ്ങള്‍ രണ്ടുപേരും ആലോചിച്ചു. അപ്പോഴാണ് അവിടുത്തെ പ്രാദേശിക ദിനപ്പത്രം സംഘടിപ്പിക്കുന്നതിനുള്ള ഒരു സാധ്യത തെളിഞ്ഞത്. എന്റെ പ്രീഡിഗ്രികാലത്തെ ഒരു സുഹൃത്ത് ആ ജില്ലയില്‍ ആ‍ണ് പഠിക്കുന്നത്. അവള്‍ എല്ലാ ആഴ്ചയും വീട്ടില്‍ വരാറുള്ളതാണ്. ടെലിഫോണ്‍ നമ്പര്‍ ഉള്ളതുകൊണ്ട് കാര്യങ്ങള്‍ എളുപ്പമായി. അവളോട് കാര്യങ്ങള്‍ പറഞ്ഞു മനസ്സിലാക്കി. തൂലികാസുഹൃത്തിന്റെ പേരും മേല്‍‌വിലാസവും കൊടുത്തു. എന്തെങ്കിലും വിവരം കിട്ടിയാല്‍ ഉടനെ അറിയിക്കാനും പറഞ്ഞു.

ഇതിനിടയില്‍ പരീക്ഷക്കാലം വന്നു. ആ ചൂടില്‍ എല്ലാം മറന്നു. പരീക്ഷ കഴിഞ്ഞ് കുറച്ചു ദിവസത്തെ അവധിയും കഴിഞ്ഞ് ക്യാമ്പസ്സില്‍ എത്തുമ്പോള്‍ എനിക്കായി ഒരു കത്തുണ്ടായിരുന്നു. കൈപ്പടയില്‍ നിന്നു തന്നെ അതെന്റെ പ്രീഡിഗ്രി സുഹ്രുത്തിന്റേതാണെന്നു മനസ്സിലായി. വേഗത്തില്‍ മിടിക്കുന്ന ഹൃദയവുമായി ഞാന്‍ ആ കവര്‍ തുറന്നു. അതിനുള്ളില്‍ അവളുടെ കത്തും ഒരു പത്രത്താളിന്റെ തുണ്ടും ഉണ്ടായിരുന്നു. കത്തു വായിക്കാന്‍ നിന്നില്ല. പത്രത്താള്‍ തിരിച്ചും മറിച്ചും നോക്കി. അതില്‍ ഒരു ചരമവാര്‍‌ത്തയുണ്ടായിരുന്നു. ആത്മഹത്യചെയ്ത ഒരു ഇരുപത്തിരണ്ടുകാരന്‍. പേരും വീട്ടുപേരും കണ്ട് ഞാന്‍ ഞെട്ടി. അത് ഞങ്ങളുടെ തൂലികാസുഹൃത്തായിരുന്നു. സുഹൃത്തിന്റെ കത്തില്‍ നിന്നും അത് ഒരു മാസത്തിനു മുന്‍പുള്ള പത്രമാണെന്ന് മനസ്സിലായി. കണക്കുകൂട്ടി നോക്കിയാല്‍ അവസാന കത്തെഴുതി ഒന്നോ രണ്ടോ ദിവസത്തിന് ശേഷം. ഒരിക്കലും കാണാത്ത ആ കൂട്ടുകാരനെ ഒര്‍ത്ത് ദിവസങ്ങളോളം മനസ്സ് തേങ്ങി. ഞങ്ങള്‍ക്ക് രണ്ടാള്‍ക്കും ഇന്നും മനസ്സിലാകാത്തത് ഒന്നേയുള്ളു... ഞങ്ങള്‍ അവസാനം അയച്ച കത്തുകള്‍ ആരുടെ കയ്യിലാകും എത്തിയിട്ടുണ്ടാവുക??

മനസ്സിന് ഒരു വേദന മാത്രം തന്ന് അകന്നുപോയ കൂട്ടുകാരാ.... നീയെന്തിന് ഇതു ചെയ്തു?? അവസാന കത്തില്‍ പറഞ്ഞതു പോലെ ആകാശത്തിന്റെ ഏതെങ്കിലും ഒരു കോണില്‍ ഇരുന്ന് നീ ഇപ്പോഴും ഞങ്ങളെ നോക്കുന്നുണ്ടാകുമോ?

പിറവിരഹസ്യം

2008-01-03T11:02:00.000+04:00

മനസ്സിലാദ്യംപിറന്നത് ആണ്‍ചിന്ത

പിന്നെ പിറന്നത് പെണ്‍ചിന്ത

ആണ്‍ചിന്തയെ അഴിച്ചുവിട്ടു

പെണ്‍ചിന്തയെ അടക്കിവെച്ചു

ആണ്‍ചിന്ത വ്യഭിചരിച്ചു

പെണ്‍ചിന്ത വേശ്യയായി

അഴിച്ചു വിട്ടതും അടക്കിവെച്ചതും

അറിയാതെയൊന്നായി

ഗര്‍ഭത്തില്‍ പിറന്നത് “ഭാവന”

അടക്കിവെച്ചതിനെ അഴിച്ചുവിട്ടു

അഴിച്ചു വിട്ടതിനെ അടക്കിവെച്ചു

വീണ്ടുമവരൊന്നിച്ചതിന്‍ ഫലം

ഗര്‍ഭത്തില്‍ പിറന്നത് “ആശയം”

അഴിച്ചും വിട്ടില്ല; അടക്കിയും വെച്ചില്ല

ഇഷ്ടമുള്ളതു ചെയ്യാന്‍ വിട്ടതില്‍ ഫലം

എല്ലാമങ്ങനെയൊന്നായ് ശയിച്ചതില്‍

പിറന്നതിന്‍ പേരാണ് “കവിത”

ആണ്‍ജന്മമെന്നൊരു കൂട്ടര്‍

പെണ്‍ജന്മമെന്നു മറ്റൊരുവര്‍

രണ്ടുമല്ലെന്ന് മാലോകര്‍

ആണായും പെണ്ണായും വളരേണ്ട

എന്നുമെന്നും നീയെന്‍ ഉണ്ണിക്കവിത!!!

മനസ്സേ നിന്നോട്.....

2007-12-31T11:50:00.000+04:00

മനസ്സേ നീ പറയുകെന്നോട്

മൂടിക്കെട്ടിയൊരാകാശം കണക്കെ

എത്രനേരമായ് നീ നില്പൂ

ഒന്നുമുരിയാടാതെ ജഡം പോല്‍

വേറിട്ടെന്നില്‍നിന്നകന്നു നീ

പോകവേ ഞാനറിവൂ

നീയെനിക്കന്യയാകുന്നതും

പിന്നെയറച്ചുമാറുന്നതും

അരുതാത്തതെന്തോ ചെയ്തത്

ഞാനറിഞ്ഞാശിച്ചിട്ടെന്ന്

പറയുവാന്‍ നിനക്കാവുമോ

എന്‍‌ഹിതമറിയുന്നൊരെന്‍ തോഴീ

നിന്നെ കേള്‍ക്കാഞ്ഞതല്ല ഞാന്‍

കേട്ടിട്ടും കേള്‍ക്കാത്തപോല്‍ നടിച്ചതും

അപ്രിയമായതറിഞ്ഞു ചെയ്തതും

എന്നും തോല്‍‌വിയെ പുല്‍കുമെന്‍ ബലഹീനത

അര്‍ഹതയില്ലാ സ്വപ്നങ്ങളെ

പ്രാപിക്കാനെനിക്കാവുമെന്നോ

എന്‍ ദൌര്‍ബല്യമറിയുന്നവളായ്

നിനക്കാവില്ലതു ചൊല്ലുവാന്‍

പോകാനുണ്ടേറെ ദൂരമിനിയും

മുള്ളു നിറഞ്ഞ പാതകള്‍ താണ്ടി

കാത്തിരിക്കും കയ്പുനീരിനെ

ദാഹജലമായ് കുടിച്ചിടേണം

കടമകള്‍ തീര്‍ക്കാനുണ്ടേറേ

പാലിക്കാന്‍ വാഗ്ദാനങ്ങളും

ജീവിതമാം സമരവീഥിയില്‍

ആശകള്‍ക്കിടമില്ല തെല്ലും

അറികനീയെന്നെ നന്നായ്

അറിഞ്ഞതിനൊക്കെയും മേലെയായ്

പെയ്തൊഴിഞ്ഞു വരികയെന്നില്‍

സമന്വയിക്കൂ‍ നിതാന്തമായ്

മുഖം

2007-12-26T10:00:00.000+04:00

ആഘോഷങ്ങളുടെ വിരുന്നുകാലം‌‌‌. ഈദ്, ക്രിസ്തുമസ്...അങ്ങനെ എല്ലാം അടുത്തടുത്ത്‌‌.‌‌ദുബായിലെ ‌പ്രശസ്തമായ ഷോപ്പിങ് സെന്റര്‍‌. ഒന്നും വാങ്ങാന്‍ അല്ലെങ്കിലും വേറെ പ്രത്യേകിച്ച് പണി ഒന്നും ഇല്ലാത്തതുകൊണ്ട് ഞാനും അവിടെ കയറി. ‌

സാധാരണ ഏതൊരു പെണ്ണിനേയും പോലെ വസ്ത്രങ്ങള്‍ എനിക്കും ഹരമാണ്‌‌.‌മാസം തീരാന്‍ ഇനി അധികം ദിവസങ്ങള്‍ ഇല്ല. പണത്തിന്റെ വില അറിഞ്ഞു തുടങ്ങിയിരിക്കുന്നു.‌ സ്ത്രീകള്‍‍ക്കായുള്ള വിഭാഗം മനപൂര്‍വ്വം ഒഴിവാക്കി, പുരുഷകേസരികള്‍ക്കായ് എന്തെല്ലാമുണ്ടെന്നു നോക്കാനായി അങ്ങോട്ടു ചെന്നു.‌ നല്ല തിരക്കുണ്ടായിരുന്നു. വിലക്കിഴിവ് പോലെ ആളുകളെ ആകര്‍ഷിക്കുന്ന ഒന്ന് വേറെ ഇല്ലല്ലൊ. ഇവിടെയും സ്ഥിതി വ്യത്യസ്തമല്ല.

"ഓഫര്‍ പ്രൈസ്" എന്ന പേരില്‍ കൂട്ടിയിട്ടിരിക്കുന്ന വസ്ത്രങ്ങള്‍ക്കരികില്‍ ആണ് ഞാന്‍ ആ മുഖം കണ്ടത്. ക്ഷീണിച്ച മുഖം, മെലിഞ്ഞ ശരീരം, അയഞ്ഞതും നിറച്ചേര്‍ച്ച ഇല്ലാത്തതുമായ വസ്തധാരണം... ഈ കാലത്തിനുള്ളില്‍ ആവശ്യത്തിലധികം അധ്വാനിച്ചിട്ടുണ്ടെന്നു തോന്നി.‌ ആര്‍ഭാടങ്ങളുടെ ലോകത്ത് ഒരു തിരുത്തല്‍ പോലെ തോന്നിയതു കൊണ്ടാകാം എന്റെ ശ്രദ്ധയെ തിരിച്ചു വിളിക്കാന്‍ എനിക്കായില്ല.‌

അവര്‍ എന്തെല്ലാമോ എടുത്തുനോക്കുകയും വില കണക്കുകൂട്ടുകയും ചിലതൊക്കെ തിരികെ വെയ്ക്കുകയും ചെയ്യുന്നത് എനിക്കു കാണാമായിരുന്നു.‌ അവധിക്കു പോവുകയായിരിക്കും.‌ഗള്‍ഫിന്റെ സമ്പന്നതയും പ്രൌഢിയും പ്രതീക്ഷിച്ചു കാത്തിരിക്കുന്ന പ്രീയപ്പെട്ടവര്‍ക്കായി എന്തെല്ലാമോ വാങ്ങിച്ചു കൂട്ടുകയാണ്.‌ സ്വന്തമായി നല്ലൊരു വസ്ത്രം പോലും ഇല്ലാതെ ഈ മരുഭൂമിയില്‍ അവര്‍ ആര്‍ക്കു വേണ്ടിയാകും അധ്വാനിക്കുന്നത്??

പ്രീയപ്പെട്ടവരെ സംരക്ഷിക്കാന്‍ ഉരുകി ഇല്ലാതാകുന്ന ഒരു ജന്മം।‌ഒരോ പ്രവാസിയും അതു തന്നെ അല്ലേ? നാളെ എല്ലാം കഴിഞ്ഞ് നല്ലൊരു ജീവിതവും സ്വപ്നം കണ്ട് നാട്ടില്‍ എത്തുമ്പോള്‍ അവര്‍ക്ക് കൂട്ടിനുണ്ടാവുക ഒറ്റപ്പെട്ടവന്റെ വ്യഥകള്‍ മാത്രമാകും.‌പിന്നെ ചീര്‍ത്ത ഒരു ശരീരവും; അധ്വാനത്തിന്റെ അമിതഭാരം ലോകത്തിന്റെ കണ്ണില്‍ നിന്നും മറച്ചു പിടിക്കാന്‍ ഉള്ള മറയായ എല്ലിന്‍പുറത്തെ വെച്ചുകെട്ടലുകള്‍. എന്നാ‍ല്‍ അതുപോലുമില്ല ഞാന്‍ കണ്ട ഈ പ്രവാസിക്ക്.‌ ജീവിതത്തിന്റെ വേദനകള്‍ വിളിച്ചോതുന്ന രൂപം. എവിടെയൊക്കെയോ കഷ്ടപ്പെട്ട് കിട്ടുന്ന തുച്ഛമായ തുകയ്ക്കായി എത്ര പേരുടെ ആഗ്രഹങ്ങളും സ്വപ്നങ്ങളും കാത്തിരിയ്ക്കുന്നുണ്ടാകും.‌ സൂക്ഷിച്ചു നോക്കിയാല്‍ ആ കണ്ണുകളില്‍ തന്നെ എനിക്കു കാണാം പ്രതീക്ഷ നിറഞ്ഞ കുറെ മുഖങ്ങള്‍.

പെട്ടെന്ന് അവരുടെ നോട്ടം എന്നിലേക്ക് പാളി വീണു.‌ എന്നെ നോക്കി അവരൊന്നു ചിരിച്ചു. വിഷാദം നിറഞ്ഞതെങ്കിലും നിഷ്കളങ്കമായ ചിരി.‌ എന്തെല്ലാമോ ചിന്തിച്ചുനിന്നതുകൊണ്ടാകാം തിരിച്ചു ചിരിക്കാന്‍ ഞാന്‍ മറന്നു പോയി.‌അതോ എനിക്കു ചിരിക്കാന്‍ കഴിയാതെ പോയാതോ? ആലോചിച്ചു നില്‍ക്കെ അവര്‍ നടന്നകലുന്നതു കണ്ടു.‌കയ്യില്‍ കുറെ വസ്ത്രങ്ങളും.‌ഒരു നോവുപോലെ ആ മുഖം കുറെ നേരം കൂടി മനസ്സില്‍ തങ്ങി നിന്നു.‌

തിരികെ പോകാന്‍ ഇറങ്ങുമ്പോള്‍ ബില്ല് അടയ്ക്കുന്ന കൌണ്ടറില്‍ വീണ്ടും ഞാന്‍ അവരെ കണ്ടു। പണം തികയാത്തതു കൊണ്ടാകാം എന്തെല്ലാമോ കൌണ്ടറിനടുത്തു വെച്ചിട്ടുള്ള കുട്ടയില്‍ ഉപേക്ഷിക്കുന്നതും കണ്ടു. മനസ്സിലെ വേദനയുടെ ആഴം കൂടിയതായി തോന്നി.‌ പ്രവാസ ജീവിതത്തിന്റെ വേദനിപ്പിക്കുന്ന സത്യം‌!!!!!.

പ്രണയലേഖനം

2007-12-25T10:14:00.000+04:00

എന്റെ സ്വന്തം .......... ന്,

എനിക്ക് നീ ആരാണ്...??? ഒരായിരം‌പ്രാവശ്യമെങ്കിലും ഞാന്‍ എന്നോട് ചോദിച്ച ചോദ്യം... ഒരു വാക്കില്‍ ഒരു ഉത്തരം എനിക്ക് അസാധ്യമാ‍ണ്.‌ എ‌ന്റെ കൂട്ടുകാരന്‍? ഇല്ല; അതു മതിയാകില്ല. അനേകരില്‍ ഒരാള്‍ അല്ല നീ.‌ മറ്റൊരാള്‍ക്കും നീ ആകാന്‍ കഴിയില്ല... നിനക്ക് പകരം നില്‍ക്കാന്‍ എന്നല്ല, നിന്റെ അസാന്നിധ്യത്തില്‍ ഒരു ആശ്വാസമാകാന്‍ കൂടി മറ്റൊരാള്‍ക്കും കഴിയുന്നില്ലെന്ന് പറഞ്ഞാല്‍ അത് അതിശയോക്തി ആകില്ല.‌‌

നരച്ചു മരവിച്ച ഒരു മനസ്സുമായി ഞാന്‍ ഇവിടെ എത്തുമ്പോള്‍ എനിക്കായ് ഒരു വസന്തം കാത്തിരിക്കുന്നുവെന്ന് ഒരിക്കലും ഞാന്‍ പ്രതീക്ഷിച്ചില്ല.‌‌ചിറകില്‍ അനേകം വര്‍ണ്ണങ്ങള്‍ പേറുന്ന ഒരു ചിത്രശലഭത്തെപ്പോലെ സ്വപ്നങ്ങളുടെ ലോകത്തേക്ക് പറന്നുയരാന്‍ നീ എന്നില്‍ എന്ത് ഇന്ദ്രജാലമാണ് ചെയ്തത്. ഒന്നും എനിക്കറിയില്ല. അറിയുന്നതൊന്നു മാത്രം... നീ എനിക്കെല്ലാമാണ്, എല്ലാമെല്ലാം...എന്റെ മനസ്സിലെ സ്വപ്നങ്ങളും പ്രതീക്ഷകളും നിന്നെ കുറിച്ചു മാത്രം। നീ ഇല്ലാതെ എനിക്കൊന്നും ഇല്ല.‌‌നീ ഇല്ലെങ്കില്‍ എന്റെ ലോകം ശൂന്യമാണ്‌.‌എനിക്കു പൂര്‍ണ്ണത നിന്നില്‍ മാ‍ത്രം। നടന്നുവന്ന വഴികളില്‍ എന്നും ഞാന്‍ ഏകയായിരുന്നു. ഞാന്‍ കാത്തിരിക്കുകയായിരുന്നു... ഒരു കൂട്ടിനായ്.നൊമ്പരങ്ങളുടെ കാലം കഴിഞ്ഞെന്നു ഞാന്‍ വിശ്വസിച്ചോട്ടെ? കാത്തിരുന്ന പ്രണയകാലം... പ്രണയപൂക്കള്‍ വിരിയുന്ന വസന്തകാലം ഇതല്ലേ? ഉറക്കം മരിക്കാത്ത രാത്രികളില്‍ സ്വപ്നങ്ങള്‍ കുളിര്‍മഴയായ് പെയ്തിറങ്ങട്ടെ॥മഴവില്ലു വിരിയുന്ന താഴ്വാരങ്ങളും‍ പ്രണയമൊഴുകുന്ന നീലത്തടാകങ്ങളും കടന്ന് നമുക്ക് മാലാഖമാരുടെയും നക്ഷത്രങ്ങളുടെയും നാട്ടിലെത്താം. മാലാഖമാരെ സാക്ഷിയാക്കി അവിടെ വെച്ച് നമുക്കൊന്നാകാം; സ്നേഹത്തിന്റെ പ്രകാശം പൊഴിക്കുന്ന രണ്ടു നക്ഷത്രങ്ങളായ് നീണ്ട യുഗങ്ങള്‍ പിന്നിടാം...

നിനക്കായ് മനസ്സില്‍ എഴുതിക്കൂട്ടിയ എന്റെ പ്രണയം...പെയ്തൊഴിഞ്ഞ നൊമ്പരങ്ങള്‍ സാക്ഷിയായി നിനക്കു തന്നെ സമര്‍പ്പിക്കുന്നു.

ഒരുപാട് ഒരുപാട് സ്നേഹത്തോടെ നിന്റെ മാത്രം...

തെരുവിലെ ദേവദാസി

2007-12-12T12:00:00.000+04:00

ഇന്നു നീ എന്നോട് ചോദിക്കുമെന്നു ഞാന്‍ ആശിച്ചു

ഞാനെന്തേയിങ്ങനെ ആയി എന്ന്

ഒരുപാടുത്തരങ്ങളുമായി കാത്തിരിക്കുകയായിരുന്നു

നിനക്കെവിടെ നേരം; തിടുക്കമല്ലേ

മാംസത്തെ പ്രാപിക്കാന്‍ വരുന്നവന്റെ പാപബോധം

പകലിന്റെ മുന്നിലെ മിഥ്യയായ അഭിമാനം

എന്നെ തിരിച്ചറിഞ്ഞില്ലെന്നു നീ നടിച്ചു

അവിടെയും നീയൊരു പരാജയം

എന്നെ നിനക്കറിയാം മറ്റാരെക്കാളും

ആദ്യ കാമിനിയെ എങ്ങിനെ മറക്കാന്‍

അന്നൊരിക്കലാദ്യമായ് പ്രണയമെന്ന നാട്യത്തില്‍

നീയെന്നെ പുല്‌കുമ്പോള്‍ ഞാനറിഞ്ഞില്ല

കാമത്തിനെന്നും ഒരു മുഖം മാത്രമെന്ന്

പ്രാപിക്കുന്നവരും പ്രാപിക്കപ്പെടുന്നവളും

ഇരുട്ടിന്റെ പാരമ്യത്തില്‍ കാണുന്ന പാപത്തിന്റെ മുഖം

പിന്നെയെന്നോ ഒരുമിച്ചു നടന്ന വഴികള്‍

നിനക്കന്യമാകുമ്പോഴും ഞാനേറെ കാത്തു

വന്നില്ല; വന്നത് കാമം പൊതിഞ്ഞ കണ്ണുകള്‍

അവ പലവുരു പിന്നെയും തേടിയെത്തി

പ്രണയം പണത്തിനു വഴി മാറി

കാമം സ്ഥായിയായി തുടര്‍ച്ച നേടി

വേശ്യാത്തെരുവിന്റെ വിഴുപ്പുമായി

ഇരുട്ടു കനം വെച്ച മുറിയില്‍

മടിശ്ശീലക്കനംനോക്കി മാംസത്തിനു വിലപേശി

മാറി മാറി വരുന്ന വിയര്‍പ്പുഗന്ധത്തില്‍

കാമത്തിനു മറ്റൊരു മുഖം തേടി

ഇന്നു നിനക്കു പറയാന്‍ പ്രണയത്തിന്റെ ജല്പനങ്ങളില്ല

പ്രണയാഗ്നിയില്‍ തുടുത്ത മുഖശോഭയില്ല

മരണത്തിന്റെ വിളറിയ മുഖവും കനം തൂങ്ങുന്ന കണ്ണുകളുമായി

നീ തേടിയെത്തിയതെന്നെയല്ല

മറിച്ച് മാംസനിബദ്ധമാം കാമം മാത്രം

എനിക്കിനി സഞ്ചരിക്കാന്‍ വഴികളില്ല

നിനക്കു തേടാന്‍ ദേഹങ്ങളും

നിന്നില്‍ തുടങ്ങിയതൊക്കെയും നിന്നില്‍ തീരട്ടെ

കാമത്തിന്റെ മുഖം പാപമായ് തുടരട്ടെ

നമുക്കിനി വെളിച്ചത്തെ സ്നേഹിക്കാം

അഗ്നിയില്‍ ശുദ്ധിനേടി അതില്‍ തന്നെ ഒടുങ്ങാം

ശരശയ്യ

2007-12-11T09:58:00.000+04:00

പറഞ്ഞു തീരാത്തൊരു ക‍ഥപോലെ

നീളുകയാണെന്റെ വ്യര്‍ഥജന്മം

ആശിച്ചു ജീവന്‍ വെടിയാനെനിക്കായെങ്കില്‍

എന്നു ഞാന്‍ നിര്‍വാണം പൂകിയേനെ

കണ്ണെത്തും കോണിലെനിക്കെത്താനാകാതെ

ആശിച്ചതൊന്നിനും ആവതുമില്ലാതെ

എനിക്കെത്രനാളിനിയിങ്ങനെ ശയ്യയില്‍

കാലനിറഭേദങ്ങളില്ലാത്ത ജീവിതം

പാറിപ്പറക്കുന്ന ശലഭത്തിനെപ്പോല്‍

ആടിത്തിമിര്‍ത്തു ഞാനൊരുനാളിലീ ഭൂവില്‍

ചിറകറ്റു വീണൊരു പുഴുവായി മാറുവാന്‍

നിമിഷങ്ങള്‍ പോലുമെടുത്തില്ലെന്നറിവുഞാന്‍

അറിയുന്നു; കാണുന്നു കണ്മുന്നിലേവതും

ആവില്ലെനിക്കതു നിങ്ങളോടോതുവാന്‍

പ്രകടമാം ഭാവഭേദങ്ങളെനിക്കനിക്കന്യം

ഭാഷകള്‍ എന്‍ മുന്നില്‍ നിസ്സഹായര്‍

നാമെല്ലാമൊന്നിച്ചാസ്വദിച്ചൊരാ നാളുകള്‍

ഓര്‍മ്മകളിലെന്നുമെനിക്കു സ്വന്തം

അതിലെന്നുമെന്‍ കൂടെ നിങ്ങളെല്ലാവരും

കഴിഞ്ഞകാലത്തിന്‍ പുനര്‍ജന്മം പോലെ

നിറമുള്ളോരോര്‍മ്മതന്‍ സ്വപ്നക്കൂടൊരുക്കി ഞാന്‍

നിനവുകളോരോന്നായ് നെയ്തു കൂട്ടാം

ഒരുനാളിലെപ്പോഴോ മരണം വരുംവരെ

മൌനത്തിന്‍ ഭാഷയില്‍ സംവദിക്കാം.

എന്നോ ഒരുനിമിഷത്തിന്റെ തോന്നലില്‍ ചെയ്തു പോയ തെറ്റിനു പകരമായ്

ഒന്നും ആരോടും പറയാന്‍ ആകാതെ ഒന്നിനും ആകാതെ ഇന്നും നാലു ചുവരുകള്‍ക്കുള്ളില്‍ ജീവിക്കുന്ന എന്റെ സ്വന്തം കൂട്ടുകാരിക്കു വേണ്ടി...... ആയിരം കാതങ്ങള്‍ അകലെ ആണെങ്കിലും നിന്റെ മനസ്സ് വായിക്കാന്‍ എനിക്ക് കഴിയുന്നു...നിനക്ക് വേണ്ടി സംസാരിക്കാന്‍ എനിക്കായെങ്കില്‍..... അതേ ഇന്ന് എനിക്കു കഴിയൂ‍....

ആദ്യപ്രണയം

2007-12-09T17:27:00.000+04:00

മയില്‍പീലിത്തുണ്ട് പോല്‍ രഹസ്യമായ് സൂക്ഷിച്ച പ്രണയം

മഴവില്ലു പോല്‍ നിറവാര്‍ന്നൊരെന്‍ ആദ്യ പ്രണയം

ആരോരുമറിയാതെ നീ പോലുമറിയാതെ

ഉള്ളിന്റെ ഉള്ളിലെ സുഖമാര്‍ന്ന നോവുപോലെന്‍ പ്രണയം

നോട്ടുപുസ്തകത്താ‍ളില്‍ കുത്തിക്കുറിച്ചിട്ട പ്രണയക്കുറിപ്പുകള്‍

മുറിവേറ്റ കിളി പോലെ പിടയുന്ന മനസ്സുമായ്

ശ്രമിച്ചേറെയെങ്കിലും കഴിഞ്ഞില്ല നല്‍കുവാന്‍

ഒരിക്കലും നല്‍കാന്‍ കഴിയാതെ പോയൊരെന്‍ മനസ്സുപോലെ

ഇന്നും ശേഷിപ്പൂ ഒരുപാടക്ഷരത്തെറ്റുകള്‍ക്കിടയിലും

തെളിവോടെ നില്‍ക്കുമൊരാത്മാവിന്‍ കുറിപ്പുകള്‍

ഒരുനാളില്‍ അഞ്ജാതസുന്ദരനയനങ്ങളെന്നു നീ

ആരെ കുറിച്ചോ വാചാലനാകവേ

നിറകണ്ണാല്‍ ചിരിച്ചതെല്ലാം മറച്ചതും

പിന്നെയതെല്ലാം മറന്നെന്നു നടിച്ചതും

ഇന്നലെയെന്നപോല്‍ ഞാനിന്നുമോര്‍ക്കുന്നു

എല്ലാം മായ്ക്കുന്ന കാലത്തിന്‍ കൈകള്‍ക്ക്

കഴിയാതെ പോയവയ്ക്കിടയിലിന്നും

കാലപ്പഴക്കത്താല്‍ നിറം മങ്ങിപ്പോകാതെ

ആദ്യപ്രണയത്തിന്‍ ഒര്‍മ്മക്കുറിപ്പുകള്‍

പ്രവാസവും സ്വപ്നഭൂമിയും

2007-12-09T10:28:00.000+04:00

നിറഞ്ഞ കണ്ണുകളോട് കണ്ണീരില്‍ കുതിര്‍ന്ന യാത്രാമൊഴി

ആകാശയാത്രയുടെ മോഹനസ്വപ്നവുമായി അല്പനേരം ഭൂമിയില്‍

ആയിരം കൌതുകങ്ങളുമായി ആകാശചിറകില്‍ പറക്കാന്‍

വിരസത മാത്രം സമ്മാനിച്ചതിന്റെ പരാതി ആരോടു പറയാന്‍

സ്വപ്നഭൂമിയുടെ മടിത്തട്ടിലേക്ക് പറന്നിറങ്ങുന്ന നിമിഷം

മനസ്സില്‍ അതിരില്ലാ പ്രതീക്ഷകളുടെ വേലിയേറ്റം

ആദ്യകാല്‍ വെയ്പ് ചുട്ടുപൊള്ളുന്ന മണലാരണ്യത്തില്‍

മനസ്സാദ്യം പൊള്ളി; ഞാന്‍ ആശിച്ചതിങ്ങനെയോ

തൊഴിലന്വേഷണങ്ങളുടെ ദിനരാത്രങ്ങള്‍

അനന്തമാം മരുഭൂമി പോലെ നീളുന്നയാത്രകള്‍

അര്‍ഥശൂന്യമായ അഭിമുഖപരീക്ഷകള്‍...

വിലകുറഞ്ഞ വിലപേശലുകള്‍ക്കൊടുവില്‍

കരാറില്‍ നല്‍കി പണയമായ് രണ്ടുവര്‍ഷങ്ങളും

സ്വപ്നഭൂമിതന്‍ മറുമുഖം, യാന്ത്രികമാം ജീവിതം

മണലാരണ്യത്തിന്റെ ചൂടില്‍ മനസ്സില്‍ തുലാവര്‍ഷം മറയുന്നു

മരംകോച്ചുന്ന തണുപ്പില്‍ അമ്മതന്‍ മാറിലെ ചൂടിനായ് കൊതിച്ചു

സ്വപ്നങ്ങള്‍ക്ക് പോലും സമയം കല്‍പ്പിച്ച് ഞാനും കഴിയുന്നു...

ലക്ഷങ്ങളിലൊന്നാം പ്രവാസിയായി.

ജനനത്തിനും മുന്നേ ഒരു മരണം

2007-12-06T12:22:00.000+04:00

സിരകളിലൂടെ മരുന്നുകള്‍ പ്രവഹിക്കുകയാണ്

മയക്കം എന്നെ തേടിയെത്തുന്നു...

ഉണരുമ്പോള്‍ നീ എന്നെ വിട്ടകന്നിട്ടുണ്ടാകും

നമ്മള്‍ ആശിക്കാത്ത വേര്‍പാട്

നിന്റെ പാല്‍ പുഞ്ചിരി എനിക്ക് കാണാം

ആര്‍ദ്രമായി എനിക്ക് നിന്നെ തലോടാം

കാലം എന്ന ഇന്ദ്രജാലക്കാരന്‍ വന്നെത്തും

ഞാന്‍ നിന്നെ മറന്നേക്കും...നിനക്കാവില്ല...

നീ കാലത്തിനും അതീതനാകും...

മരണം മണക്കുന്ന മുറിയില്‍

ഓര്‍മ്മകള്‍ അരിച്ചിറങ്ങുന്നു

അബോധാവസ്ഥയുടെ ഇങ്ങേയറ്റം

പിറവിക്കു പിന്നാലെയെന്നപോല്‍ നീ കരയുന്നു...

ഞാന്‍ അറിയുന്നു നിന്‍ രോദനം മരണത്തിനു മുന്നേയെന്നും

മനസ്സിനും ശരീരത്തിനും മുറിപ്പാട് മാത്രം തന്നു

നീ എനിക്കു മുന്നേ നടന്നു...

അവിടെ നിനക്കു സസുഖം വാഴാം

കൊത്തിനുറുക്കപ്പെട്ട ശരീരം നിന്നെ വേദനിപ്പിക്കില്ലെങ്കില്‍

രക്തം കിനിയുന്ന മുറിപ്പാടുമായി ഞാന്‍ മാത്രം

മരവിച്ച മനസ്സും മുറിവേറ്റ ശരീരവും

ജനിക്കാതെ മരിച്ച മകനായി നീ ജീവിക്കും എന്റെ മനസ്സില്‍

കാലം ഇന്ദ്രജാലം കാട്ടും നാള്‍ വരെ.......

നിന്നെ ഞാന്‍ സ്നേഹിക്കുന്നു

2007-12-05T16:05:00.000+04:00

നിന്നെ അറിയാന്‍ നിന്റെ സ്നേഹം അറിയാന്‍.......

ഞാന്‍ ഏറെ വൈകിയെന്നോ....

അറിയാതെ പോയതല്ലെന്ന് ഞാന്‍

എങ്ങിനെ നിന്നോട് പറയാന്‍....

നിന്റെ സ്നേഹത്തിനും ആഴമേറും

നിസ്സഹായാവസ്ഥ ഞന്‍ അറിഞ്ഞിടേണം

എന്തെന്നാല്‍ എന്നേക്കാള്‍

നിന്നെ ഞാന്‍ സ്നേഹിക്കുന്നു.

ഒരു ദുരാഗ്രഹം...

2007-08-01T10:23:00.000+04:00

പ്രളയമേ നിനക്കെന്നെ പ്രണയിക്കാമോ?
സര്‍വ്വവും നിന്നാല്‍ മൂടപ്പെട്ടതിന്‍ മുകളിലായ്
നീയും ഞാനും മാത്രം.......
ബന്ധനങ്ങള്‍ ഏതുമില്ലാതിങ്ങനെ ഒഴുകി നടക്കാന്‍...
ഒരു കടലാസുതോണിയതിന്‍ ലാഘവത്തില്‍...

ഒടുവില്‍ രാവൊന്നിച്ചു കഴിഞ്ഞതിന്‍ പിറ്റേന്ന്
തിരികെ വരുമെന്ന് കള്ളം ചൊല്ലി
അകന്നു പോകും കാമുകനെ പോലെ
നീയും പോകണം...കൂടെ കൂട്ടണമെന്‍
ഭൂതവര്‍ത്തമാന കാലങ്ങളെ....
ഭാവി ഒന്നുമാത്രം മതിയെനിക്കിനിയീ
ജീവിതസത്യമറിഞ്ഞീടുവാന്‍....

പൊയ്മുഖങ്ങള്‍

2007-07-30T14:05:00.000+04:00

പുഞ്ചിരിക്കുന്ന മുഖങ്ങള്‍ ഞാന്‍ ആദ്യം കണ്‍ടു,
അവ പൊയ്മുഖമെന്നതും ഞാന്‍ അറിഞ്ഞു,
എന്നെ നോക്കി ചിരിച്ചപ്പോഴൊക്കെയും
പിന്നില്‍ അമരുന്ന പല്ലുകളും കണ്ടു,
പൊയ്മുഖമെന്നു മനം നൊന്ത നേരത്ത്
പൊയ്പല്ലുകള്‍ താഴെ വീണുടയുന്നതും കണ്ടു
അസത്യമേ നിനക്കു സത്യത്തെ നോക്കി ചിരിക്കാന്‍

പൊയ്പല്ലുകളെന്നതറിഞ്ഞു ചിരിക്കവേ

അറിയാതെ ഞാനും ചോദിച്ചുപോകുന്നു

സത്യമെന്നതീ ലോകം മറന്നുവോ??

പ്രണയമേ.... ഞാനും

2007-06-12T15:35:00.000+04:00

പ്രണയമേ.... നിന്റെ മോഹങ്ങളെന്നെ
സ്വപ്നാടകയാക്കി....

നിന്റെ മൌനം എന്നെയോ
എകാന്തതടവിലാക്കി....

മാധുര്യമേറും നിന്റെ ഈ പുഞ്ചിരി
എന്നിലെ കാമനകളുണര്‍ത്തുന്നു...

നിന്നിലെ കേവലഭാവഭേദങ്ങള്‍ എന്നിലും
പ്രതിഫലിക്കുന്നു...

നിന്നെ അറിയാന്‍... നിന്നില്‍ ചേരാന്‍....
ഞാനിന്നേറെ കൊതിച്ചീടുന്നു

മരണമൊഴി

2007-06-09T11:00:00.000+04:00

ഇനി ഏറെ നേരമില്ലെന്നുടെ ജീവിത-

ഘടികാര ചക്രം നിലച്ചിടുവാന്‍,

ഈ നീണ്ട യാത്രയ്ക്കൊടുവിലെന്‍ മാറാപ്പില്‍

ശിഥിലബന്ധങ്ങള്‍ തന്‍ മുറിപ്പാടു മാത്രം

ചിതലരിച്ചെന്നുടെ മോഹങ്ങളൊക്കെയും

മറവിയാം മറയിലൊതുക്കി വെച്ചു

ഇനിയെത്ര നേരമെന്നാലും മനസ്സില്‍ ഞാന്‍

വിടചൊല്ലി മുന്നേ അകന്നിരുന്നു

ഒന്നുമിനിയില്ലെനിക്കീ ജീവയാത്രയില്‍

നേടുവാനും ത്യജിച്ചീടുവാനും

ഇനിയല്പനേരം എനിക്കെന്തിനോ

ഈ ശാന്തിതന്‍ തീരത്തലഞ്ഞീടുവാന്‍

ബലിതര്‍പ്പണം ചെയ്തു ഈറനുടുത്തു ഞാന്‍

ഭൂമിതന്‍ ഗര്‍ഭത്തില്‍ മയങ്ങിടട്ടെ

നഷ്ട്ട സ്വപ്നങ്ങള്‍

2007-06-02T16:12:00.000+04:00

നഷ്ട സ്വപ്നങ്ങള്‍‍ടെ ഭാരവും പേറി ഞാന്‍ നടക്കാന്‍ തുടങ്ങിയിട്ട് ഏറെ നേരമായി. എങ്ങോട്ടു പോകണമെന്നോ, എവിടെ എത്തിയെന്നോ എനിക്കറിയില്ല. ഒന്നു മാത്രം അറിയാം. ഞാന്‍ ആരുടെ കാലടികള്‍ പിന്തുടര്‍ന്നോ... ഇപ്പൊള്‍ എന്നെ നയിക്കാന്‍ ആ കാലടികള്‍ ഇല്ല. ഈ യാത്രയില്‍ എവിടെയോ വെച്ച് ഞാന്‍ ഏകയായി. കൂരിരുട്ട് നിറഞ്ഞ വഴികള്‍ പിന്നിട്ടു ഞാന്‍ ഇവിടെ എത്തി. എന്തിനാണ് ഞാന്‍ ഈ യാത്ര തുടങ്ങിയത്????? ഒരര്‍ത്ഥത്തില്‍ സ്വപ്ന ലോകത്തിലേക്കുള്ള ഒരു യാത്ര ആയിരുന്നു ഇത്. സ്നേഹിക്കുന്ന ഒരു മനസ്സും അതില്‍ നിറയെ സ്വപ്നങ്ങളും പ്രതീക്ഷകളുമായി ഞാന്‍ ഈ യാത്ര തുടങ്ങി. പക്ഷെ..... ഇപ്പോള്‍ നഷ്ടസ്വപ്നങ്ങളും നിരാശയും മാത്രം. എങ്കിലും ഞാ‍ന്‍ നടക്കുകയാണ്. പ്രതീക്ഷയുടെ ഒരു തിരി വെട്ടമെങ്കിലും തെളിയും എന്ന സ്വപ്നവുമായി...............